Гьарцагу шинал жулла рес­публикалий июньдалул 1-нний лахъа-хъунну хьунадакьай щаллагу дунияллий кIицI лагайсса ОьрчIру буруччаврил кьини. Му Кьини дикIу, ци Кьини, ци байран дунугу, оьрчIансса шадлугъирттавух хьхьичIунсса гьурттушинна дувай Дагъус­ттаннал паччахIлугърал ссихьрал театрданул коллективралгу.

Ва ххуллухмур ОьрчIру буруччаврил кьинилийннин багьайсса куццуй хIадур хьуну, Ссихьрал театрданул мюрщими тамашачитуран ва миннал нитти-буттан хIадур дурну дур хъуннасса представление. Мунивух гьуртту хьунтIиссар клоунтал, театрданул спектакльлава­сса персонажру, мунил лагрулуву хьун тIий дур чIярусса конкурсру, дуллан тIий бур бахшишру, бикIан тIий бур хъинну чIявусса музыка ва къавтIавуртту.
Му бакъассагу, тарихраву цалчинна цалчин, хIадур дурну дур хъуннасса Гала-концерт, мунивух гьуртту хьун най бур оьрчIал театрдал студиярттал, ссихьрал ва драмалул кружокирдал Республикалул фестивальданий, назмурду дуккаврил Республикалул конкурсрай ххув хьуми, мукунма МахIачкъалаллал оьрчIал 8-мур школа-искусствалул тарбиячитал.
1-мур июньдалийсса вай шадлугъру хьун най дур Театрданул хьхьичIсса М. Ярагъскийл кIичIираваллил чулухмур майданналий. Му программалийнугу оьрчIансса бахшишру къуртал хъанай дакъар. Муния махъ кка­ккан буван тIий бур ихIсаниятрал спектакль – «Тайна персиковой косточки» Ш. Маллаевал пьесалийн бувну бивхьусса. Ва спектакль хъанай бур дунияллул даражалийсса цикссагу фестиваллал ва конкурсирдал лауреат.
Мюрщисса тамашачитуран­сса ва кьинисса бахшишру цаймигу чIярур.
Вай шадлугъру (украсса) дайдихьлахьиссар ссят 11-нний.

Бадрижамал Аьлиева