МахIаммад ХIусайнов, пенсионер:
Ларгсса нюжмар ттун дакIний лирчIунни Ттуплислив чявхъа гъарал ларчIун, цимурца ца лахIзалий щинал лув лирчIун, инсантал оьрмурдацIа хьуну ливчIсса якьамасса иширайну.

Дунияллий яла хъунмур хIучI бикIай гужсса гъараллу лачIаврия, тIюъпанну бу­ккаврия, аьрщи сукку шаврия ва тIабиаьтраву шайсса цаймигу гьалаксса ишру къашайссания тIисса. Амма жува яла-яла нигьабуслай бивкIми, къавхьуну ччими ишру ччя-ччяни жущалвагу хьуну личIару. Ва ххуллух Гуржиянаву чявхъа гъараллу сававну оьрмулуцIа хьунни 19 инсан, 37-ннан цIунцIияртту хьунни. Баян буллай бур зарал хьусса ва оьрмулуцIа хьусса инсантурал сияхI ялу-ялун хъунна хъанай душиву. Паракьатсса, рахIатсса оьрмулий ялапар хъанахъисса инсантурал ялун бивунни дакIний-мазрай бакъасса бала. Инсантал оьрмул оьрмулухун яхъанай бивкIсса къатта-къушру лаялун хьуну, цимурцаннуцIа хьуну ливчIунни. Хъунисса зараллу бивунни ххуллурдан, шагьрулул инфраструктуралун. Щинавун бювкьун лавгсса, зоопаркрава­сса вахIшисса хIайвант мугьалттухьхьун биривну, кув ххассал буллай, кувгу ххассал бан бири­къаллай бивкIунни. Ца мукъуйну, инсантурайх кьини дурккунни. Мукунсса чIумал кумаг бан хIадурну бушиву баян бунни Аьрасатнал МЧС-ралгу. Аллагьнал мудангу оьмуния бурувччуну лякъиннав тIий ура, ссавур дулуннав хъамаллурал лавайсса хIурмат бусса гуржиял агьалинахьхьунгу.

Бадруттин Сулайманов, пенсионер:
Ларгсса нюжмардий хьунни ххари хьунсса ва пашман хьунсса тамансса ишру. На мудангу дунияллий хъанахъимуния хавар ласлай телевизорданух вичIилийна икIара. Вай гьантрай хIайран хьунна Петрозаводскалий градоначальникну бивтсса 34 шинавусса Галина Ширшина зурул мутталий арамтураща дан къабюхъайсса давурттив дурну, муничIан Аьрасатнал Президент учIаврийн бувну. Галина Ширшина ларгсса шинал сентябрь зуруй хьусса бувчIавурттай ххув хьуну, бивтссия шагьрулул хъунмурну. Цуппа къуллугърай битайхту, арцу махъун щун даву мурадрай, ванил цилла иннаугурациярагу къадурну дур. Яла махъ ЦIусса шин хьунадакьлакьисса, аьдада арцу харж дуллалисса байранну дуллангу ихтияр къадуллуну дур. Муниха лархьхьусса мюнпат бакъасса цаймигу давуртту къадурну, ванил цикссагу арцу шагьрулул бюджетравун дирчуну дур. Цуппа къуллугърай битайхтугу, ванил махъ буллуну бур цилла дуллалисса давурттая агьалинахь буслан. Буллусса махъгу бацIан бувну бур. Цинявппагу агьалинаща ванил дуллалисса совещаниярттай гьуртту хьуну, бусан бюхълай бур цалва цIурувкьюсса масъаларттая. Галина Ширшинал дурсса ца яла агьаммур давугу хъанай дур шагьрулул троллейбусирттавусса проездрал багьа кьюкьин баву. Му багьа кьюкьин бувния шихунмай 12% доходру гьаз хьуну дур, троллейбусирттай заназими гьарза хьуну бур. Инсантал чIяву хьувкун, 4-5 троллейбус цаймигу итабавкьуну бур. Шиккува кIицI лаган, ванияр хьхьичIма шагьрулул хъунама усса чIумал, троллейбусрал управление банкрот хьуну диркIун дур. ХIукуматрал транспортрал багьа лагь бувну махъ, цивппа заллусса машинартту буминнангу къаччай бунува, багьри лагь буван багьну бур. Му бакъассагу, Ширшинал каялувшиннаралусса зузалтрал шагьру марцI бувну бур ихтияр дакъанна ччи-ччиний лачIлачIисса рекламардацIа. Ва мукунма кьянкьану бацIлай бур ихтияр дакъанна дуллалисса къат­рал ялувгу. Агьалинай аьтIисса каялувчитал бусса кIанттурдай низам дишингу, ядувангу, ялапар хъанангу жунмарив багьлай бур так хияллаву.
ХIадур бувссар Имара Саидовал