Нюжмардул хьхьичIва Зумаритавал байран Дагъусттаннал агьалинал ца кьини хьунадакьинтIиссар тIий баян буварчагу социал сетирдай, кказитирттай, байрандалул хьхьичI кьини гьар шинах кунмасса аваза гьаз хьуна: кув бия байран 17-нний нюжмар кьинир, кувгу 18-нний ххуллун кьинир тIий.

ПатIимат Рамазанова
ХьхьичIва ххуллун кьини байран дуван икьрал дурну дуссия, Дагъусттаннал бусурманнал рувхIаний управлениялул му кьини ккаккан дуркун. Агьали ташвиш хъанахъаврил сававгу дия Москавлив, Саоьдуллал Аьрабнаву нюжмар кьини байран кьинину баян бувшиву. Дагъусттанналми бусурманнал цанмалусса барз буссарив тIисса рихшантирттая байбивхьуну, цIанакул барз ккуркки лагаврил тагьар мяълумну кIул дувайсса аьлимтал бувагу бакъар тIисса аьй-бювкьурдайн бияннинсса варсагъругу, тIайламургу бия гьарманал зумув. Шиккува кIицI лаган, ШавкIрав жижара бан ххуллун кьини аьрххилий буккан багьсса жу Ххажалмащилив кIарттул ччатI ласлай буссияв. Зумарду кьамул даннав учин бувхминначIан кIарттул ччатIгу ласуншиврул, на 15 ччатI машан лавсъссия, 2 ччатIухсса багьа къалавсуна, «жу хIакьину махъра-махъсса кьини зума дургьуну буру, цадакьа буллалиссару», тIий. Гьаннайсса, щалва Да­гъусттан ххуллун кьини байран дуллай буний, ХхажалмащиячIа тIурча алхIат кьини дуллай бия. Ххажалмащиялми маллатуралгу цанмалусса барз бивкIссияв ттунгу къакIула. ТаравихIрал чаклий байран нюжмар кьини дагьлай душиврул хавар ппив шавриярив биялсса анекдотругума ляхъан бунни агьалинал. «Зунттал хъами» журналданул жаваб дулайсса секретарь Аьжа АьбдурахIманова бия, цуппа му хIалатраву «7 Континент» ттучандалуву буссияв, куннайн кув оьвтIий телефоннавух, байран гьунттий душиврул хавар бавминнал реакция аьтIунссарив, хъянссарив къакIулсса куннасса дия, цавай яругу хъуни бувну буруглай бия, гайми заккунттив чIувин буллай бия тIий. Ссу бия Каспийскалий хьхьувайгу зузи­сса 3 супермаркет буну, мивун левчуссияв оьрчIайх дачIинмур ласун тIий. МахIачкъалалив шагьрулул дязаннив яхъанай бура на, амма лагма-ялтту цавагу кIюрххилнин зузисса супермаркет бакъар жучIа. КъакIулли Каспийскаллал агьлу хьхьувайгу канай бакъацIайсса бухьурча. Цукуннугу цалийн бувкIун, Дагъусттаннай 18-нний дунни байран. Кувннал, мяйжанссар, хьхьичI кьинира дунни.
МахIачкъалалив байран лахъа-хъунну кIицI ларгунни. Гьар шинах кунна. Гьашину шагьрулул администрациялул оьрчIан «Дракон» паркраву ва Родопский бульварданий укра­сса аттракционнугу, нашидир­ттал концертгу бахшиш дунни. Гьуртту хьунни байрандалий пагьламанталгу. Байрандалул хъин хъамаличу ия шагьрулул хъунаманал къуллугъ чIумуйну бартбигьлагьисса Муса Мусаев. Цала хъиривминнащал ва шагьрулул депутатътурал собраниялул председатель Аьбдулмуъмин Ибрагьимовлущал му ивунни оьрчIру байрандалия неъмат ласласисса майданнайн, Родопский бульварданийн. Ми­кку оьрчIру тяхъа-шад буллалисса клоунтал бия оьрчIайх шарикру ва мороженыйрду дачIлай. Муса Мусаев хIала увххунни асфальтрай суратру дихьлахьисса оьрчIал ккучундалувух. Спортрал дялахърурду дусса майданнайх увккун махъ шагьрулул бакIчинал оьрчIру ва нитти-буттахъул барча бунни Яруссаннал театрданул хьхьичIсса майданнив. Микку халкьуннал ва исламрал музыкалул концерт дия. Шагьрулул агьлу бия гукунсса байраннал агьалинал дусшиврул, хIала-гьурттушиврул арарду цIакь дуллалиссар, оьрчIругу ххарину бия бахшиширттая тIий.
ОьрчIан ххуйсса байран дунни июльданул 20-нний Анжи-ареналийгу. Миккумур байран дунни оьрчIру ххари бан ччисса дин дусса инсантурал. Миккугу мякь лиххан хIачIан ччинан уква хIачIансса квасрал кьали бия, тIуркIурдаву ва конкурсирттаву хьхьичIунми оьрчIан бахшишру дуллай бия.
ЯлунчIингу сахаватну байранну дуллансса цIуллушиву дулуннав цинявннахьхьун!