ХАСБУЛАТЛУЛ АРС МИХIАДОВ ХIУСАЙН
Хархавар бакъасса азаруннища ххассал уван къабювхъуну, июльданул 1-нний жуятува личIи хьунни ххаллилсса лаккучу, Ххюлусмату­сса МихIадов ХIусайн Хасбулатлул арс.

ХIусайн увну ур Ххюлусмав 1936 шинал хъудугьултрал кулпатраву. Школагу къуртал бувну, лавгун ур цалва аьралий бурж лахъан. Муния махъ 2 шин дурну дур Донбассрай шахтерну зий. Яла лавгун ур цала буттачIан Туркманнавун, тикку лавхьхьуну бур тIаннул усттарнал пиша. 1961 шинал увкIун буттал шяравун, зий уссия тIаннул усттарну. 1966 шиная 1968 шинайннин зий ивкIун ур Къазахъисттаннайсса Байконурдай (космодромрай) аьраяллил совхозрай. Муния махъ буттал кIанттайн зана хьуну, шяраву 1969 шиная 1983 шинайн ияннин зий уссия пучрал отделениялул начальникну. Микку зий унува, жяматран хайрну, киномеханикнал пишалийгу зий икIайссия. 1985 шинал ивзссия ялапар хъанан МахIачкъалалив, зий уссия санаториялий кафелул хъунаману. Сакин бувну, зузи бувну буссия тIаннул давуртту дайсса цех.
ХIусайн хъинну жямат ххира­сса, инсантуращал авкьусса, имин­сса, лагма-ялттунащал дахIаву дан кIулсса, ка-кумаг бан анаварсса, сант кIулну даву дайсса, цанма кIулмур гаманангу лахьхьин бан хIарачат буллалисса, мяйжаннугу бусравсса инсан ия.
ХIусайннул бунагьирттал аьпа баннав тIий, ванал кьурчIисса бивкIулул къумашивугу кIидачIлай, дакIнийхтунусса жижара буллай буру кулпатрахь, оьрчIахь, душваврахь, ссурваврахь, уссихь, цинявппагу маччанахь. Махъ ливчIминнахьхьун цIуллушиву дулуннав, оьрмулий барачат бишиннав.
Ххюлуссуннал жямат

———————————-

АБАКАРДУЛ ДУШ ХIАЖИМУРАДОВА ПАТIИМА
Майрал 25-нний, оьрмулул 78 шинаву, дунияллия лавгунни Кумиял шяравасса Абакардул душ ПатIима, шяравугу, шагьрулийгу бусравну оьрму бувтсса зузала. ПатIима чIивину бунава даврил кьимат кIулсса, хIарачат бусса душ бия.

Ниттищал архIал колхозран кумаг буллай, ахънилсса, къатлул­сса буллай бикIайссия. Шагьрулийн бивзун махъ Балугъирттал консервалул комбинатрай зий буссия. Мунил сурат тачIаврагу чан къархьуссар ХIурматрал улттуя. Махъ ппурттуву, пенсиялийн букканнин, зий буссия цIигьурну «Салам» кафераву. Чув зурчагу, мунил кьимат лавайсса бия.
ПатIимал цила жяматрацIун­с­са, щарницIунсса дахIаву мудан дурурччуссар. ПатIима щарнил халкьуннан ххирассагу бия. Къашайнал ялун биян, мюхтажнан кумаг бан, чIарав бацIан мудангу хьхьичIунсса, инсантурай дакI цIуцIисса буссия. Цибанссар, лавгунни дунияллия Кумиял агьулданун ххирасса, хIурмат лавайсса инсан.
Аьпалул кьурчIишивугу кIи­дачIлай, жижара буллай буру МахIаммадбаглухь, душваврахь, уссихь, гъан-маччанахь. Цил гьав нурданул дуцIиннав, алжаннул ххари баннав, махънал оьрмурдай барачат бишиннав. Амин.
Кумиял жямат

————————————

Ссурахъу акъаяв,
ина уссуяв

Шин чIарах дурккунни,
ххира ссурахъуй,
Ина чIарав акъа
вил чIу къабаллай,
Щалла дунияллул
ххуйшиврул улттуй
Вил иминсса пишлил
лишан къаляхълай.

Вих аьтIий, зума тIий,
лагь хъанай бакъар
Шин ларгун мукьахгу
Хъуннеххал ххурхху.
Вил машина багьсса
кIанттух буруглай,
Ттигу аьтIийнма бур
барзунттай бархху.

Цанъявав Аллагьнан
цIими къавхьусса
Вил жагьилсса оьрму
цIаннал бугьан бан,
Ххяххабургъил тIинттал
пар-пар цIалайсса
Вил яруннал лама
башттан лещан бан.

ЧIартта-Ар дурцIун дур
чIируннатIутIал,
ТIутIал арийх занан ина акъара.
Къаувччунна ина вай
тIутIал кьункьал,
АпатIрал кIилирчIун
оьрмулул дара!

Уссияв, ссурахъуй,
ина дакI хъинсса,
ДакIнивусса чани
чийх бачIин шайсса,
Мюхтажшиву дунан
ка-кумаг байсса,
Мурччайсса пишливу
бургъил нур дусса.

Ссурахъу акъаяв, ина уссуяв,
Уссушиврий мудан
чIарав ацIайсса.
Ина ттул оьрмулул чанна цIукуяв,
Чумартшиврул цIайлул дакI
дуцIин дайсса.

Буссия, ссурахъуй,
вил чурхгу, бакIгу,
Оьрмулул ххуйшиврул
лишаннан лайкьсса.
Цаманахь учайсса мукъул мяънагу
Аькьилнал аькьлулул
аят куннасса.

Уссияв, ссурахъуй, ина аьрщарай,
Хьхьемал кIунтIру кунма,
ас-ламус марцIсса.
Лагмава оьрму бур
щин кунма, щарай,
Цир ванил тIин-тIааьн
ина акъасса.

Буссар тIар алжангу
хIурулъэнт бусса,
ХIурулъэнт бухьунссар
ина кунмасса,
Бургъил тIинттай кунма,
бунагь бакъасса,
Ахиратрал ула чIюлу дуллайсса.

Цибави, ссурахъуй,
на кьадарданун,
КьурчIи мукьал кьартIа
кьюлтIатIи бувсса.
КьюлтIа тIунна нагу,
сагъну буссаксса,
Вил рухIирайн икрам буллай
буссаксса.
Гъазибуттаева Саржанат,
ш. Хъусращи

——————————————

Душнил Гулмирал
аьпалун

ЦIан ттуруллул бувгьу баргъ,
Дязанний кьаркьсса тIутIий,
Ттул гъюжу дурксса дакIгу
КIира шинайн дирунни.

Ца-цассаннал кьадиртсса
Ва лавмартсса дуниял
Вингу кьаритан багьрив,
Заннал кьадар бивукун?

Цукун бура, Гулмирай,
Вай интнил кутIа хьхьурдай?
Ццах-ццах тIийнма бакъарав,
Умалат дакIнийн агьлай?

Ина батIул хьуну махъ
Бивтсса баргъ гъили къабай.
Ина бухлавгун мукьах
ДакI ссалчIав ххари къадай.

Вана вил чIу къабаллай
КIира шингу ларгунни,
Цимил вийн оьвчирчангу,
Ина гьай къаучара.

Дунияллул ххазина
Вища букан къавхьунни.
Душнил оьрчIал барачат
Ина ттун кьабивтунни.

Нину Жамисат

————————————

Хъуннасса пашманшивугу кIидачIлай, дакIнийхтунусса жижара буллай буру ХIажимурадов МахIаммадбаглухь, ванал аьзизсса кулпат
ПатIима
аьпалухьхьун лагаврийн бувну.
Цил бунагьирттал аьпа баннав, рухI бигьаний дишиннав.
«Илчи» кказитрал зузалт