Ккуллал райондалул Роспотребнадзорданул (санэпиднадзор) зузала ХI.М.Тариевлущалсса ихтилат.

— ХIажикьурбан Ма­хIаммадович, цалчин, зул­ва къуллугърая бувсун ччива, зул буржру цир?

— На зузисса служба хъанай дур «Федеральная служба по надзору в сфере защиты прав потребителей и благополучия человека» (кутIану Роспотребнадзор), ва мунил территориал отдел Ккуллал ва Лакрал районнай цачIусса, хьхьичIавасса санэпидслужба, торговая инспекциялул ва защита прав потребителей тIисса буржру ялун бивсса. Жул даврийн багьайссар гьарца зат инсаннал цIуллу-сагъшиврийн багьлагьисса: азарду хьун къаритаву, дахху-ласурдал масъала, инсан хъяврин уван къаитаву ва му уруччаву, школардай, садикирдай дикIан багьайсса марцIшиву дуру­ччаву, багьайкунсса щинал жямат щаллу буваву, ххалбигьайссар жяматрая бувкIсса аьрзри ва цаймигу буржру.
— ХьхьичIва-хьхьичI цIу­ххин ччай бур щархъавусса марцI-чапалшиврия. Цукунсса тагьар дур цIа­насса чIумал жулла райондалий?
— Цукунсса дикIави, тIайланма учин, хъинну ххуй дакъасса тагьар дур. Цаппара шяраваллаву лап оьккишиву дур. Ца рязи хьунсса иш буссия, уттинин так ца санэпидслужбалул зузалт гьаз буллайнма бивкIхьурча марцI-чапалшиву дуруччаврил ялувсса масъала, утти жуцIун авкьуну, му масъала кьянкьану гьаз буллай айивхьунни Республикалул Президентгу. МарцIшиву дуруччаврил масъала гьарца мудан гьаз буллай бухьурчагу, райондалий, апрель-майрай субботникру дуваву дакъа, яламур чIумал къулагъас чансса дур. Ва даву дуллан аьркинссар муданнагу, гъинттулгу, кIинттулгу чIун-чIумуй. ЦIинцI-чапалшиву чIун-чIумуй лакьлакьини, чан шайссар, чан­ссаксса лакьингу бигьассар. Циванни жула чIаххуврайсса Чачаннаву, гьарца лавгма буслай ур, цIинцI, ца чагъар кIичIирттаву, ххуллуву бакъасса. Тайния жучIанма тIул-тIабиаьтрал, аьдатирттал, диндалул, гьарца чулуха яла гъанми халкь бур. Амма тайнначIа марцIшиву дур, жучIара дакъар. Тиккугу марцIшиву халкьунналлихха дуллалисса. Цанчирча, ттул пикрилий, тайннал республикалул хъунаманал багьайкун тIалав дуллай тIий марцIшиву му марцIшиву щаллу дуллан аьркинманая. Мугу хъанахъиссар райондалул бакIчи, шяраваллил бакIчи. ЖучIава ччюрклил масъала гьаз буллай бур так ца жул служба, яла щинкIуй аьркинну бакъар. Амма гьарцама уссар чапалшиву дур тIий, цувама марцIшиву дуллан, лакьлан ччай акъассар. ДакIнийн бутан, Дагъусттаннал БакIчи Рамазан АьбдуллатIипов Къизилюртуллал чулухунай лавгун, чапалшиву, ччюрк дуну, ца-кIира райондалул хъунама оькки айхту, циняв районнай байбивхьуна, нигьабувсун, ччюрк лакьлай, субботникру дуллай. Му марцIшиву республикалул хъунамананнивкьай дуллалисса ягу шикку ялапар хъанахъисса жуннарив? Бачай лакьлай, хIарачат буллай МахIачкъалалия цу-унугу къуллугъчи учIан най ур тIий, га лагайхту марцIшиву щинчIав аьркинну дакъар. Масалдаран, райондалийн бухлахисса кIану хъанай бур ЧIяйннал шяравалу. Тила-шила нанинан, райондалул хъамаллуран хьхьичIра-хьхьичI ци ккаклай дур? Ккаклай дур ЧIяйннал шяраваллил дайдихьулийсса ччюрклил бакIурду, яла Ваччав ххуллурдайх, майданнайх ппив хьусса ччюрк, 1-мур ЦIувкIрав нани ххуллийхсса ччюрклил зунттурдив. Ци пикри багьанссар ялун увкIманан жулла райондалия? Мукунма къаххуйсса даражалий бур ЧIяйннал базар ва миккусса дикI даххай кIану. Райондалий дикI даххайсса кIану цамур бакъахьувкун, буван багьлай бур цал багьайкунсса ризкьи биххай кIану, яла, ккаччи-ччиту къабияйсса, лавкьусса кIану дикI кьукьари дурну, маша бувансса. ХIакинусса кьинигу ва даву дуллай бакъассар. Чапалшиву, бивхсса яттил оьтту буссар щяв, дикIуха зун бикIай кIану буссар чапалну.
— Яла ххуй дакъамур тагьар цумур шяраву дур цIанасса чIумал?
— Царагу шяраву ххуйсса тагьар дур учин къабюхъан­ссар. Шяраваллурду мюрщи­ссагу, хъуниссагу дур. Хъунисса шяраваллаву (Ккулув, Хъусрахь, Ваччав, Вихьлив), халкь чIявусса буну, цIинцI-чапалшивугу гьарзасса дур, лакьин ка хъирив лаллай ба­къар учинссар, амма, бигьанугу, мюрщими щархъавугу хъинну чIярусса чапалшиву дур, марцIшиву чIалай дакъар.
— Санэпидслужбалухь хъунисса ихтиярду дурхха мукун марцI-чапалшиву къадуручлачими танмихIрайн кIункIу бансса. Хьуссарив райондалий марцI-чапалшиву дуруччаврил ялув къабацIлацIими жаваблувшиврийн кIункIу бувсса, масъалагу ххалбивгьуну, ххуллу лавсъсса, танмихI бувсса?
— ЦIанасса закондалийн бувну, цумур-цагу идара, организация ххалдигьинсса ихтияр дур так 3 шинава цал. Яламур чIумал, иш багьну, аьркинсса чIумал прокурорная ихтияр ларсун, ххалдигьин бюхълай бур. Райондалийсса шяраваллавусса тагьар жу махъра-махъ ххалдурссия 2014-ку шинал. ТIалавшиннарду къадуручлачиминнай дирхьуссия хъунисса аькIри. Мунихтуну циняв шяраваллал каялувчитурай дирхьуссар гьарцаннай ацI-ацIазарда къуру аькIлул, дуллуссия предписаниярду, чIунгу ккаккан дурну, дувансса давурттал. Ми давурттивгу къадурну тIий гьан бувссар судрайн. Хъиривгу, шиная шинайн вайра-вай диялдакъашивуртту тикрал хъанай дуну, гьан дурссар «искру» судрайн шяраваллал хъуними багьайкун вай давурттив дуллай бакъар тIий.
— ЧIалачIисса куццуй, аьчIа ласаврийнугу дахханашинна личIийну хъуннасса хьуну дакъар. Вил пикрилий, кIантту-кIанттурдай цукунсса даву дулларча хъинни марцIшиву дуруччин?
— Жунма чIалай бур цIинцI-чапалшиву гьарза хъанай душиву ва ми хъиннура гьарза хъанантIишиву вания тиннайгу. Масалдаран, бургияра ца мантаси, шоколад дархIуну дикIай 3-4 чагъарданул къатлуй. Мунияту аьркинни гьарца шяраву жяматран ккаккан бувну бикIан ччюрк дичайсса, цачIун дайсса кIанттурду, яла инсантурая тIалав буллан ми цIинцI-чапалшиву ччи-ччинийн къадичлан, ккаккан бувсса кIанттурдайн дичлачаву. ЧIун-чIумуй дуваван аьркинни субботникру, хъунисса шяраваллаву кIантту-кIанттурдай бацIан бан аьркинни цIинцI-чапалшиву дичайсса къуршив, мичча ми хасъсса кIанттурдайн экьидичиншиврул. Яла аьркинмур зат — чIун-чIумуй лакьлакьаву, гъинттулгу, кIинттулгу личIийшиву дакъа.
— ЦIинцI-чапалшиву да­к­ъассагу, шяраваллаву бур заллу-зал акъасса кка­ччив. Ми чанну къабикIай цIинцI-чапалшиву дичай­сса кIанттурдал лагма-ялттугу, шяраваллил кIи­чIирттавугу. Чапалшиву ппив дуллалаву да­къассагу, хьунабакьай ишру ккаччал хъап увку­ссагу, мунийну бюхъай жиндралшиврул азаргу ппив хьун. Аьркинни миннул ялувгу чаран лякъин.
— Шярал ккаччив бухлаган баврилсса буллай бур шяраваллил администрациярттал бакIчитал, къабуллай бур учин къахьунссар. Амма миннул ялувсса давугу цила чIумуй дулларча хъинни, ккаччил щийн-бунугу хъап куну, авара буккан баннин. Яла, ккаччив кьатI бувну, ми бичин скотомогильникру дикIан аьркинссар гьарца шяраву. Цил багьайкунсса скотомогильник дакъар царагу шяраву. ЛивтIусса ккаччив, хIайвант ратIавун бичлачисса кIанттурду бур. Жу санэпидслужбалул чулуха «предложение» дуларду райондалул бакIчинахь, бувну ца бригада (трактор, машина, усттартал), ххалбивгьуну санэпидслужбалущал, ветеринар къуллугъращал утта-къумашиву, куртIшивугу, цал багьайкунсса скотомогильникру дуван гьарца шяраву. Амма му масъала ттигу щаллу буллай бакъар.
— Школардал иш-тагьар цукунсса дур райондалий?
— Ккуллал райондалий буссар 15 школа, миннувату цIуну бувсса хъанай бур Ккуллал №2 школа, бувну щурущи бунни цIусса школа Ваччиял шяраву, буллай бур Вихьливгу. Къаоьккисса иш бур Къяннал шяравусса школалий, СумбатIлив, 2-мур ЦIувкIрав, Хъюйхъав. Къаххуйсса иш-тагьар дур 1-мур ЦIувкIуллал школалий, Хъусращиял ва Ккуллал 1-мур школалий. Вай школардай капитальный ремонтру дан багьлай бур, чIиртту лекьлакьисса кIанттурду бур (махъсса 10-15 шинай капитальный ремонтру къаккарксса). Оьккину бур Ккуллал спортзал (ДЮСШ). Районнай бикIай Да­гъусттаннал спортсментал бавтIсса бяст-ччал (республикалул лагрулул спортрал соревнованияртту) буллай. Жулла райондалий мукунсса даву дувансса тагьар да­къар, спортзал бур цIусса ремонт дуван багьлагьисса даражалий, волейболданул залданул магъи дур лекьлай. Ккуллал 1-мур школалий цIулаган буван багьлай бур котельная, багьайкунсса гъилишиву дуван къахъанай, оьрчIру бяхълай бур. Ларгсса шиннардий му багьаналийн бувну школа лавкьусса ишругу буссия. Амма хIакьинусса кьинигу иш мукунма бур. Бахтти хьунни ва ларгсса кIинтнил гьантри гъилисса шаву, акъарив лакьин багьанссия школа уттигу. Амма лакьаврийнугу хайр хъанай бакъархха, зарал хъанай бур так дуклаки оьрчIан, учительтуран.
— Азардал иш цукун бур, ци азарунния бурувччуну бикIан багьлай бур райондалул жяматран цIанасса чIумал?
— Ларгсса шинах бурувгун, 2014-2015-ку шинал личIину аварасса иш бакъая. Так цаппара азарду лахъ хьуну дия: лякьлул азарду (кишечные инфекции), туберкулез, пневмония ва мукунна цаймигу чан-кьанну ппив хьусса азарду. Вайннухагу зий буссару, азар лахъ хъанан дикIайхту, батIайссар санитарно-противоэпидемическая комиссия, райондалул администрациялий. Микку ххалдигьайссар анаварну дуван аьркинсса давуртту.
— Ларгсса шинал Москавлиягума буслай бия Хъусрал шяраву чума дур тIий, гьашину ци иш бия?
-ТIайлассар, ларгсса шинал телевизорданувух гужну хъун бувну, авара лахъ дурну дия мунил хIакъираву, Аьрасатнал шагьрурдаягума оьвтIутIисса ишру бия, отпускардай бучIан нигьабуслай буру тIий. Жулла республикалий дуссар 3 тIабиаьтраву абадлий дусса (природный) очаг чумалул. Миннувасса ца хъанай дур жулла райондалий Хъусращату ливчуну КьукIмал чулух. Гьарца шинал противочумный станциялул зузалтрал ххал дувайссар кIа очаг аварану дурив, паракьатну дурив. 2013-ку шинал кIа очаграй кIуллайсса чIакрай гьаз хьуну дия чума, мунияту нигьачIийшиву дия кIуллаву му азар ппив хьурча, лухччиний, чулданийсса инсаннайнгу лахъанссар тIисса, мунияту къурув, чулданий зузиминнайн бувссар вакцина, вайминнахь хъинну мугъаятну бикIаву тавакъю бувссар. 2014-ку шинал му очаг паракьатну дия, вакцинагу къабувтIуссар инсантурайн. Ца 3-4 шинал хьхьичI кIуллал лухччив зия дуллай, ризкьилун ххулув буван къабюхълахъисса кIанттурду бу­ссия. КIуллан дарув буван хIукму бувссия райондалул бакIчинал, ва му даву дурссар гьарца щархъаву, кIулли бухлаган бувссар. Амма му даву дуллан аьркинссар чIун-чIумуй, 2-3 шинай цал, уттигу чIун дирунни мукуннасса талатаву кIуллащал дуван.

 

 

 

— Йод биялбакъашиврул азардугу лахъну дур тIисса хаварду баллан бикIай. Ци учин бюхъанссар мунил хIакъираву?
— Жулла район, щаллагу дунияллийсса зунттал районну кунна, хъанахъиссар йод тIабиаьтраву чансса бусса районну (эндемичный). Йод инсаннал чурххан аьркинссар щитовидная железалул дуккан дулланшиврул жулва чурххан чара бакъа аьркинсса йод бусса гормонну (тироксин, дийодтирозин ва цайми).
Чурххаву йодрал диялдакъашиву (дефицит) дусса чIумал, къашайшалтрал ня, аькьлу къуркъа шайссар, оьрчIал хьхьичIуннайшиву махъун дагьайссар. Яла хъунмур нигьачIаву дур йодрал дефицитрал азаруннил лякьлуву оьрчI бусса ниттихъан ва 3 шин хьуннинсса оьрчIан. Йод жулва зунттавусса аьрщараву, щинаву чанну буний, му аьрщарай ххярхсса урттувугу, ахъулссаннувугу, му уртту канакисса ризкьилул дикIувугу, накIливугу хъинну чансса буссар, жулва чурххан биял хьунсса бакъассар.
Йод гьарзану буссар хьхьирил ахъулссаннуву ва хьхьиривусса балугъраву, хьхьирицIсса аьрщарай хьусса ахъулссаннувугу. ХьхьиричIату арх буклакиссаксса тIабиаьтраву йод чан хъанахъиссар. ЖучIарасса дукиялуву, хIачIиялуву йод бакъа тIий, чурххавун аьркинссаксса йод бучIаншиврул, жунна дуван шайсса, яла бигьасса, ва яла кумаг байсса дарувну хъанай бур йод бусса цIу букаву. ЧIярусса хIукуматирттай дуссар законну кьамул дурну агьалинан итабакьлан ва ишла буллан так йод бусса цIу. Ми хIукуматирттай мукунсса законну кьамул дурну махъ дурсса ххалбигьавурттал ккаккан буллай бур йодрал дефицит дусса ва муницIун дархIусса азарду дусса къашайшалт бухлавгун, ягу хъинну чан хьуну бушиву. Жулла хIукуматрай дурар мукунсса закон кьамул дуван. Циняв агьали гьарца кьини цIу бусса дакъа дукия канай бакъар. ЦIийхчин, агар йод бусса канарча, гьарца кьини инсаннал чурххавун аьркинссаксса йод бухлай бур. ТIайлассар, дур чIярусса дукия йодрал авадансса (хьхьирил ахъулсса, балугъру), мукунна инсаннал йод бивчуну авадан дурссагу. Амма мукунсса дукия душиврийн-дакъашиврийн бувну гьарца кьини ишла дуллан къашай. Йод бусса цIу тIурчан гьармагу инсаннал гьарца дукиялувун бичлачиний, хавар бакъанма чурххавун аьркинсса йод наниссар. Ялагу му йод бусса цIу жулла дукиялуву яла кьюркьумур зат хъанай дур, ахIвал-хIалданух къаурувгун, гьарцаннаща ласун шайсса. Йод бусса цIу ласласиний, аьркинссар му итабавкьусса чIумух уруган. ЦIийву йод щаллуну бикIайссар 9 зуруй, яла му зия шайссар.
Къашавай шаяр, аьркинссар ва бигьассар йод бусса цIу гьарца кьини кулпатраву ишла буллан, оьрчIалгу, жуллагу цIуллу-сагъшиву дуруччин.
— ЦIуххин ччисса зат бур, прививкарду дуллалиний, диндалул ххуллийхми миннуя инкар хъанахъисса ишру бур жулла республикалий. Ккуллал райондалий му даву цукун най дур, прививкалуя махъаллил хъанахъисса бурив, диндалул къабучIиссар тIий?
— ТIайлассар, жул совещаниярдай цайми, яла-яла яруссаннал, районнай мадарасса нитти-буттахъул прививка дуван мюрщи оьрчIру къабуцлацисса кIанттурду чIалай бикIай. Жулла райондалий ур мукунсса 2 нину-ппу. Ттухь цIуххирча, Аллагьнал ляхъан увсса инсан, хъин уван хъанай бунува прививка дурну, къашавай хьун итаву къатIайлассар. Масалдаран, бешенство тIисса азар дур жиндрал хьусса цулкIлуя, бурцIия, тталакрая лахълахъисса, мунил кьацI учирча. Ккаччил кьацI учирча лахъан бюхълай дур жиндралшиву. ЧIумуй вакцина къабутIирча, кьацI кусса инсан ивкIлакIиссар. Циванни, ххассал уван хъанай унува, ивчIан итан? Ттул пикрилий, му къатIайлассар. Ва дунияллий Аллагьнал ляхъан дурну дур лухIиссаннун кIяласса, кьурчIиссаннун нацIусса, ва мукунма чIявусса цаймигу затру, яла гьарца азаруннин дарувгу, Аллагьнал кумаграйхчIиннихха га дарувгу буллалисса. Мунияту, ттул пикрилий, буван багьайсса прививкарду мюрщисса оьрчIан буван аьркинссар цила ккаккан бувсса чIумал.
— Ттучаннаву дахху-ласаврил иш цукун бур, муштаринал ихтиярду дуруччаврил масъала цукун бур?
— ЦIусса закон (№294) дуркния мукьах дахху-ласу даврил масъала ххуй къавхьунни, муштари хъяврин авуртту чIяру хьунни. Амма жула муштари цува хъяврин увайхту я хъирив уклай акъар, ягу аьрза чичлай акъар. ЧIун дурксса дукия дахлай бур, ва бур та бур, вайннулсса цан къабуллалиссару тIий буссар, амма му цумур ттучандалий дия тIий, буслай бакъассар цивппа оькки къахьун. ТIайлассар, укунма мукъурттий баллай бур чIявусса ттучаннай къаххуйсса, чIун дурксса дукия дахлай бушиву, даххан ихтияр дакъанура, хIан дахлахисса, ттучанналувура хIантту хIачIлачIисса, ци кIанай щил бувссарив къакIулсса ччатI бахлахисса, цIуллу-сагъшиву ххал даврил (медицинский) книжкарду бакъасса зузалт зий бусса кIанттурду. Чича аьрза му къаххуйсса затрая, инава цукун хъяврин увссарав, зия хьусса дукиялуя лирчIмур ягу кьай-кьуйлия лирчIмур, мунил чагъар (упаковка) ларсун жучIан бухьхьи, чичара аьрза тIий, чичлай бакъассар. Мукунсса аьрза бакъассаксса, ччимур чIумал ттучан, цамургу идара, объект ххал дуван щихьчIав ихтияр дакъар, дахьра жулла Пландалуву ккаккан дурмур объект дакъа, мугу – 3 шинай цал. Мугу «на вичIан ххал буван учIантIиссара», тIий бусан багьлай бур 3 гьантлул хьхьичI, жу бучIайсса баяйхту, му объектрал, идаралул хъунама гай 3 гьантлуй хIадур хъанай ур жу бучIаннин, чIун дуркмур, зия хьумур дукьлай ур, марцIшиву дуллай ур. Ххал даву (проверка) къуртал шайхту, 3 шинай ялагу диялдакъашивуртту хъанай дур.
Агар аьрза бучIарча муштари хъяврин увсса, ххал даву дуван бюхълай бур анаварну, му дахху-ласухьгу жува бучIаншиву къабувсунма, хар-хавар бакъа. Хъунмасса танмихI бур муштари хъяврин аврин. Масалдаран, чIун дурксса дукия дахлай ириярча, 5000 къурушраяр ларайсса аьчIа дишайссар. Укунсса аьчIа дишайхту, ялагу муштари хъяврин ансса, диялдакъашиву тикрал дувансса пикри дахху-ласучинаву къаличIантIиссар. Мунияту, муштаринал ихтиярду цува хIала-гьурттушинна къадуллай дуруччин къашайссар. Зува хъяврин буварча, ягу къаххуйсса кьай-кьуй зана къаритлай, даххана къадуллайсса ишру бухьурча, дуван багьайсса къулайшинна (услуга) цал багьайкун къадуллай бухьурча, аьркинссар чичин ва адресрай:
Ккуллал район, шяравалу Ваччи, ТО Управления Роспотребнадзора по РД Ккуллал райондалийсса, тел. 8-268-21100, ягу цува увкIун жул идаралийн, бувчIин буван, аьрза чичин.
ХIан хIачIлай бур жямат хъинну чIяруну, багьана бунугу, бакъанугу. ХIан даххан ихтияр дакъанура, ттучаннаву бур бивхьуну щяикIайсса стол, стул, ччатIул ва нисирал парчри, ва миннухун хIачIлай бур цукунсса дуссарив, чув дурссарив къакIулсса оьккисса хIан. Яла бур ттиликI (печень), ччаруллив цIий бур тIий, лажиннугу лухIи лаган дурну, къашавай хъанай. Ялагу учин, ишбажаранчи тIий цIа дакъа, ттул пикрилий, райондалий бур тIайланмасса «спекулянтътал» — учайссия нукIува заманнай. Ишбажаранчи, ттухь цIуххирча, ур ца-кIия ччатI шахьу, машинартту бакьин буву, янна дурухху, кафелуву дукра дувулт. Ялами хъанай бур ларсун гила-шила кьюркьуну кьай-кьуй, дуки-хIачIия, зунттаву ххирану дахлахисса. Ишбажаранчи чайссар цалла карунних ссая-дунугу кьай-кьуй дурну, ягу ххяххан дурну маша буллалиманайн. Ялагу, жулва ишбажаранчитуран вайминнал дулланмур, вайминналми законну хъинну ххуйну кIулну дикIай, цалла дуван багьаймур хъамадитлатиссар. Масалдаран, цIанасса закондалийн бувну, Пландалий ишбажаранчи ххал уван бюхълай бур так 3 шинай цал. Амма му ишбажаранчишиву дайдихьиннин, мунал аьркинссар Роспотребнадзорданул службалийн Уведомление чичин, зун хIадурну ура, гьарзат цил багьайкун хIадур дурну, щаллу дурну дуссар тIисса. Му Уведомление къачичлачиссар. Ххал буллалисса чIумал налоговый службалий авцIуну акъассар, медосмотр дакъассар, чIярусса диялдакъашивуртту дуссар.
— Щинал иш цукун бур райондалий?
— Халкьуннан хьхьичIра-хьхьичI яла аьркинмур зат хъанай дур щин. ХIакьинусса кьини райондалий дур 13 водопровод ва 23 щаращи. Щинал даража ххал буван аьркинссар зуруй цал щиналсса буллалиминнал, мигу хъанахъиссар шяраваллал бакIчитал. МинначIа лабораториярду бакъа тIий, жул службалул щинал ххуй-оьккишиву ххал дувайссар 1-2 зуруй цал, миннащалсса икьралданийн бувну. Вайми анализру (радиация дурив-дакъарив, химический анализ) ххал дувайссар шинай цал. Райондалийсса щин ххуйну, багьайкун дуцирча, къаоьккисса дур, цаппара щаращив личIаннин чару бакьайсса (жесткость лахъсса). Амма щинал ххуйшиву цири, ми щин цирда диялсса дакъасса чIумал. Махъсса шиннардий райондалийсса хъунисса шяраваллаву (Ккулув, Ваччав) щинал иш ххуйну бакъар, яла-яла Ваччав. Цалчинсса марххалтту бувну, дяркъу шайхту, щинну микIлачIай чIявуми щархъавугу. ХIакьинусса кьинигу Ваччав щинал иш ххуйну бакъар, райондалул больницалуву щин дакъар, мунияту жямат, идарарттал зузалт щин ххилай бур неххая, тика-шикка. Щинал иш укун буний, жура-журасса азарду хьун бюхъайссар. Щархъаву хъунив хьусса инсантуран щин ласлан захIмат хъанахъиссар.
— Ваччав цIусса щин дуцлай бур тIархха?
— Бур Хъуннеххая дуцлай. Утти пикри бувара, вай циняр шяраваллавасса чапалшивугу ларсун дуркIсса щин (ратI-ккутIавух, гьарца кIичIирттавасса оькки-ххуй, янна шюршусса щин, ккаччи-ччитул чапалшиву, аьллалимур, жяматрал канализациярду) дуцин най бур Ваччиял жяматран. Циванни вакса ххуйсса щинал авадансса кIанай яхъанахъисса жяматран мукун оьккисса щин дуцлан. Агар марцI дуван «хлорироват» дулларча, му хлордихха чурххан, цIуллу-сагъшиврун яла оьккимурдагу.
— Зул службалул ци учару мунийн?
— ХьхьичIсса чIумал дикIайссия закон (предупредительный санитарный надзор), ци-дунугу дулланнин (школа, садик, щин дуцаву) жущал проектру согласовать дувайсса, бучIину бурив ххал бувайсса. 2007-ку шинал му даву жуяту ларгссар, мунияту жу, ци-дунугу дуллалисса баяйхту, гьан бувару жулва пикри цукунсса буссарив бусласисса чагъар. Му дуцлацисса щинал хIакъиравугу чивчуссар чагъар. Бувсъссар жулвамур пикригу. ХьхьичIава, совет хIукумат дусса чIумал, буссия дуцлай байбивхьуну щин, Хъусращату арх бакъа, ЧIарттал шяраваллил неххая, бувну буссар хIакьинусса кьинигу насосный станция, дурккун архру, бувну щинал накопителлу Хъусрахь ва Ккулув, дуцин хъинну ххуйсса щин, гана-га Ваччав, Хъюйхъав дияннин. Ва пикри бувсъссия, амма къулагъас къадунни. Ванияр хьхьичI буссия дуцлай Щунуя, амма тикку щин дия так ца Вихьуллал, Ссухърал ва ЦIийшиял жяматрансса. Дуцлай дязаннив кьадиртуна. Агар ва цIана дуцлацими щинал анализру къаххуйсса личларча, жу вай щин ишла дуллан ихтияр къадулунтIиссар, яла байбихьинтIиссар хаварду, валлагь, жу хъинну ххуйсса щин дурцуссия, амма санэпидслужбалул къабитлай буру тIий, жу оькки буллантIиссару, ца чIумал Ккуллал садикращал кунма.
— Ци иш хьуна Ккуллал садикращал?
— Ккуллал садик буссия жул службалул лавкьуну, гепатит «А» азар хьуну, мюрщи оьрчIру къашавай хьуну тIий. Райондалул хъуниминнал хIукму бувна садикраву капитальный ремонт дуван. Хъинну ххуйри ремонт, амма чIалан бивкIунни гиву гьарзат пластикалул дакьлай (магъи, чIиртту). Садикраву ишла дуллалисса стройматериаллан дуссар личIийсса тIалавшиннарду, микку ишла дуван бучIишиврул чагъарду бикIан аьркинсса. Жухгу къавичIидирхьуну, тIивтIуна садик. Яла жу му садик лавкьуссия судрайхчIин. Чичлан бивкIссар ттуяту аьрзри, буслан бивкIссар жяматрахь, мюрщи оьрчIал нитти-буттахъахь, валлагь авурсса ремонт дурну дунура, санэпидслужбалул тIитIин къабитлай бур тIий, Москавлийнгума чивчуну бия ттуя аьрза. БувкIссар гива лавай комиссия (жул службалул хъунмургу Оьмариева Э. Я.). Ххал бувссар садик, ккаркссар цинявннан гивусса диялдакъашивуртту. КIай пластик даххана дуллали бувссар!
— Махъсса чIумал чIявусса бур онкологиялул азардал къашавайми хъанай, валлагь жулва зунттаву радиация дуссар тIий. Ци учин бюхъанссар мунил хIакъираву?
— ТIайлассар, махъсса шиннардий чIявусса халкь къашавай хъанай бур му оьккисса азаруннил. Му азарданул угьлай ур мискинмагу, аваданмагу, хъунамагу, чIивимагу щаллагу дунияллий. Жулла райондалий гъалгъарду бикIай, валлагь, зунттаву ладиртсса радиациялул отходру дуссар, мунияту вай укунсса азардугу чIяру хъанахъиссар тIий, ялагу зунттавусса хIухчин вертолетрай, тракторгу дурцуну бувкIун, цавай къуршив лабитлатисса ккавкссар тIий. Мукунмасса хаварду ттунма бавссар Ахттиял ва ТIиляратIиял райондалийгу. Амма ххалдуллалисса чIумал дикIан багьайсса кьаралданияр лахъсса радиация жулла зунттаву хIакьинусса кьини къаляркъунни. Ва азар лахъ шаврил масъалартту чIявусса бухьунссар. Ттулва пикрилий, хьхьичIва-хьхьичI чIярусса аьркин дакъасса затру дусса дукия дур цIанасса чIумал, яла-яла цайми хIукуматирттал (красителлу, консервантру ишла дуллай тIий). Ххал дувара хьхьичIарасса дукиялул упаковкалий дуссар так дикIан багьайсса затру ГОСТ-райн бувну, хIукуматрал ккаккан дурссаннуя тиннай къашайсса, хIукуматрал заводрай, фабрикалий, цехраву, хъинну гужсса контрольгу буллай. ЦIанасса гьарзат дуллай бур техникалул условиярттайн (ТУ) бувну дикъачлачисса затру дакъа, ми цукунсса тарбиялул ишбажаранчинал дурссарив хъирив лаян хъанай бакъар, ГМО-рду тIисса, даххана дурсса дукия-ххяххияртту ишла дуллай бур. ЧIярусса ахъулсса дур, ттулва пикрилий, хьхьичIра къакIулсса, утти дукиялуву чIяруну ишла дуллалисса (бананну, ананасру, мукунна цаймигу жучIара къаххяххайсса). Дахлахисса зат царагу дикIан багьайсса куццул дакъар, тIабиаьтрал ккаккан дурмур чIалайрагу дакъар, масалдаран, дикIун кIанай соевый белок бур, оьлил нагьливу чIяруми ххяххиялул нагьру дур. ЧIяруну ишла дуллай бур синтетика, пластмассарду. Яламур масъала чIалай бур инсаннан махъсса шиннардий чIявусса баларду бакIрачIан букIлай бур, пикрирду буллансса ишру гьарзасса бур (стресс, нерварду). КIулсса куццуй, гьарца азарду нервардайхчIин хъанай дур.
Жулла райондалий чIярусса дур онкология лажиндарал бурчул (базалиома). Мунил багьанагу хъанай бур жулва инсантал кIирисса бургъилу хъунмасса хIаллай къурнил давурттай, лухччиний зий бушаву, лахъсса зунттаву яттичIа бушаву. Лахъсса зунттаву бургъил радиация лахъссар.
Бур Хъусращиял шяраву гаражрай бивхьусса турба, радиация лахъсса. КIанил хIакъиравугу чивчуссия кIул буван кIа турбалун ци дуван аьркинссарив, бакъа чун буванссарив, цукун буванссарив, му МЧС-райн багьайссарив, щийн багьайссарив хъирив лаянтIиссару, шаймур бантIиссар.
— Ина увкуна жулва ихтилатрал байбихьулий, жяматрал аьрзригу ххалбигьару куну. Ссал хIакъиравусса бикIай аьрзри?
— Аьрзри бикIай жура-журасса: щинал, ччюрклил, марцI-чапалшиврул, ттучандалувусса дахху-ласаврил хIакъиравусса, амма яла чIявуми бикIай чIаххуврал аьрщарайн дирчусса ччюрклия, ризкьилул чапалшивруясса. Гьарца аьрза ххалбигьайссар, зурул мутталий жавабгу гьан дайссар аьрза чивчуманачIан.
— ХIажикьурбан МахIаммадович, ина вилва службалия, инара дуллалисса давурттая рязийну урав?
— Махъсса шиннардий службалул ишру хъинну ялавай бивчунни, аьркин дакъасса, жул кару дахIлахIисса законну дуккан дурну. Службалул даву ялун чIалачIисса дакъар, масалдаран учинну ца хирургнал кьувкьуну аппендицит, къашайшала хъин уллай ур, ганаща хъанай бур учин цими хъин увссарив, ци даву дурссарив. Жу азардануя ххассал буллай буру цакуну чIявусса. Жул даву азар хъин даву дакъарча, му азар диян къаритавур. Инсан дунияллий лявхъуния шиннай най дур ва даву, марцI-чапалшиву дуруччаву, азарду хьун къаритлатаву, щин чапал хьун къаритлатаву. ЧIявуссаннан пикри бикIай санэпидслужба чун буруглагиссар, миннал буван аьркинссар ванилсса, танилсса тIисса. Ялагу, санэпидслужбалул даву так ца кафердавух заназаву дусса пикри. Му къатIайлассар. Санэпидслужба кунна инсаннаха зузисса орган царагу дакъассар. Санэпидслужба ххал дувай органни (надзорный), дуван багьайсса даву дурну дурив, дакъарив ххал бувайсса, аьчIа дишайсса. Давурттив дуллан буссар жяматрал бувчIусса, жяматраха зун шяраваллал бакIчитал, райондалул бакIчитал. Минналли ччюрк лакьавугу, щин дуцавугу, кутIану учин, шяраваллаву хъанахъисса, жяматрайн багьлагьисса масъалартту, гьарзат багьлагьиссар миннайн, шяраваллаву мири хъуними. ХIакьинусса кьини так ца санэпидслужбалул бакъа ччюрклил, щинал, школарттал, садикирдал, дахху-ласаврил масъалартту щилкIуй гьаз къабувай, щинкIуй цичIав аьркинну дакъар, так цивппа ххуйну бухьурча, чIумуй харж буллай бухьурча. Ца санэпидслужбалуща гьарзат дуван къашайссар, райондалул жяматрал ахIвал-хIал ххуй шаву цинявннал цачIуну щаллу буллан аьркинссар, шяраваллал, райондалул бакIчитурая, депутатътурая тIайла хьуну, циняв къуллугъчитурайн, жяматрайн бияннин. Жува циняв зузиссару жяматраха.
Ялагу, хьхьичIава гьарца шяраву чурх шюшайсса хIаммамру бивкIун бур, жура-журасса азарду (нацIлия тIайла хьуну) духлаган дурну дур. ЦIана, ваксса техникалул, арцул, гьарзадрал авадансса чIумал жяматрал ахIвал-хIал ялавай багьлай бур, ттул пикрилий. Цанчирча, щин дакъар багьайкун дурцуну, ххуллурду бакъар ххуйсса, хIаммам, банярду бакъар, шяраваллурду ччюрклилу личIавай дур, газрая гъалгъа тIийвагу акъара, хъуручIулссавагу бан къахъанахъисса чIумал. Ва дакъарив ахIвал-хIал ялавай шаву?

Ихтилат бувссар жул корреспондентнал