Дянивмур кIулшиву ларсун, гихуннайсса дуккаву дачин дуван, аттестатру канил бугьан, ЕГЭ-рду дуллай булувкьуну бур цIана гьашину школа къуртал буллалими ва дукIува къуртал бувну, му экзамен дулун къархьуми. Выпускниктуран ва миннал нитти-буттан хъуннасса агьамшиву дусса му Экзамендалийн багьайсса пресс-конференция хьунни июньдалул 8-нний «Дагестан» РИА-луву. Мунивух гьуртту хьунни Аьрасатнал Жагьилтурал союзрал председатель Павел Красноруцкий, Рособрнадзорданул каялувчинал хъиривчу Анзор Музаев ва ДР-лул кIулшиву дулаврил ва элмулул министр Шагьаьппас Шагьов.

Бадрижамал Аьлиева
Ва батIаву дачин дурну ия «Дагестан» РИА-лул директор МахIаммад МахIаммадов. Ванал бавтIми кIул бунни ва кьинисса хъамаллуращал ва кIицI лавгунни «Открытая власть» проектрал лагрулуву журналистуращал хьунабакьайшиву республикалулми къуллугъчитал бакъа, Аьрасатнава бувкIмигу. Хъирив махъ буллунни Анзор Музаевлухьхьун. Рособрнадзорданул хъунаманал хъиривчунал цалвамур ихтилатраву чIурчIав дунни ЕГЭ – му дуклаки оьрчIал оьрмулувусса, щалвагу билаят­рал кIулшиву дулаврил аралувусса ца агьамсса иш бушиврий, муних ххишала дакъа хъуннасса къулагъас дуллай бушиврий, бувсунни цивппа зий бушиву му экзамен шайссаксса тIайлану, даччин дакъа, низам лиявуртту къархьуну дулаврил ялув, мунил хIасиллал, миннул тIайлашиврул ялув Аьрасатнал Федерациялий щилчIаввагу щак къаучиншиврул. Бувсунни ЕГЭ дулаврил ялув личIлулну ца Дагъусттаннай бакъа, билаятрал 20 региондалийгу бавцIуну бушиву. Мунал, мукунма, кIицI лавгунни гьашинусса выпускниктуран ЕГЭ-луву яла захIматми кIанттурду махъ ливчIшиву. Бувсунни медикнал ва цаймигу пишарду язи бувгьуминнал ва кьини дуллушиву выпускниктурал дянив цалла язи дугьайминнуву яла машгьурми экзаменну – химиялул ва обществознаниялул.
Экзаменну дуллалисса чIу­малсса низамлияндавурттая буслай, кIицI лавгунни миннуву яла чIяруну хьунадакьайми ва дуклаки оьрчIаву яла «машгьурми» душиву телефонну ва шпаргалкартту ишла дуллалаву, мукунма куннащал куннал ихтилатру буллалаву. ДукIу, масалдаран, цалчинсса экзамендалийра мукунсса низамлияндавурттал дурну дур 700 метка онлайн режимрайсса аудиториярттал 30% бусса кIанай. Гьашину мукунсса ишру чIаланну чан хьуну бур, аудиторияртту цивппа чIяву хьуну бунугу: 80% онлайн аудиториярттаву цалчинсса экзамендалий дурагу хьуну дур 140 метка. Ва хьуну дур дуккаврил шинал дянив дуклаки оьрчIащал ва миннал нитти-буттащал дуллай бивкIсса давурттал хъин хIасилну.
Мукунма Рособрнадзорданул каялувчинал хъиривманал кIицI лавгунни выпускниктурал кIулшивурттал даражагу итталун багьанну лавай хьушиву. Масалдаран, дукIусса шинал ЕГЭ дуллалиминнал анжагъ 20% бивну бур математикалул, литературалул ва оьрус мазрал экзаменнай кIилчинмур бутIувуми давурттив щаллу дуллалавричIан, гьашину, тIурча, му даражалийн лавхъун бур выпускниктурал 85%. Мукунна ларайсса хьуну дур гьашину литературалул экзамендалул хIасиллугу.
— Вайгу, вай кунмасса цаймигу кIанттурдал тIутIиссар шинал дянив школарттай дурсса давурттал тIайлашиврия, миннуя мюнпат бушиврия. Вайннул чIалачIи буллай бур школар­ттай учительтал мяйжаннугу зун бивкIшиврия, оьрчIащал багьайсса давурттив дуллай. Гихунмайгу укунма зурча, выпускниктурал даража хъиннува лавай хъанантIиссар, миннан ххишала я телефонну, я шпаргалкартту аьркин къахъанантIиссар, — увкунни Анзор Музаевлул.
Павел Красноруцкийлмур ихтилатгу бия мукунма шпаргалкарттайн, телефоннайн къаршийсса. Яла чIяруну низам лиян дуллалисса кIанунугу хъанай бусса бия хIажатхантту.
— Хъинну кьурчIи бизай даврил дачIи ххишалагу чирчуну махъ, дуклаки оьрчI увккун хIажатханттувун, шпаргалка ягу телефон ишла дувансса кьаст лархIуну, 100 балл ласунсса нижатрай, ашкара хьуну, уккан увну экзамендалия, царагу дакъа личIаву. На нава барану хьунна экзамен дуллалисса пунктрай укунсса иш сававну 6 оьрчI уккан аврил. Ттул тавакъюри оьрчIахьсса, зунна дарс 70 баллданунну кIулсса чIумал, хIарачат мабулларди му 100-ннин чичин, шпаргалкартту ишла дуллай, — увкунни Павел Павловичлул.
Ванал бувсунни жулла республикалийн бувкIсса, ЕГЭ-рду дуллалиссаксса хIаллай жучIава зузисса федерал наблюдательтураягу.
— Шийх зий дуссар федерал жяматийсса наблюдательтурал щаллусса команда. Миннал ва шинал февраль зуруйра дайдирхьуссар цIананин аьркинсса хIадуршиннарду. Миннавасса чIявуми бур дукIусса шиналгу Дагъусттаннайн бувкIсса вара чIумал, ца-цавай гьашину цалчин бувкIсса бур. Ва даврий зун жу язи увгьуссар, Аьрасатнал Федерациялул 30 субъектрайн гьан увансса, 2 азара инсан. Миннал муниннин дуллуссар хасъсса экзамен ва лавхьхьуссар зунсса куц. Ми цивппагу гьан бувссар наблюдательталну цалва мархри бакъами субъектирдайн. Масалдаран, Дагъусттаннай зий буссар Астраханнаясса, Санкт-Петербурграясса, чIаххувсса республикарттаясса инсантал, — увкунни ванал.
Шагьаьппас Шагьовлул цалвамур ихтилатраву барчаллагь увкунни Анзор Музаевлухьгу, Павел Красноруцкийхьгу дурсса даврихлу. ЕГЭ-рдая ихтилат буллай, министрнал чIурчIав дунни щаллагу республикалий Хасавюрт шагьрулий душиву му экзамендалийнсса яла хьхьичIунсса хIадуршинна, мунил ккаккиярттугу гийх ларайсса душиву. Мукуннасса давурттив республикалул вайми шагьрурдайгу, районнайгу дуллан къабучIиссарив тIисса суалданухьхьун, Шагьаьппас КьурамахIаммадовичлул кIицI лавгунни му кIани-кIанайсса КIулшиву дулаврил управлениялул бакIчиная хъар хъанахъисса кIану бушиву, Хасавюрт шагьрулийсса УО-рал начальник ушиву хъинну цалла даву кIулсса ва му дуллалисса.
Гихунмайсса цалва ихтилатраву ванал оьвчаву дунни нитти-буттайн ва оьрчIайн: «Шпаргалкарттайнсса ва телефоннайнсса умуд цуппа битира. Дулара оьрчIахьхьун каши цанма 11 шинал дянив лавхьхьумур, цанма кIулмур чIалачIи буван­сса, му экзамен дулунсса цамур ххуллух луглаги къабуллай, так цалла кIулшивурттайн вихну бикIаншиврул».
Укунма тIий бия ва кьинисса вайми хъамалгу: оьрчI лахьлай, ккалай, хIадур хъанай ухьурча, ЕГЭ-раву цалва гужирайну къалахьхьинсса, къадулунсса цичIар дакъашиву.