Ххувшаврил ттугълил липI-липI жунма ххал хьуншиврул, чIявусса арамтурал жанну кьурван дурссар. Ххувшаву ларсун бувкIминнал хъунмасса захIмат бивхьуссар эяллайн дурк­сса Ватан ччаннай дацIан дуван. ХIакьину ттун кIицI дуван ччива, дяъвилуву дурсса чувшивурттащал, махъсса оьрмулийгу эбрат ласунну зий бивкIсса, ЧIяйннал шяравасса, дяъвилул 2 гьурттучинал цIарду.

ХIажимурад ХIусайнов
ХIусайнов АбутIалиб ХIусайннул арс увну ур майрал 3-нний 1919-ку шинал Ккуллал райондалийсса ЧIяйннал шяраву. Ванал нину-ппу дахху-ласулул инсантал бивкIун бур. АбутIалиблул бу­ттал шяраву къуртал бувну бур 5 класс. Гания махъ дуккаву циван кьадиртун диркIссарив кIулну бакъар. 1938-ку шинал АбутIалиб аьралуннаву къуллугъ буллан увцуну ур. Гьуртту хьуну ур Финнащалсса дяъвилувух. Дяъви къуртал шайхту шавайн итаавкьуну, зий ивкIун ур ЧIяйннал ЯтIул партизан колхозраву.
1941-ку шинал, дяъви байбишайхту, увцуну ур дяъвилийн. Хьуну ур ваная, курсру бувккуну, пулеметчик. Гьуртту хьуну ур чIярусса талатавурттавух. АбутIалиб талай ивкIун ур 2-мур Украиннал фронтрай, 147-мур битултрал полкраву хъунама пулеметчикну. ИвкIун ур 425-мур битултрал полкраву пулеметир­ттал отделениялул командирну, старшинанал чиндалуву. 1945-ку шинал сентябрьдания май зуруйн ияннин къуллугъ буллай ивкIун ур Берлиннал аьралий комендатуралул отделениялул командирну. Дяъвилий ванал канийн ва бакIрайн дирну дур щавурду.
АбутIалиб лайкь хьуну ур «Красной звезды», «Отечественной войны» орденнан, «За Победу над Германией», «За Победу над Финами» ва цаймигу медаллан.
Дяъвилия зана шайхту зий ивкIун ур ЧIяйннал колхозраву.1952-ку шинал, кулпат бувну махъ, лавгун ур Узбакисттаннал Сурхандарьяллал областьрайсса Байсун тIисса шагьрулийн. Ганияр махъ ЧIяйннал шяравун зана къавхьуну ур. Ванал усса ур шама арс ва ца душ. Байсун тIисса шагьрулий ахиратравун лавгун, тийха ув­ччуну усса ур.
Шиккува ххибуван ччива АбутIалиблул уссил ЯхIиял арснал – Ккуллал райондалул КIулшиву дулаврил управлениялул зузала ХIусайнов Юсуплул цала буттауссия бувсмур:
— Хаварду бикIай, дяъви къуртал хьуну махъ, ттул буттауссу Узбакисттаннайн яхъанан лагайхту, Ккуллал райондалийн ва СССР-данул Виричу хьусса ЦIуку бувкIун бивкIссар тIисса. Яла га ЦIуку, «ЖучIа мукунсса инсан яхъанай акъар», — тIий, махъунмай тIайла бувккун бивкIссар тIар. Бутта буслан икIайва дяъви байбишин хьхьичIсса гьантрай ций Кураллавун маэшатрай лавгун бунува, тикку ца шяравун дукансса зат дула учин цува лавгун унува, цала уссу АбутIалиб балчаннучIа кьаивтссия тIий. Цува учIаннин уссу акъая, амма балчан бия тIива. Иширах бургарча, Ккуллал райондалия дяъвилийн къаувцусса ттул бу­ттауссил цIа бюхъай дяйркьуну, фамилия даххана хьуну дикIан. Амма ттул буттауссил арс ЧIяв увкIсса чIумал «Жул къатрал чIирай, Узбакисттаннаву, ттул бутта Виричу ушиврул цIа чирчусса ула лачIун дурну дуссар», — тIун икIайва тIар. ЦикIулли, оьрмулуву чIявусса «ссигъри» шайхха.
Сулайманов Кьурбан­ма­хIамма Адал арс увну ур майрал 15-нний 1920-ку шинал ЧIяйннал шяраву сянаткарнал, дувссилул усттарнал кулпатраву.1939-ку шинал школа къуртал бувайхту, увцуну ур аьралуннаву къуллугъ буллан. Къуллугъ буллай унува байбивхьуну бур дяъви. КьурбанмахIамма гьуртту хьуну ур Москав тархъан буллай бивкIсса талатавривух, 19-мур артиллериялул полкраву старшинанал чиндалуву. Гьуртту хьуну ур Курскаллал, Ореллал лагмасса талатавурттавух. Берлин ласласинийгу ивкIун ур КьурбанмахIамма. Германнащалсса дяъви къуртал шайхту, ва къуллугъ буллалисса аьрал бивчуну бур Архмур Кьиблалийн Японнащал талан. Ва талай ивкIун ур Манчжуриянаву, Бикин тIисса шагьрулул лагма. Дирну дур ванайн щавурду, хьуну ур цимилагу къагъ. 1947-ку шинал зана хьуну ур буттал шяравун ЧIяв.
Дяъвилия учIайхту ванал къуртал бувну бур бухгалтертал шайсса школа. Зий ивкIун ур Ваччавсса банкрал бухгалтерну, ЧIяйннал шяраваллил советрал секретарьну, колхозрал учетчикну, гъаттарал пирмалул бакIчину ва цаймигу колхозравусса къуллугъирттай.
КьурбанмахIаммалул дур «Орден Отечественной войны», медальлу «За Победу над Германией», «За Победу над Японией» ва цаймигу. КьурбанмахIамма гьуртту шайссия ЧIяйннал жяматийсса циняв иширттавух. Ва жуятува личIи хьуну ур 2002-ку шинал.
Вайннал цIарду жунна тачIав хъамакъадитантIиссар, къабучIиссар ми хъамадитала дуван. КIунтIая нех шайсса кунна, ца-ца талаталал хIарачатрайну ларсъссар ва Ххувшаву.