КIира нюжмардий Аьрасатнал агьалинал зумату щяв къадирхьунни кIия инсаннал цIа: уттигъанну Чачаннаву ташу бувсса Луиза Гойлабиевал ва Нажуд Гучиговлул. Хъунмур авазагу бия вирищар Луиза оьрмулул хъунасса Нажуд Гучиговлун циванни, му гужрайри мунан щар буллусса, зулму бавур, къияр, ябацIур, хIатта педофилияр тIисса.
ЦукунчIав ми ихтилатирттавух хIала буххан ччай бакъая, щийн ци багьайссар, мурив хIакьину Аьрасатнаву яла агьаммур масъала, циняв масъалартталсса бувну, гьаннайсса, ламу лавхъун тий бавцIумирув, учирча бакъа. Ва, ахиргу, ташу баву оьккишивурив? Ножай-Юртовский райондалул ОВД-лул хъунаману зузисса Нажуд Гучигов ЦIуссалакрал райондалийсса Ххувшаврил байрандалий ккавккуна ттун кIурссану. Валлагь, журат дусса адамина ия, гукунсса адаминал хъаралу шамилчинмур щарссанугума хъинникьай учин кунасса. Мюрш къабикIланна, цаласса цала банссар, я щар хьунссар, я къахьунссар, миннайн цайнма бакъасса, щийнчIав багьайсса иш бакъар. Мийва гьантрай Люксембурграл вице-премьер Ксавье Беттельлулгу бунни ташу. Ттун къакIулли ци тIий чичинссариввагу, щар хьунни му, ягу щарну бувцунни, увцунни (Ява тти!) бельгиянал архитектор Готье Дестне. Ца зурува Люксембурграл премьер Евросоюзрал председательшиву дуллантIисса инсанни! Му ташулийн ци учару учайхту, демократияр, инсаннал ихтиярди, асардал тархъаншивур тIутIиссагу бур. Бур микку «русский след» бушаву гьанулун лавсун, ай Ксавье оьруснал композитор Сергей Рахманиновлул наслулияссар тIутIиссагу. Рахманинов 1917 шинал большевиктурал гьалакIу бувсса Аьрасатнава ливхъсса инсанни, оьрусри, амма мунал наслу Европанавур тарбия хьусса. Рахманиновлул внук акъа арс ухьурчагума, оьккимур оьккир. Мунияту чув-адамина чувнан щар шаву оькки къабизайсса инсан ттун къаувчIинссар цукунчIавгу, му ишираву на къухънассара, нягу къуркъассар. Арийлагу, ацIийлагу хъами арамтуран хъанахъисса ташурду хъинникьай, гьалмагъай жагьилсса акъахьурчагу, кIилчинмур щарссану щар хъанай бухьурчагу. Ва ттул ттулвамур пикрир.
ЧIярусса хъами дуцаврил масъала хъинну чялишну ххалбигьлай бур цIана Чачаннаву, закондалийну цIакь бувангу хIадур хъанай бур. Бивщунал бя, кьуркьунал тIамар дикIайсса. КIира-шанна щарсса дуцаврил хIакъираву цума ци тIий урив цIуххав нагу цаппара инсантурахь. Зунмагу бувчIлай бухьунссар укунсса суалданухьхьун жавабру дуллалиминнал цIа-бакI тIайлану кIицI лаган къабучIишиву, мунияту нагу цаппара цIарду даххана дував.
Шагьабуттин Расулов, динийсса институтрал преподаватель, элмийсса зузала:
— Ххуйсса суал буллай бура. Бунияланурив, Мубараксса Кьурандалий тIутIимунийн ва ххирасса МухIаммад Идавсил (с.аь.с) увкумунийн ттул цукунчIавсса щак бакъассар ва бикIангу къабюхъайссар. Хасну нава, ттулва маэшат гьаз байхту, кIилчинмур щарссагу дуцин дакIний ура.
Ражав Шамсуев, имам:
— Му суалданущал ттучIангу бучIай чIявусса, микку так Аллагьнал рязишивур гьасса. Исламрал кIира-шанна щарсса дуцин бучIи буллай бухьувкун, Аллагьнал кумаг баннав гьарцаннан.
Бадрижат Мусаева, предприниматель:
— Уттигъанну буккав Американаву Массачусестс штатрай Эльмира Эйнуллаева тIисса азирбижан миллатрал душ американал сенаторнал кумагчину зузисса цамур хъамитайпалун щар хьунни, миннал, хъамалгу бавтIун, хъатIи бунни, ташугу документрайну цIакь бунни тIисса хавар. Ца мукъуйну учин, ахирзаман! Дуниял авлия хьуну дур. Диндалия бувагу хавар къаласурчагума, дуньявийсса этикалийн бувнугу дакI оьзлази дувансса ташу бур. Мукунсса ташурду цIакь бансса ихтияр дуллусса Конституциялул кьимат цир?! Жува кIилчин щарссану щар шаврия нигьакъабуслай, нигьабуслан аьркинну Европанава жучIаннагу тайннал чапалсса аьдатру най душивруя.
Ризван Аьлиев:
— Чачаннал бакIчи цалва миллат гьаз бан ччисса ва хъун бан ччисса инсан ур. Яруссаннал ва даргиял чиваркIуннал, табасараннал къадуцларчагума, лакрал арамтуран бучIир кIилчинми хъами дуцлан. Миллат яшаву мурадрай. Так му зат бувчIусса хъамигу нясив хьурча. Ласнал хьхьичI ккуру бихьлай, никирттайн багьлай, лергъ тIий бур лакку хъами ялун щарсса мадуцара тIий миннатру буллай. Кувгу кIилчинмур щарссания гьим дуннихха, личIи хьунну тIий тарс бацIай. ЦIукъавххуну дурцуну нажагь ашкара хьурчагу, кIийн-гилун ххяхлахиссар, ттул ялун щар дуцин, на ссал оьккиссара, кьадарссара тIий. Хъаннил психология мукунсса дур. ОьрчIру чIявуссаксса тухумгу цIакь хъанахъиссар. Ва ялагу. КьюлтIну хъанничIан лас занай ушаву кьамулсса бур, заназу, так ялун личин мабара тIий. Бунагьралун агьлагьисса лас ххассал уван кIанай, бунагьру буллан кабакьу буллалисса.
Аьбидат ХIусманова, хIакин:
— КIира щарсса дуцаврия гъалгъатIун бигьар, хIатта кIирагу, шаннагу ядансса даражалий ухьурчагу. Микку хъаннинни захIматсса. Ласнал цамургу щарсса дурцусса хъами циняв аьзаврай бур, хъинну нажагь бухьунссар дуцаврия рязисса. Миннахь цIуххара, цири зун кьурчIи бизлазимур, куну. Зун минналмур дардгу дурчIинтIиссар. ЗахIматсса масъалари куну кьабитан шайсса масъала бакъар, на муттаэра.
ЩайхахIмад ХIажихIусайнов, имам:
— Аллагьнал измулияр ларайссагу, хьхьичIунссагу закон къадикIайссар, ттулмур пикригу миннуяр ккалли бансса бухрав. Дуцин бучIиссар, амма аьдилшиву дикIан аьркинссар гьарца чулуха, адамина хIадурну икIан аьркинссар тIайлану къуццу тIун, му шанмурцIулул цавагу мурцIний къия къахьун. Ишру личIи-личIину багьайхха, масалдаран, дяъвилул чIумал чиваркI чIявусса литIай, ягу оьрчI бакъасса щарссания личIи хъанан бикIай. Хъамитайпалун личIи хьуну цанма цуппалунияр ласнал хъаралу къахъиннив? Ттун къабувчIай ласнал кIилчинмур щарссагу дуцинна учирча, гьуя-гьарай тIисса, хIатта ахьния ххяххан хIадурсса хъами. Мукунма къабувчIай ласру кьюлтIну аьшначIан занай бушиву кьамулми, яъни бунагьрацIун бакьлакьими.
Аьбдулаьзиз Кьурбанов, предприятиялул хъунама:
— Москавуллал хъунама муфтий Илдар Аляуттинов ия цакьнива, шариаьтрал бучIи дуллайгу бухьукун, кIира ва ххишаласса хъами дуцаву ялу-ялун цIакь хъанай дур, мукунсса кулпатру чIяву хъанай бур тIий. Аьрасатнаву чиваркIуннаяр хъами чIявусса бухьувкун, бусурман агьалинан мукунсса ташурдая заралнияр хайр бикIанссар. ЧIявусса жагьилтал хIанттихун, наркотикирттахун, зунарахун багьну бур. Щинни душру щар хьунтIисса, цIуллу-цIакьсса чиваркI бакъаний? Циванни ташу баву оьккишивуну дикIан аьркинсса? Оьккишивур зуна баву, буцинна тIий хъяврингу бувну душ кьабитаву, ягу оьрчI лиян бан духтурначIан хъамитайпа гьан буваву. Щар дуцавриву оьккишиву дикIан къабюхъайссар, гьай-гьай, кIилчинмур дуцайхту цалчинмуних къулагъас чан хьун ритан къабучIиссар. Ялунгума хIурматрайсса, ччаврийсса арардур дикIан аьркинсса.
Асият МухIуттинова, кондитер:
— Ласнал цамургу щар дуцин ччай ушиву бувчIайхту, на, жулва оьрчIахгу ччаву дикIан, ттущала дусшиву дусса хъамитайпа буца учав, бувцунни. Ца ттунма ва Аллагьнанни кIулсса ттул зумату рязийсса махъру цукун бувкссарив. Амма адамина хIинчурай, алхъандалий ахIингу, айгьингу къашайссар, мунан щар дуцин ччан бикIарча. АвхIуну утарчагума чаран лякъинтIиссар мунал. Мунияту мукунмур чIумал бан личIаймур цар бусса – ссавур дуван, кьамул дуван. Аькьлулий къуццу буван. Иттав ххяхлахимур къачIалан яру бахIин.
Сулайман Мудунов, программист:
— Агь, ина цIуллу бивуй, муксса ххуйсса суал буллалисса! Ччянива чIунни ниттихъан ливну нанисса цалва душру бакIрай бацIан буваншиврул, ми щарну буцин ччиминнайн тIайлабацIаннав тIисса дуаьрду дуллан. КIилчинмурда, шамилчинмурда, личIишиву цир, цичIар чан къахьунтIиссар царагу щарссанин. Ттул пикрилий, хъаннил мяърипат, миннал ас-ламус ябансса ххуллур. Ласнал хъаралумунил иш личIиссар, мунил заллу уссар. Заллухъру бакъашиврулли ттукку лиллалиссагу. Зувира-мукьцIалла шинавусса душру бур диссертациярду дуручлай, фирмардай каялувшивуртту дуллай, аьрш-куршлил заллухъру цивппа ххай. Щарду хьун къаччай. ЩилчIав биялалий ссан аьркинссар тIий, ттунма ччикун буссара тIий. ТачIав цукунчIав аьй къаданна я шанна-мукьра щарсса дурцунай, я кIилчин-шамилчин щар хьумуний.
Сиянат Исяева, студентка:
— Гьич къарязийра. Ттул адаминарав ттучIа икIу, акъаравгу – насу вила ххуллийх чун гьан ччай уссарав. Шариаьтри, исламри, бучIиссар тIисса варсагърувагу къачча, цукунчIавсса хIуччардалгу ттул пикри баххана къабантIиссар. Ва ттулмур тарапри. Адамина чил хьуву ушиву кIулну ттун шаний шану бияйссарив. Му хьунни хавар.
Рамазан Муслимов, адвокат:
— Кулпатраву нахIушивугу ядан хьуншиврий, оьрчIангу оьлу къабизаншиврий дакI дарцIуну ухьурча – дуца цамургу, ихтиярди. Амма оьрчIан сси-къащи хьусса кIанттурду тикрал шай. Ттул пикрилий, общество, жямат бувар ттигу багьайкун чантI учин. Бувар мукунсса закон цIакь дуваву кьамул хьунсса кIанттайн биян. ХIакъи-хIисавртту чIярусса дур. Бусурман билаятирттай мукунсса закон цIакь даврия хайрди бикIантIисса, ттул пикрилий. Гьар хъамитайпалул зумувсса суал бикIай, ттуятурив дайдихьу дуван аьркинсса тIутIисса. Ва ялагу. ХIакинтурал ва статистикалул мяйжан бувсса зат бур, арамтал арамталну личIавугу нигь рутлатисса тагьарданий душиву, чIявусса чиваркI ччянива хьхьара хъанай бушиву. Ссайн гьим дуллалиссарив бувчIунуккархха. Му кIану хIисавравун лавсунгу къулайшинна хьунссия цIуллусса чувнан кIира-шанна щарсса дуцинсса ихтияр закондалийну цIакь дуварча.
ЦIувххуссар
ПатIимат Рамазановал
