ОЬМАРДУЛ АРС АЬЛИ ОЬМАРОВ
Майрал 9-нний Буттал КIанттул цIанийсса Хъунмасса дяъвилуву хьув хьуну 70 шин шаврил байрангу, оьрмулул 90 шинал юбилейгу узданну цалва кулпатращал, оьрчIащал, миннал наслулущал, чIявусса хъамаллуращал хьунадаркьуну, дакIний-мазраймур бувсун махъ аьпалувух ивхьунни Ккуллал жяматраву хъунмасса хIурматрай яхъанай ивкIсса хъуначу Оьмардул арс Оьмаров Аьли.
Ккуллал шярава дяъвилуву гьуртту хьусса 428 талаталава махъа-махъсса ца Аьли уссия ливчIун жул шяраву.
Аьли увну ур 1925 шинал Ккуллал шяраву Оьмардул ва АтIал кулпатраву. Дяъвилул шиннардийсса гьантри личIаннин, Аьлил щалва оьрму лавгун бур Ккуллал шяраву. Интту 1944 шинал, 19 шинаву, Аьли хушрай лавгун ур дяъвилийн. Шофертурал школа къуртал бувну махъ, Ираннава фронтрайн автомашинартту биян буллай ивкIун ур. Гьуртту хьуну ур Полшанаву Врацлав тIисса шагьру душманнаща мурахас буллалисса талатавурттавух. Дяъвилия зана хьуну махъ пенсиялийн укканнин зий ивкIун ур школалий. Аьли ия учитель универсал. Ва дихьлай ивкIссар тарихрал, математикалул, черчениялул, обществоведениялул, автоделолул дарсру. Ва ия щалва Дагъусттаннайх цIа ларгсса краевед. 1974-1987-ку шиннардий Аьли Оьмарович Ккуллал 1-мур школалул директорну усса чIумал, ва школа Дагъусттаннайсса яла хьхьичIунми школардавух бивкIссар. Ванащал зий бивкIсса гьалмахтурал, ванал дарс дирхьусса чIявусса оьрчIал хъунмасса хIурматрай ябантIиссар ванал лахьхьин бувмур, мудан дакIний дикIантIиссар ванал дурсса хъинсса давурттив.
Аьлил цалва кулпатращал Муъминатлущал хъуни бувну, дуккин бувну, оьрмулул ххуллийн буккан бувссар 3 арс ва 3 душ. Вайннал цала буттащал Ккуллал шяраваллил тарихраву хъунмасса кIану бугьлай буссар.
Жу, Ккуллал жямат, шяравусса кIивагу школалул коллективрду, кьурчIишиву кIидачIлай буру Аьлил арсурвавращал, душваращал, гъан-маччанащал. Аьлил бунагьирттал аьпа баннав, рухI хъинний дишиннав. Ванан къабуллумур махънан булуннав. Амин.
Ккуллал жямат
——————————-
МУХIАДЛУЛ АРС АЬВДУРАЗАКЬ ЧУПАЛОВ
Вай гьантрай, оьрмулул 84 шинаву, аьпалухьхьун лавгунни Ккурккуллал шяравасса МухIадлул арс Аьвдуразакь Чупалов.
Увну ур Аьвдуразакь 1930 шинал Ккурккуллал шяраву. Цалва оьрмулул чIяруми шинну ванал Лакрал райондалул ххуллул участокрай зий гьан дурну дур. Давриву низам ччисса, цайнма тапшур бувмур дакI марцIну бартбигьайсса, жаваблувсса Аьвдуразакь бусравну ивкIун ур ххуллул службалул хъуниминначIагу, архIал зузиминначIагу. ХьхьичIунсса зузала хIисаврай ва цимилагу лайкь хьуну ур райондалул ва республикалул чулухасса ХIурматрал грамотарттан ва цаймигу бахшиширттан.
Аьчухсса, аьмал-хIал бавкьусса Аьвдуразакьлул хIурмат бия шяраваллил жяматрачIагу. Ххюва цалвами оьрчIругу хъунигу бувну, цалва-цалва оьрмулул ххуллийн бивчуну, оьрчIал оьрчIру тарбия бавривугу хъуннасса гьурттушинна дайва Аьвдуразакьлул. Аьвдуразакь ия тачIав щищалкIуй лахъсса чIуний ихтилат къабувсса, хъярч-махсара ххирасса адамина.
Ва аьпалухьхьун лагаврил кьурчIишиву кIидачIлай буру кулпатращал, ссищал, оьрчIащал, махъсса гъан-маччанащал. Имандалий лавгун лякъиннав, рухI хъинний дишиннав, алжаннул ххари аннав.
Ккурккуллал жямат
————————————-
МИРЗАЛ АРС КЬУРБАН КьУБИЕВ
Апрель зурул 30-нний нязаннив дунияллия лавгунни Ккуллал райондалул азарханалул хъунама хIакин,уздансса агьлу-авладрал арс Кьубиев Кьурбан Мирзаевич.
Кьурбан увну ур 1964-ку шинал ноябрь зурул 23-нний Ккуллал шяраву.1982-ку шинал шиккува школагу къуртал бувну, увххун ур Дагъусттаннал медициналул академиялувун.1985-1987-ку шиннардий институтрава увцуну, аьралуннаву къуллугъ буллай ивкIун ур. Мунияр махъ институтравусса дуккавугу къуртал дурну, зун ивкIун ур Ккуллал азарханалий хIакин-эпидемиологну. Цалла даву ххуйну кIулсса, бюхъу-бажар бусса пишакар Кьурбан Мирзаевич 2007-ку шинал ивтун ур азарханалул хъунама хIакиннал хъиривчуну. Микку зий унува каялувшиву дуллай ивкIун ур Ккуллал райондалийсса «Макс-М» тIисса страховой компаниялул филиалданул отделданий. 2013-ку шинал сентябрь зуруй Кьурбан ивтун ур Ккуллал азарханалул хъунама хIакинну.
Кьурбан Мирзаевич ия давриву дакI дирхьусса, цаярасса тIалавшинна хъуннасса, жаваблувсса каялувчи. Цалва бакIрайн лавсмур ванал мудангу дакI марцIну бартбигьайва.
Кьурбан Мирзаевичлул бюхъу-бажар хъиннува ялун ливчунни азарханалул хъунама хIакиннал къуллугърай авцIусса ч1умал. ЧIирисса чIумул мутталий ванал цачIун бувна ххуйсса зузалтрал коллектив, дакьин дурну, чIюлу дурна азарханалул хIаят ва лагма-ялттусса кIанттурду, ххуй дурна азарханалийсса шартIру.
Аьчухсса, дакI-аьмал хъинсса, инсаншиврул ва узданшиврул бутIа буллусса Кьурбан Мирзаевичлул хIурмат хъунмасса бия азарханалул зузалтрачIа. Ми давриву ва гьарица ишираву ванал чIарав ххуйну бацIайва. Ххирасса ия Кьурбан шяраваллил жяматрангу.
Бусравсса хIакин ва ххаллилсса каялувчи Кьурбан Мирзаевич оьрмулул аргъираву аьпалухьхьун лагаврил кьурчIишиву кIидачIлай, жижара буллай буру ванал кулпатрахь, оьрчIахь, уссурссуннахь, махъсса гъан-маччанахь. Цув алжаннул ххари аннав, рухI хъинний дишиннав, ванан къабуллусса оьрму оьрчIан ва гъан-маччанан булуннав.
———————————
МАХIАММАДЛУЛ АРС ИБРАГЬИН МАНСУРОВ
Уттигъанну май зурул, 9-нний, Москавлий, мадара хIаллай къашавайгу ивкIун, оьрмулул 67 шинаву дунияллия лавгунни ГьунчIукьатIатусса Мансуров МахIаммадлул арс Ибрагьин.
Ибрагьин увну ур 1948 шинал МахIачкъалалий аьраличунал кулпатраву.
1951 шинал вайннал кулпат бивзун бур Краснодар шагьрулийн. 1955 шинал Ибрагьин дуклан увххун ур Краснодардал 48-мур дянивмур даражалул школалийн. Школагу ххуйну къуртал бувну, 1967 шинал увххун ур Москавуллал гидромелиоративный институтравун. Му къуртал бувну махъ зун увххун ур Москавлий Тимирязевлул цIанийсса академиялувун. Пенсиялийн укканнин ва академиялуву гиодезиялул лекциярду ккалай, дарс дихьлай ивкIун ур. Цува зузисса даврий Ибрагьиннул лавайсса хIурмат бивкIун бур. Ва ия цума-цаннащалгу хIал бавкьусса, хъунанал хIурмат бусса инсан, цалва пиша лавайну кIулсса, грамотныйсса учитель. Ва студентътурангу хъинну ххирану ия. Ибрагьиннул щалва оьрму Москавлий лавгун бур. Ванал цалва оьрмулул дус Маргаритащал 2 арс хъуни увну ур.
Ибрагьиннул бивкIулул кьурчIишиву кIидачIлай, жижара буллай буру ванал ссурваврахь, ссурахъаврахь, цинявппагу гъан-маччаминнахь.
Цал бунагьирттал аьпа баннав, рухI хъинний дишиннав. Ванан бакъамур оьрчIан, ссурвавран булуннав.
ГьунчIукьатIрал жямат
——————————————
Жулва даврил уртакь, хIурмат бусса АьбдурахIманова Залму ТIалхIатлул душнихь, ванил цинявппагу уссурссуннахь, гъанчунахь кьурчIишивугу кIидачIлай, жижара буллай буру Залмул буттал нину
ПатIимат
аьпалувух дишаврийн бувну. Цил гьав нурданул дуцIиннав, пирдавс алжан нясив баннав. Ванил цIа, барачат махъ ливчIун лякъиннав. Ванилциригу оьрмурдая щакъаливххун цучIав дунияллия къагьаннав. Амин!
«Илчи» кказитрал зузалт
