Аьжаивсса, инсаннавусса «шлакирдая» чIявусса чивчуну бур, амма элмулул литературалий тIурча шлакирдая цичIав чивчуну бакъар. Вайннуя чичлачими вихну бур инсаннал организмалуву муданна лув дагьсса ари-вари дикIайшиврий, миннуя чартту шайшиврий.
Цайнура цирда организмалува гай къадуккайсса дур — клизма дан, ххюттука – шюшин, диета дугьан, хьюму ласун байсса даруртту буллан аьркинссар, тIий бур. Амма медициналуву «шлаки» тIисса махъ бакъасса бур.
Инсан – му къатта бакъар, чапалшиву миву цачIун къашайсса дур, УЗИ-лулгу ми цичIар ккаккан къадайсса дур. Циванни туну цIана организм «шлакирдая» марцI даву вакссара сийлийсса. Диетолог Гинзбург ур, «му цуппа инсаннал цала кIулшилул кьукьлакьимурди – тIий. Мунин вихма мудангу га цува чапалшиврувура усса. ЧIумуя чIумуйн марцI хьун аьркинссара» тIий ур.
«Токсинну» — тIутIимур махъ хIакинтуран ххуй бизай, амма мунихун дутан къааьркинссар инсаннал цала дуцири тIааьндакъашивуртту, буххаврия байбивхьуну, бучшиврийн биянцIа.
Токсинну – ми бур загьру. Цукунни ми багьайсса инсаннал чурххавун? Обмен веществ зия хьусса чIумал (дукра ххуйну къалялирукун) лирчIмунин учин бучIиссар «токсинну» тIий бур Е. Корсун – фитотерапевт. Укунсса ххиличIлурду мяйжаннугу хъинну чурххан заралссар, миннулли ччаруллаву ва сситтукъатлуву чартту байсса. Укунсса чIумал яла хъинмур анализру дулавур, вайннулли ккаккан бантIисса вил чурххавусса цила кьяйдалий дакъамур. ХIакиннал бусантIиссар зухь ци бан аьркинссарив.
Яла бигьамур даву чурх марцI байсса – дуканмунил хъирив бацIаву дур. Цинявннан кIулли хIакьину консерварду, нацIушиву, фастфудру хъинну заралсса душиву. Масалдаран, чIявуминнал дукай чIярусса дикI, вай хъинну кIусса дукияр, ччаруллангу, дукра лялиян дай системалунгу хъунмасса зарал биян байссар. «Ми бусса чаралий зузи дайссар. Вай органну дигьалаганшиврул дурну хъинссар вегетариантурал дукиялийсса цаппара кьинирду. Ванийну аьмну рациондалул калориярду чан хьунтIиссар. Агарда хъуннасса чIумуй дуллан тIий бухьурча укунсса кьинирду (вегетариантурал диета) чурххан аьркинмур чан къахьун (витаминну) личIлулну бикIияра, ччя-ччя канакияра хъюрув, шагьнал хъюрув, гьивхь, семечки, соя. Уттигу ца ххуллу личIлай бур чурх марцI байсса, хьюму ласун байсса продукты (жмых, кIучIалу (отруби) ишла дуллалаву, мукунма ишла бан бучIиссар угольданул таблеткардугу. Вайннул чурххава дуккан дайсса дур гьарцагу аьркин дакъамур. Амма вайннул личIи къадурну дуккан дайссар чурххан чара бакъа аьркинмургу, мунияту вай даруртту ишла байссар инсан загьрулул (отравить) хьусса чIумал ягу хIан чIяру хьуний.
ХIадур бувссар
Т. ХIажиевал
