Вай гьантрай Аьрасатнал прессалий ва социал сетирдай ца яла машгьурмур тема дия Чачаннал бакIчи Рамзан Кьадировлул цалва кулпатращалсса ва ниттищалсса Саоьдуллал Аьрабнавунсса аьрххи.

ПатIимат Рамазанова
Аьрабнал принцнал, ми бусравсса хъамал хIисаврай хьунагу бавкьуну, миннал хIурматран Мубараксса Кяъвалул къапурдугума тIивтIунни тIий бия. Му Аьра­сатнахасса хIурматри, Рамзан Кьадиров Аьрасатнал ва бусурман билаятирттал дусшиврийсса арарду цIакь дуллай ушиврул лишанни тIий бур цавай, хасну Ккавкказуллал хIурмат цачIава бушиву ккаккан бувавур тIий бур гайми. Аьрабнал принцнал хъиривчу, мюхчаншиву дуру­ччаврил министр МухIаммад Бен Салманнущалсса хьунабакьаврий Рамзан Кьадировлул кIицI лавгун бур Аьрасатнал Президент Владимир Путиннул мудангу тикрал бувайшиву Аьрасат исламрал билаятирттал дус бушиву, мудан бусурман билаятирттащал бавкьуну, нахIуну ччай бушивугу. Ци бухьурчагу, нажагь бакъа къатIитIайсса Мубараксса Кяъвалул къапурду Чачаннал бакIчинал ниттил Аймани Кьадировал хIурматран тIитIаву Рамзан Кьадировлул цIа бусурман билаятирттай сийлий душаврил барашиннар, тIий бур экспертътал. « Чачаннал бакIчинайн Саоьдуллал Аьрабнавун оьвкуссия Санкт-Петербурглив усса ппурттуву принц МухIаммад Бен Салманнул. Му шама инсаннащал хьунаавкьуссия: щайх Равил Гайнуттиннущал, Татарсттаннал президент Рустам Миннихановлущал ва Чачаннал бакIчинащал. Миккува принцнал чIурчIав дурссия цалла ният душиву Чачаннаву экономикалул проектру бартдигьлан, Рамзан Кьадировлул Аьрабнавунсса аьрххилул бюхъайссар Аьрасатнавун Саоьдуллал инвестициярду нани даврил гьану бизан», — тIий ур аьрабист, РГГУ-лул Тарихрал ва политологиялул факультетрал, ттизаманнул машрикьуллал кафедралул профессор Григорий Косач. Политикалул ва экономикалул коммуникациярдал Агентствалул гендиректор Дмит­рий Орловгу ур Аьрасатнал политиктурава ца яла сий дума ур Рамзан Кьадиров Саоьдуллал Аьрабнаву тIий.