АцIния цалчин хьунадакьарду гьашину жура щаллара дуниял зурзу учин дурсса яла оьзрумур теракт хьусса кьини. 3-мур сентябрь – гихуннай ва кьини билаятрай ци ххаришивуртту хьурчагу, тарихраву лухIинура личIантIисса кьинир.

Ттизаманнул Аьрасатнаву яла – хъуними терактру хьуну дур Чачаннавусса дяъвилул шиннардий, чачаннал сепаратистурал ишир­ттайну.
1991 шинал ноябрь зурул 9-нний Шамил Басаев, Сайд-Аьли СатIуев ва Лом-Аьли Чачаев бакIчисса террористурал кьюкьрал ширишилун увгьуну ур Минеральные Воды шагьрулул аэропортрая ТУ-154 самолетрай леххан нанисса 178 пассажир. Акция сакин бувну бур тани кунная кув личIи хьун бувасса Чачаннал ва Ингушнал республикалий хархавар бакъасса тагьар хIасул даврийн къаршину. Сомолет лихъан дурну дур Турциянавун, тийх боевиктурал ширишилун бувгьумигу итабавкьуну, дурну дур Чачаннавун Аьрасатнал аьрал бичин кьамул къабуллалисса пресс-конференция. Муния махъ Турциянал бакIдургьуминнал ми­ннахьхьун Чачаннавунмай зана хьунсса рухсат буллуну бур.
1992 шинал мартрай Минеральные Воды шагьрулий бувгьуну бур 18 пассажирнащалсса автобус.
1993 шинал сентябрь зурул 28-нний кIулакъасса инсан Омск шагьрулул детсадравун увххун, ширишилун увгьуну ур 6 инсан, миннава 4 мюрщи оьрчIру.
1994 шин
26 май – Террористурал бувгьуну бур Владикавказрая Став­рополлайн нанисса 33 пассажир­нащалсса рейсовый автобус. Ши­ришилун бувгьуми ххассал бувссар «Альфа» группалул. Щин­чIав зарал хьуну бакъар.
28 июнь – Шама террористнал бувгьуну бур 40 пассажирнащал­сса рейсовый автобус. Террористал бувгьуссар Гудермесрал райондалий. Ширишилун бувгьуми сагъну ливчIун бур.
28 июль – Мукьа террористнал бувгьуну бур Пятигорск-Ставрополь-Красногвардейск маршрутрай на­нисса 41 пассажирнащалсса ав­тобус. Террористурал тIалав бу­ллай бивкIун бур 15 млн. доллардал. Ширишилун бувгьуминнавасса 2 террористурал ливтIуну бур, 3 больницалий къуртал хьуну ур. Ширишилун бувгьуми ххассал буллалисса операциялуву ца террорист ивкIуну ур, 3-найн щавурду дирну дур. Щавурду дирну дур спецназрал 5 зузалайнгу.
29 июль – Минводрал аэропорт­рай террористурал дургьуну дур пассажиртуращалсса самолет. Ши­ришилун бувгьуми ххассал буллалисса операциялуву 19-нан апатI хьуну бур, миннавасса 4 ливтIуну бур. Спецназрал кьюкьлул вертолетрайн гьужум байхту, салондалуву граната пIякьучин дурну дур террористуравасса цаннал. Цинявппагу террористал (Чачаннал республикалиясса) бувгьуну бур.
1995 шин
14-19 июнь – Шамил Басаев бакIчисса 195 инсан гьурттусса террористурал кьюкьа Ставрополлал крайрал Буденовск шагьрулийн дурххун, бувгьуну бур 1600 инсан усса больница. Гайннал мурад бивкIун бур Аьрасатнал властирдал Чачаннавусса дяъви бацIан бувну, агьали Дудаевлул низамрайн мютIи бан. Гикку хьусса кьассавраву ливтIуну бур 129 инсан, 415-ннайн дирну дур щавурду. ЛивтIуну бур «Альфа» группалул 3 зузалагу. Та чIумалсса премьер-министр Виктор Черномырдиннущалсса их­тилатрайн бувну, ширишилун був­гьуминнахлу цала хушрай лавг­сса ПаччахIлугърал Думалул депутатътурал ва журналистурал ттиликIрах лабивкIун, Басаевлул кьюкьа шагьрулува дурккун, Ча­чаннал зунттаву кьюлтI хьуну дур.
1996 шин
9 -15 январь – Салман Радуев ва Хункар Исрапилов бакIчисса 500 террорист Къизлар шагьрулийн бувххун, больницалий ва роддомрай 2000 инсан ширишилун бувгьуну бур. Га кьини ливтIуну бур МВД-лул 7 зузала ва 7 боевик. Хъиривмур кьини террористал (250 инсан) ва ширишилун бувгьусса 165 инсан 11 автобусрай ва 2 КАМАЗ-рай бавчуну бур Дагъусттаннал ва Чачаннал дазуйн. Первомайскалийн буххайхту Аьрасатнал аьралуннал миннал лагма рургьуну дур. Боевиктуращал ихтилатру буллай бивкIун бур Дагъусттан Республикалул бакI­дургьуми, Аьрасатнал ФСБ-лул ва МВД-лул каялувчитал. Вай подразделениярттал гьужумралу лирчIун диркIун дур Первомайское шяравалу шанма гьантлул дянив. Гиккусса операциялуву ливтIуну ур 150 боевик, 40 ширишилун бувгьуми, 26 аьраличу, 90-нная ливчуссаннайн дирну дур щавурду. Ххассал бувну бур 82 ширишилун бувгьуми. Ясирну увгьуну ур 30 боевик.
С. Радуев бакIчину цаппара бое­вик­тураща бювхъуну бур Чача­н­навун лихъан.
17 январь – Туркнавусса «Трабзон» портрай террористурал бувгьуну бур СНГ-лул паччахIлугъирттаясса ва Аьрасатнавасса инсантуращал­сса теплоход «Аврасия». Терро­ристурал тIалав буллай бивкIун бур Радуевлул кьюкьа Чачаннавун итадакьин ва Чачаннава Аьрасатнал аьрал бу­ккан бан. Январь зурул 18-нний террористал Туркнал властирдал канийн лавгун бур.
11 июнь – Москавлив «Тульская» ва «Нагатинская» станциярдал дянив метро пIякьучин бувну бур. Ва терактраву ливтIуну ур 4 инсан, 12-найн щавурду дирну дур.
26 июнь – Нальчикрал автовокзалданий Минеральные Воды-Нальчик-Владикавказ маршрутрай нанисса «Икарус» пIякьучин бавриву ивкIуну ур 8 инсан, 40-ннайн щавурду дирну дур. Му бакъассагу, минарду дирхьуну ляркъуну дур Прохладный шагьрулул муххал ххуллул вокзалданий ва электричкалул вагондалуву.
11 июль – Москавлив Пушкиннул площадьрай троллейбус пIякьучин бувну, 8 инсаннайн щавурду дирну дур.
12 июль – Москавлив Мира проспектрай «Алексеевская» метролул станциялучIа троллейбус пIякьучин бувну 26 инсаннан апатI хьуну бур.
16 сентябрь – МахIачкъалаллал аэропортрай террористнал бувгьуну бур пассажиртуращалсса автобус. Ганал тIалавшинна диркIун дур вертолет ва 100 азарва доллар. ДР-лул Халкьуннал Мажлисрал депутат ХIажи МахIачевлул цала машиналий Чачаннавун биян банна тIий, террористнал ширишилун бувгьусса 27 инсан итаакьин увну ур. Террористнан дуллуну дур 80 млн къ. Гихунай га лаивкIун ур Чачаннаву.
16 ноябрь – Каспийскалий пIякь­учин бувну бур дазурду дуручлачиминнал кулпатру ялапар хъанахъисса лахъ зивулийсса къатта. ЛивтIуну ур 69 инсан, миннава 21 оьрчI.
19 декабрь – ПIякьучин бувну бур Санкт-Петербурграйсса метрополитендалул вагон. АпатI хьусса акъар.
1997 шин
23 апрель – Армавирдал вокзалданий хьусса пIякьучавриву ивкIуну ур 2 инсан, 20-ннайн дирну дур щавурду.
28 апрель – Пятигорскалий вокзалдануву хьусса пIякьучавриву ивкIуну ур 2 инсан, 17-ннайн дирну дур щавурду. Хъиривмур кьини бувгьуну бур ва теракт даврийн щак бусса 2 хъамитайпа — Дадашева Айсет ва Таймасханова ПатIима.
27 июнь – Москавлия Петербурглив нанисса поезд пIякьучин бувну, ивкIуну ур 5 инсан, 13-ннайн дирну дур щавурду.
8 июль – Хасавюртуллал райондалий радиофугас пIякь куну, ивкIуну ур Дагъусттаннал дазу дуручлачи­сса ОМОН-далул 9 зузала, 13-ннайн дирну дур щавурду.
29 октябрь – Буйнакскалий пIякь­учин бувну бур 58-мур армиялул 138-мур бригадалул хIапи­сартурал кулпатру ялапар хъана­хъисса общежитие.
1998 шин
1 январь – Москавлив «Третья­ковская метролул» станциялий хьусса пIякьучавриву 3 инсаннайн дирну дур щавурду.
1999 шин
19 март – Ухссавнил АьсатIиннал Владикавказ шагьрулул Хъун базаллуву чачаннал террористурал дурсса пIякьучаврийну ивкIуну ур 52 инсан, 168-ннайн дирну дур щавурду.
31 август – Москавлив Манежный площадьрай аьрщарал вивсса машлул комплексраву хьусса пIякь учаврийну 40 инсаннан апатI хьуну бур, ца хъамитайпа бивкIуну бур.
4 сентябрь – Буйнакскалий ххюра зивулийсса къатта пIякьучин бувну бур, ивкIуну ур 61 инсан, 140-ннайн дирну дур щавурду.
9 сентябрь – Москавлив Гурьянова кIичIираву пIякьучин бувну бур 9 зивулийсса къатта, ивкIуну ур 94 инсан, 164-нан хьуну бур апатI.
13 сентябрь – Москавлив Каширс­кий шосселий 8 зивулий­сса къатта пIякьучин бувну, ивкIуну ур 121 инсан, 31-найн дирну дур щавурду.
16 сентябрь – Ростовуллал областьрайсса Волгодонск шагьрулий 9 зивулийсса къатта пIякьучин бувну, ивкIуну ур 19 инсан, 1045-найн дирну дур щавурду.
2000 шин
6 июнь – Чачаннал Алхан-юрт шяраву милицанал къатрал чIарав 3 террористнал пIякь учайсса задращалсса хъус ххияй машина пIякьучин бувну ивкIуну ур 2 милица, 5-ннайн дирну дур щавурду.
2 июль – Чачаннаву пIякь учайсса затурдищалсса хъусдуххай машинартту пIякьучин бувну ливтIуну бур 30 милицанал зузала ва федерал аьралуннал къуллугъчитал.
9 июль – Владикавказ шагьрулул базаллуву хьусса пIякь учаврийну ивкIуну ур 6 инсан, 18-ннайн дирну дур щавурду.
8 август – Москавлив «Пуш­кинская» станциялул чIарав пIякь учаву хьуну, ивкIуну ур 13 инсан, 100-ннайн дирну дур щавурду.
6 октябрь – Шанна пIякьучаву хьуну дур Ставрополлал крайрай – Пятигорскалий муххал ххуллул вокзалданий ва Невиномысскалий базаллуву. 4 инсан ивкIуну ур, 30-ннайн щавурду дирну дур.
11 ноябрь – МахIачкъалалия Москавлив лерххун нанисса самолет ТУ-154 гьаваллаву дургьуну дур чачаннал террористнал. ПIякьучин данна тIий, нигьабусан бувну, ганал тIалав бувну бур Израилнавун леххан. Увда тIисса Израилнал аьрали базалий самолет щядитайхту террорист властирдал канийн лавгун ур.
8 декабрь – Пятигорскалий шагьрулул ца базаллучIа 2 машина пIякь куну, 2 инсан ивкIуну ур, 169-ннайн щавурду дирну дур.
2001 шин
5 февраль – Москавлив «Бело­русская» метролул станциялий пIякьучаву хьуну, 10 инсаннайн щавурду дирну дур.
15 март – Шама Чачаннал террористнал лихъан дурну дур Стамбуллая Москавлив лерххун нанисса самолет. Спецназрал гьужум бавриву ливтIуну бур стюардесса Юлия Фомина, террорист Супиян Арсаев ва туркнавасса пассажир.
24 март – Хьуну дур шанна пIякьучаву: миннувасса 2 Ессен­тукилий ва Минводылий, цагу – Черкесскаллал чIарав. Шикку машиналувусса устройство дайщун дуллалисса 2 милица ливтIуну бур.
Минводылий Хъун базаллул чIаравсса стоянкалий бацIан був­сса автомобиль «Лада» пIякь куну, 20 инсан ивкIуну ур, 120-ннайн щавурду дирну дур. Ессентукилий ГИБДД-лул къатрая арх бакъа чIиви машина пIякь куну, 20 инсаннайн щавурду дирну дур.
23 апрель – Ессентукилийсса хIатталлив пIякьучаву хьуну, ца инсан ивкIуну ур, 5-ннайн щавурду дирну дур.
17 июль – Ставрополлал дяшагьрулуву автобусрал остановкалий пIякьучаву хьуну, 5 инсаннайн щавурду дирну дур.
31 июль – Чачаннавасса Султан-Саид Идиевлул бувгьуну бур Невиномысскалия Ставрополлайн нанисса 40 пассажирнащалсса автобус. Террорист тIалав буллай ивкIун ур цахьхьунма ярагъ булун ва 1994 шинал самолет дургьуну тIий бавкьусса чачаннал боевиктал дуснакьирттава мурахас бан. Террорист снайпернал ивкIуну ур.
19 август – Астраханнай базаллуву пIякьучаву хьуну, 51 инсаннайн щавурду дирну дур.
29 ноябрь – ИвкIусса боевикнал щащарнил Чачаннал Урус-Мартан шагьрулул дямайданнив цилва цуппа пIякьучин бувну, генерал-майор ХIайдар ХIажиев ивкIуну ур, ганал 3 телохранительнайн щавурду дирну дур.
2002 шин
28 апрель – Владикавказ шагьрулул Хъун базаллул хьулуву пIякьучаву хьуну, 9 инсан ивкIуну ур, 46-ннайн щавурду дирну дур.
9 Май – Хъуннасса теракт хьуну дур Каспийскалий. ПIякьучаву хьуну дур 10.00 ссятраву шагьрулул хъун майданнив, аьрали оркестр майданния хIатталлив Хъун дяъвилуву ливтIуминнал гьаттардий тIутIив дишин нанисса чIумал. ПIякь учайсса устройство дирхьуну диркIун дур колонна нанисса ххуллуцI. ИвкIуну ур 45 инсан, миннава 13 мюрщисса оьрчIру, 170-ннайн дирну дур щавурду.
16 сентябрь – Грозныйлив Ххувшав­рил майданнив пIякьучаву хьуну, 8 инсан ивкIуну ур, 28-ннайн щавурду дирну дур.
10 октябрь – Грозныйлив Заводской райондалул виваллил иширттал отделданул къатраву хъуннасса пIякьучаву хьуну, 24 инсан ивкIуну ур.
19 октябрь – Москавлив «Мак-Дональс» ресторандалучIа машина пIякь куну, ца инсан ивкIуну ур, 8-ннайн щавурду дирну дур.
23 октябрь – Чачаннал террористурал бувгьуну бур Москавлив «Норд-Ост» театрданувусса инсантал. Ширишилун бувгьуми шанна кьини ливчIун бур зумув зат къадирхьуну, бу-бунийва щя-щябивкIсса тагьарданий.
Октябрьданул 26-нний спецназрал театрданул къатрайн гьужум бувну бур. Цинявппа террористал бат бувну бур хасъсса газ итабавкьуну. Ширишилун бувгьуми ххассал бувну бур. Ва ишираву ивкIуну ур 120-нния ливчусса инсан.
27 декабрь – Грозныйлив хIуку­матрал къатта пIякьучин бувну, ивкIуну ур 71 инсан, 100-нния ливчуссаннайн дирну дур щавурду.
2003 шин
5 май – Ухссавнил АьсатIиннал Моздок шагьрулий террористкал Аьрасатнал аьралуннал автобус пIякьучин бувну, ивкIуну ур 20 инсан.
12 май – Смертницал бачин бувсса пIякьучайсса затру дусса «КАМАЗ» Чачаннал Надтеречный райондалул ФСБ-лул управлениялул къатрачIа пIякь куну, ивкIуну ур 60 инсан, 200-ннайн дирну дур щавурду.
14 май – Чачаннал Гудермесуллал райондалий Иласхан-Юртлив те­рро­рист-хъаннил диндалул бай­ран­далийн бавтIсса агьулдануву цала цивппа пIякьучин бувну, ивкIуну ур 28 инсан.
20 июнь – Грозныйлив 2 террористнал хъусдуххай машина пIякьучин бувну, 38 инсаннайн щавурду дирну дур.
5 июль – Тушиналий аэродромрай концертрал чIумал кассалул чIарав 2 хъамитайпа цала цивппа пIякьучин бувну, 17 инсан ивкIуну ур, 50 –ннайн щавурду дирну дур.
9 июль — Москавлив бувгьуну бур Тверская-Ямская кIичIираву теракт дан нанисса Чачаннавасса Зарема Мужахоева. ПIякь учайсса зат дайщун дуллай унува ивкIуну ур ФСБ-лул взрывотехник Георгий Трофимов. Мужахоеван кьуркьуссар 20 шин танмихIран.
17 июль – Хасавюртлив РОВД-лул къатрачIа бацIан бувсса машина пIякьучин бувну, бивкIуну бур чIарах нанисса лякьлуву оьрчI бу­сса хъамитайпа ва ганил чIивисса оьрчI.
1 август – Террористнал Моз­докрайсса аьрали госпитальданийн КАМАЗ щун бувну, госпиталь лекьа-пIякьу хьуну бур. ЛивтIуну бур 50-нния ливчусса инсантал, 82-найн дирну дур щавурду. Тикку операция буллай унува ивкIуссар Хъусращатусса аьрали хирург Аьбдуллаев Арсен, щаву дирну уссия аьрали частьрай психологну зузисса ванала ссурахъу Жахаев Мурадгу.
21 август – Ингушнаву ярагъуннил алгусса 40 къачагъ Сунженскаллал райондалул больницалийн ххявххун, ярагъ ишла банну тIий, нигьабусан бувну, кIичIиравун буккан бувну, машиналувун бавкьуну бур хIакинначIасса Чачаннавасса 5 инсан. Гайннавасса ца, щаву дирну, ивкIуну ур. Ва ишираву цIунцIия хьуну дур поликлиникалул хIакиннайгу. Къачагътал чачаннал дазуй кьюлтI хьуну бур.
25 август – Краснодардай шанна автобусрал остановкалий шанна пIякьучаву хьуну, 3 инсан ивкIуну ур, 17-ннайн щавурду дирну дур.
3 сентябрь – Кисловодскалий элект­ричка пIякь куну, 7 инсан ивкIуну ур, 48-ннайн щавурду дирну дур.
5 декабрь – Ессентукилий электричка пIякьучин бувну, 47 инсан ивкIуну ур, 177 –ннайн щавурду дирну дур.
9 декабрь – Москавлив дяшагьрулуву «Националь» гостиницалул чIарав террористка-камикадзел цила цуппа пIякьучин бувну, 5 инсан ивкIуну ур, 14-ннайн щавурду дирну дур.
15 декабрь – Дагъусттаннай Шура ва Гилатли шяраваллаву боевиктал, 11 инсангу ширишилун бувгьуну, Чачаннаву кьюлтI хьуну бур. Гайннал хъирив багьсса 9 дазудуруччу биту-ххитулуву ивкIуну ур.
2004 шин
6 февраль – Москавлив «Автоза­водская» метролул станциялучIа поезд пIякьучин бувну, 40 инсан ивкIуну ур, 134-ннайн щавурду дирну дур.
9 май – Грозныйлив «Динамо» стадиондалий пIякьучаву хьуну дур. Бомба бивхьуну бивкIун бур Ххувшаврил кьинилун хас дурсса концерт дусса кIанттай, стадиондалул хъунмур трибуналий. 3 инсаннайн щавурду дирну дур, 7 ивкIуну ур. Вайннавух ливтIуну бур Чачаннал Президент АхIмад Кьадиров ва ПаччахIлугърал Со­ветрал член ХIусайн Исяев. Щаву дирну дур Аьрасатнал МВД-лул виваллил аьралуннал хъунаманал хъиривчу Валерий Барановлуйн.
4 июнь – Самаралий базаллуву пIякьучаву хьуну, 11 инсан ивкIуну ур, чIявуссаннайн щавурду дирну дур.
22 июнь – Хьхьувай боевиктал ххявххун бур Ингушнал МВД-лул ва Назраннайсса дазудуруччулт­рал 137-мур кьюкьлул къатрайн, Карбулак поселокрайн. ЛивтIуну бур 100 инсан.
19 июль — Воронежрай дяшагьрулуву автобусрал остановка пIякьучин дурну, 2 инсан ивкIуну ур, 6-ннайн дирну дур щавурду.
26 июль – Воронежрай остановкалий пIякьучаву хьуну, ца инсаннайн щаву дирну дур.
5 август – Моздокрай транспортрал остановка пIякьучин дурну, 3 инсаннан апатI хьуну бур.
20 август — Москавлив Каширский шосселий автобусрал остановкалий пIякьучаву хьуну, 4 инсаннайн щавурду дирну дур.
24 август – Тульский областьрай дагьну дур Москавлия Волгог­радрайн лерххун нанисса самолет ТУ-134, Ростовуллал облатьрай – Москавлия Сочилийн лерххун нанисса самолет ТУ-154. КIирагу самолетрал пассажиртал ва экипажрал члентал – цинявппа 89 инсан ливтIуну бур. КIирагу катастрофа цара-ца чIумуву хьуну дур. КIирагу самолет пIякьучин дурну дур террористкахъал.
31 август – Москавлив «Рижская» метролул станциялучIа террористкал цила цуппа пIякьучин бувну, 10 инсан ивкIуну ур, 51-ннайн щавурду дирну дур.
1-3 сентябрь — Щаллара дунияллул аьрщи-чарура зурзу чин дурсса хъуннасса теракт хьуссар Ухссавнил АьсатIиннал Беслан шагьрулий. Террористурал бувгьуссар шагьрулул 1-мур школа. Ширишилун бувгьуну бур 1000-наяр ххисса инсантал. Ми ххассал буллалисса операциялуву ливтIуну бур 350-ннайн бивсса инсантал, вайннава сайки бачIи – оьрчIру, щавурду дирну дур 500-ннайн.
2005 шин
12 июнь – Москавуллал областьрай муххал ххуллий «Грозный-Москва» поездру сукку шавривун пIякьучаву хьуну, апатIрахьхьун иривну ур 42 инсан.
2006 шин
21 август – Москавлив Черкизовс­кий базаллуву пIякьу­чаву хьуну, ивкIуну ур 14 инсан, 61-ннайн дирну дур щавурду.
2007 шин
4 февраль – Санкт-Петербурграй «Владимирская» метролул станциялий тIутIал базаллуву пIякьучаву хьуну, ивкIуну ур 3 инсан.
18 февраль – Санкт-Петербурграй «Мак-Дональс» ресторандалуву пIякьучаву хьуну, 6 инсаннайн дирну дур щавурду, миннава 2 чIиви оьрчI.
13 август – «Москва-Санкт-Петербург» маршрутрай нанисса «Невский экспрессрай » хьусса пIякьучаврийну 60 инсаннан хьуну дур цIунцIия.
22 ноябрь – Пятигорскалия Влади­кавказрайн нанисса «Ика­рус» пIякьучин бувну, ивкIуну ур 5 инсан, 13-ннайн дирну дур щавурду.
9 декабрь – Невиномысскалий автовокзалданий Пятигорскалия Ставрополлайн нанисса автобус пIякьучин бувну, ивкIуну ур 2 инсан, 14-ннайн дирну дур щавурду.
2008 шин
7 август – Сочилий Лазеревский райондалул Лоо поселокрайсса пляжрай пIякьучаву хьуну, ивкIуну ур 2 инсан, ацIнияссаннайн дирну дур щавурду..
6 ноябрь – Террористкал Владикав­казрай маршрутка пIякьучин бувну, ивкIуну ур 12 инсан.
2009 шин
17 август – Назраннай хьусса терактраву ивкIуну ур 25 инсан, 136-ннайн дирну дур щавурду.
27 ноябрь – Твердал ва Новгород­рал областирдал дазуй Москавлия Санкт-Петербурграйн нанисса «Невский экспрессрай» дурсса терактраву ивкIуну ур 28 инсан, 90-ннайн дирну дур щавурду.
2010 шин
29 март – Террористкахъал Моска­вуллал метролуву цала цивппа пIякьучин бувну ливтIуссар тамансса инсантал.
31 март – ПIякьучаву хьуссар Къизлар шагьрулий. ИвкIуссар 12 инсан, 23-ннайн дирссар щавурду.
9 сентябрь – Владикавказрал базаллуву террористнал цала цува пIякьучин увну, ивкIуссар 17 инсан, 156-ннайн дирссар щавурду.
2011 шин
14 январь – Хасавюртлив «Белые ночи» кафелучIа автомобиль пIякь куну, 3 инсан ивкIуссар, 5-ннайн дирссар щавурду.
24 январь – Москавлив Домодедово аэропортрай террористнал цала цува пIякьучин увну, ивкIуну ур 37 инсан, 130-ннайн дирну дур щавурду.
14 февраль – Губденнай хьусса кIира терактраву ивкIуну ур 2 милицанал зузала, 27-ннайн дирну дур щавурду.
25 февраль – Нальчикрайн ххяв­ххун бур боевиктурал цаппарасса кьюкьри. Гранатарду дирчуну дур ФСБ-лул управлениялул къатрайн ва ФСБ-лул санаториялул къат­райн. ИвкIуну ур ДПС-рал зузала.
2 август – Комсомольск-Амур­дайсса детсадраву хьуну дур теракт. ПIякьучайсса зат дирхьуну диркIун дур чIюлу бувсса къуршилуву. Му 5 шинавусса душнил ласавривун пIякьучаву хьуну дур. Душнил яруннин ва каруннин хьуну дур цIунцIияртту.
31 август – Грозныйлив кIилийнусса терактраву ивкIуну ур 9 инсан, 21-ннайн дирну дур щавурду.
22 сентябрь – кIилийнусса теракт хьуну дур МахIачкъалалив.
2012 шин
6 март – Бат увсса боевик Заур Загьировлул щащар Ами­нат Иб­рагьимовал цила цу­ппа пIякьучин бувну бур Къара­будахккант­ливсса полицанал пострал чIарав. 5 полицанал зузала ивкIуну ур, 2-ннайн дирну дур щавурду.
3-май – МахIачкъалалив Сулакьрал пострай хьуссар кIилийнусса теракт. ХьхьичI пIякь увкуссар автомобиль. 15 минутрава, пIякьучаву хьусса кIанттайн полицанал ва МЧС-рал зузалт батIавривун пIякьчин бувссар «Газель». 13 инсан ивкIуну ур, 90-ннайн дирну дур щавурду.
6 август – Грозныйлив «Военторг» ттучандалул хьулуву террористурал цала цивппа пIякьучин бувну ивкIуну ур 3 аьраличу, 3 инсаннайн дирну дур щавурду.
19 август – Ингушетиянаву 34 шинавусса террорист ХIамзат Альдиевлул полицанал зузалт бавтIсса кIанттай цала цува пIякьучин увну, ивкIуну ур 7 полица, 15-ннайн дирну дур щавурду. Теракт сакин дурну диркIун дур Сагопши шяраватусса 37 шинавусса Артур Гатагажевлул, ванайн чулий цIа дусса дур Вати, «хъунама». 2010 шинал бат дурну диркIун дур ванал кьюкьа, цувама, Доку Умаровлущал хьунаакьиннин, лаи­кI­­лай ивкIун ур полицанал зузалтрая. Ваналгу цIусса кьюкьа да­тIинсса рязишинна дуллуну дур. ЦIусса кьюкьлущал Артур Гатагажев цIунилгу кIура авну ур Малгобековский райондалийн.
28 август – Чиркейлив террористкал цила цуппа пIякьучин бувну ивкIуссар Чиркейннал Щайх Апанди.
2013 шин
21 октябрь – Волгоградрай рейсовый автобусраву пIякьучаву хьуну ивкIуссар 6 инсан, 35-ннайн дирну дур щавурду.
27 декабрь – Пятигорскалий машина пIякь куну ивкIуну ур 3 инсан.
29 декабрь – Волгоградрай вокзалданий пIякьучаву хьуну, ивкIуну ур 18 инсан, 40-ннайн дирну дур щавурду.
ХIадур дурссар
Зулайхат Тахакьаевал