ДАНИЯЛЛУЛ АРС КЬУРБАНОВ ИМАНАЬЛИ
Уттигъанну, август зуруй, аскисса цIуцIаврил ххяппурттаща ххассал къавхьуну, чIавасса оьрмулий жула дянива лавгунни Шахьуйннал шяравасса Кьурбанов Иманаьли Данияллул арс.

Увссар Иманаьли 1998-ку шинал Шахьуйннал шяравасса Данияллул ва Кумиял шяравасса Загьидатлул кулпатраву. Ванан дурагу 5 шин дусса чIумал, апатI хьуну, жагьилсса оьрмулий аьпалул хьуссар ванал ппу Даниял. Ппу ялув акъа хъуна хьуну, дахьва оьрму бутлан айихьлай уссия Иманаьли. Дагъусттаннал политехнический колледжраву дуклай, программист хъанай, 2 курс бувккуссия. ХIайп, къанясивну лявкъунни Иманаьлин вай сентябрьданул гьантрай цащалва дуклакиминнащал колледжрал бухкIулу лахъан.
Иманаьли икIайва кьянкьасса, тивталсса, тяхъасса жагьил. Дустал ххирасса ва дусшиву дуван кIулсса Иманаьли цувагу ххирая дустуран, чIунархIалминнан, учительтуран. Ххирая ванан Лаккуялу. Иманаьли агьну икIайссия спортрал личIи-личIисса журардахун. Жагьилминная лавг чIумуву гъалгъа тIун буккаврияр пашмансса цичIав мадикIарача ва дунияллий…
Лагмасса тIабиаьт уртту-тIутIавун дахьларгсса гъилисса чаннасса гъинтнил гьантрай ва къумасса хаварданул микIлачIун дунни гъанминнал, шяравуминнал дакIру. Аьрасатнал ва билаятрал дазул кьатIувсса личIи-личIисса шагьрурдая Шяраваллил кьини дуван бувкIсса инсантурал, машинарттал дурцIусса аьлагъужасса Шахьуйннал шяравалу пахъ дагьан дурна ва бявкъусса хаварданул.
Ва захIматсса бивкIулул кьурчIишивугу кIидачIлай, дакIнийхтунусса жижара буллай буру Иманаьлил ниттихь Загьидатлухь, буттауссурваврахь, буттарссихь, ниттил ниттихь, ниттиуссурваврахь, ниттирссурваврахь, уссихь ва ссихь, махъсса цинявппагу гъан-маччанахь, щалвавагу агьлу-авладрахь. Ва къумашиву духIансса ссавур Аллагьнал цалла дулуннав зухьхьун, ва къюву чанссарагу хьхьара дувансса ххаришивуртту ялун дияннав. Иманаьлил рухI хъинний дишиннав, алжан нясив баннав.

Жагьилсса оьрмулуву
ппу яла лавгсса ятин,
Заннал вин ххи къабувнав
буттан къабуллу оьрму?!
Чурх-бакI ябацIай хьуну,
итталун агьай хьувкун,
Азар багьана хьуну,
ажал хьулух лявкъурив?!

Ниттил къюву хьхьара дан
махъру, дарув чув буссар,
Цал зирангсса ласнацIа,
яла арснацIа хьусса,
Заннал кьадарданийну
батIул дан кьисмат хьуний
КIира къюкI, кIира ччаву,
кIирагу жагьилсса жан.

Шахьуйннал, Кумиял жямат

———————————-

ИСРАПИЛЛУЛ АРС ЧIИМАЕВ ХIАЖИ
Мадара хIаллай къашавайгу хьуну, сентябрьданул 6-yний, оьр­мулул 72 шинаву аьпалу­хьхьун лавгунни ГьунчIукьатIрал шяравасса ххаллилсса лаккучу ЧIимаев ХIажи.
ХIажи увну ур 1943 шинал Двигательстройрай (Каспийскалий). 1969 шинал къуртал бувну бур Ленинградуллал кораблестроительный институтрал Каспийскалийсса филиал, мура шинал лавгун ур Совет аьралуннаву бурж лахъан. 1970 шиная шинай, дунияллия гьаннин, зий ивкIун ур Каспийскалийсса «Точной механики» заводрай личIи-личIисса давурттай, инженерная айивхьуну, цехрал начальникнал ва маркетинграл службалул хъунаманайн ияннин.
ХIажи ия ххишала акъа инсантуращал хIал бавкьусса, цума-цаннангу кумаг буван чялишсса инсан, давриву хIарачат бусса, цалва пиша лавайну кIулсса зузала. АрхIал зузиминначIагу, каялувшиву дуллалиминначIагу ХIажинал хIурмат лавайсса бия. ХIажи лайкь хьуну ия ца­ппара медаллан ва мадарасса ХIурматрал грамотарттан.
Ва хъанай ур мархлуцIавасса каспийчанин, ванал ппу Исрапил ва завод буллай, шикку зий ивкIссар 1939 шиная тIайла хьуну.
ХIажинал бивкIулул кьурчIи­шивугу кIидачIлай, жижара буллай буру ванал кулпатрахь, арсурваврахь, душнихь, уссихь, цинявппагу гъан-маччанахь. Цал бунагьирттал аьпа баннав, рухI хъинний дишиннав. Ванан бакъамур ванал оьрчIан, махънан булуннав.
ГьунчIукьатIрал жямат

————————————-

ИРВАГЬИННУЛ ДУШ
СУЛАЙМАНОВА ГУРЖИГЬАН
Август зурул 31-нний аьпалухьхьун лавгунни ххаллилсса зунттал душ, аьзизсса уссурваврал ва ссил ссу, ххирасса бу­ттарссу, ниттилссу, Инишиял ва Ккуцрал жяматраву хъунмасса хIурматрай оьрму бувтсса Ирвагьиннул ва Басиратлул душ Сулайманова Гуржигьан.
Гуржигьан бия хасиятрал иминсса, дакI-аьмал хъинсса, жяматращал хIал бавкьусса, рахIму-цIими бусса, шяраваллил агьулданун ххирасса, дугърисса, жяматраву сийлий оьрму бувт­сса, талихIрал къабувччусса хъамитайпа.
Цил бунагьирттал аьпа баннав, цил хьхьичI алжаннул къапу тIитIиннав, чурх кIукIлуний бишиннав, гьав нурданул дуцIиннав.
Гуржигьаннул бивкIулул къумашивугу кIидачIлай, жижара буллай буру ванил ни­ттихь Басиратлухь, уссурваврахь Зурпукьаллухь, Закирдухь, Мяъсудлухь, ссихь, миннал кулпатирттахь, оьрчIахь, ссурахъаврахь, махъсса цинявппагу гъан-маччанахь.
Инишиял ва Ккуцрал
жяматрал цIания Ясупи

————————————

ДакIнийхтунусса жижара буллай буру Ккуцрал шяраватусса Ирвагьиннул арс Сулайманов Закирдухь, мунал ссу
Гуржигьан
чIун дакъасса бивкIулул жуятува личIи баврийн бувну.
Цил бунагьирттал аьпа баннав, рухI рахIатний дишиннав.
Дустал, даврил уртакьтал

———————————-

МАХIМУДЛУЛ ДУШ МАХIАММАДОВА АЬЙШАТ
Хъунмасса хIаллай чIярусса цIуцIавурттугу ккурхIуну, азаруннища ххассал хьунсса кьисмат къавхьуну, сентябрь зурул 3-нний аьпалухьхьун лавгунни ххаллилсса хъамитайпа, лайкьсса зунттал душ, Инишиял ва Ккуцрал жяматраву хъунма­сса хIурматрай оьрму бувтсса, тIиртIусса дакI дусса, рахIму-цIимилул вибувцIусса, оьр­мулул багьу-бизу хIурматрай бачин бан ххирасса, дакIгу марцIсса, аькьлулулгу камилсса, хасиятралгу иминсса МахIмудлул ва Бичал душ МахIаммадова Аьйшат.
Аьйшат бувну бур 1954 шинал Инишиял шяраву, МахIач­къалалив школагу къуртал бувну, университетрал машлул факультетгу къуртал бувну, цуппа къашавай хьуннин, личIи-личIисса машлул идарарттай зий бикIайссия. Лайкь хьуссар чIярусса ХIурматрал грамотар­ттан ва бахшиширттан.
Аьйшатлул чаннасса аьпа абадлий личIантIиссар жул дакIурдиву. Цил бунагьирттал аьпа баннав, рухI алжаннул ххари даннав, гьав нурданул дуцIиннав.
Аьйшатлул кьурчIисса бив­кIулул къумашивугу кIидачI­лай, жижара буллай буру ванил ласнахь ХIасаннухь, душнихь Каринахь, ссурваврахь Мужаватлухь, Наташахь, куявтурахь Ширванинахь, Исмяиллухь, миннал оьрчIахь, махъсса цинявппагу гъан-маччанахь.
Инишиял ва Ккуцрал жямат