Июньдалул 8-нний Дагъусттаннайн къуллугърал аьрххилий бувкIунни АьФ-лул Ухссавнил Ккавкказуллал иширттал министр Лев Кузнецов ва «РусГидро» ОАО-рал правлениялул председатель ва гендиректор Евгений Дод.
МахIачкъалаллал аэропортрай хъамал хьунабавкьунни Региондалул бакIчи Рамазан АьбдуллатIиповлул, ХIукуматрал Председатель Аьбдуссамад ХIамидовлул, вице-премьер МахIаммад Исяевлул ва цайминналгу.
БучIайхтува бусравсса хъамал республикалул каялувчинащал архIал лавгунни Хъунзахъиял райондалийн – ГьуцIалтIиял ГЭС буллалисса кIанайн. Яруссаннал Къуйсу неххай 2007 шиная шинмай буллалисса гидроэлектростанциялул кутак хъанахъиссар 100 МВт, мунил шинай буллантIиссар 350 млн. КВг электроэнергиялул. Дагъусттаннай 4-мурну хъанахъисса (кутакрал чулуха) ГьуцIалтIиял ГЭС-райну Дагъусттаннай щаллу хъанантIиссар биял къахъанай бивкIсса энергия.
ЦIанасса ппурттуву ГЭС бувну къуртал шавай бур, гьашину зий байбишин тIий бур.
Яла Лев Кузнецов ва Рамазан АьбдуллатIипов гьантIиссар МахIачкъалаливсса цаппара объектирдайн. Муния махъ ДР-лул ХIукуматрал къатраву хьунтIиссар республикалул экономика, маэшат ххуй шаврин хасъсса, импортозамещениялул иширттан хасъсса совещание.
ХIадур бувссар ХI. Аьдиловлул
