ЦIуссалакрал райондалий ларгунни нязаннив дунияллия лавгсса ДР-лул Халкьуннал кIулшивуртту дулаврил отличник, учитель Тажуттин Сайпуллаев дакIнийн утлатисса куклу атлетикалул спартакиада. Райондалул школардал дуклаки оьрчIал дянивсса спартакиадалул сакиншинначитал хьунни ЦIуссалакрал райондалул кIулшивуртту дулаврил управление ва мюрщи жагьилтурал спортрал школа.
Аьрасатнал гимнрахун, билаятрал ттугъ гьаз бувну, шадлугърал даражалий спартакиада тIиртIуну махъ, спортсментал барча буллалисса ихтилат бунни райондалул КIулшивуртту дулаврил управлениялул методикалул кабинетрал хъунама Гьарун Кьадировлул. Хъирив ихтилат бувсса Чапаевкаллал 1-мур школалул директор Зайнулаьбид Оьмаровлул бувсунни 1999 шиналсса дяъвилул иширттаву оьрмулуцIа хьусса хIакьсса педагог ва ххаллилсса инсан, Чапаевкаллал 1-мур школалий физкультуралул дарсру дихьлай ивкIсса Тажуттин Сайпуллаев дакIнийн утлатисса ва спартакиада аьдатравун дагьну душиву. Тажуттин Сайпуллаев дакIнийн утлатисса ихтилат бунни чIярусса шиннардий мунащал зий ивкIсса ЦIуссалакрал 1-мур школалул учитель Сулайман ХIамидовлул.
— Тажуттин ия дакI хъинсса, яхI-къирият дусса адамина, аякьа дусса лас ва ххаллилсса ппу, — увкунни цилва ихтилатраву ванал кулпат СалихIатлул. Щалвагу кулпатрал, гъан-маччаминнал цIанияту ванил барчаллагь увкунни Тажуттин дакIнийсса ва хIакьину му дакIнийн утан бувкIсса цинявннахь.
Спартакиадалий хьунни 100 метралийх лечаврил, лахъишиврий тIанкI учаврил, диск личаврил, кроссрал ва м.ц. бяст-ччаллу.
Ва кьини укунмасса бяст-ччал хьунни цIусса миналийгу. Микку гьуртту хьунни цIуминалийсса цинявппа школардал дуклаки оьрчIру. Бяст-ччал тIитIлай ихтилат бувсса ЦIуссалакрал райондалул КIулшивуртту дулаврил управлениялул хъунаманал хъиривчу ХIамид Нахаевлул бувсунни Тажуттиннул учительнал даврий бивхьусса захIматрая. Ххаллилсса учитель дакIнийн утлатисса ихтилатру бунни ОьрчIал ва мюрщи жагьилтурал спортрал школалул директор Сергей Алимовлул, мунал хъиривчу, спартакиадалул хъунама судья АбутIалиб Аминовлул, «Единая Россия» партиялул исполкомрал каялувчи МахIаммадшяпи Сулаймановлул. Бяст-ччаллал хIасиллу дурну, ххув хьуминнан ва хьхьичIунсса кIанттурду бувгьуминнан ЦIуссалакрал райондалул кIулшивуртту дулаврил управлениялул ва мюрщи жагьилтурал спортрал школалул чулуха дуллунни дипломру ва ХIурматрал грамотартту.
