Майрал 8-нний лавгссияв къутандалийсса Кьубиял Ттурзийннал шяравун. Гикку уссар ялапар хъанай ттула уссу – захIматрал ветеран. Му цувалу къаитан лавгссияв.

Хъунмур байран кIицI ларгун дия хьхьичIмур кьинира Берцинаев МахIаммадлул гьайкалданучIа. Гьайкал дацIан дурну дуссар учкъулалул хIаятраву, учкъулалунгу дуссар дирзун мунал цIа. МахIаммадлул ппу Исмяил Берцинаевгу хушрай дяъвилийн лавгминнаяссар, хъунама лейтенантнал чиндалуву шавайн увкIссия. Цаппара шиннардил хьхьичI аьпалу­хьхьун лавгунни.
Му пашманссагу, ххариссагу кьинилул мажлисрайн бувкIун бия виричунал гъан-маччами, дук­лаки оьрчIру, нитти-буттахъул. Мажлис бачин бувну ия ДР-лул лайкь хьусса муаьллим, учкъулалул директор Залимхан МахIаммадов.
Майрал 8-мур кьини къутандалийсса ветерантал барча буллай, къатравух занай бия шяраваллил бакI дургьуми. Майрал 9-нний, ссят 13-нний, мажлисру бай залданувун бавтIуна шяраваллил жямат. ЦIу буну янна-кагу ларххун, бувкIуна ветерантал. Залдануву щябивкIминнаву бия аьрай бат хьусса Садикьов ХIажинал душ Раисат; аьрая увкIун махъ колхозраву личIи-личIисса давурттай зий ивкIсса МахIаммадов МахIаммадал арс Залимхан; фронтовик Аьвдулхаликьов Бадруттиннул душ БатIи; Шапаршаев Базихълул оьрчI, душ – МухIаммадрасул, Ххамис; Кьадиев Аьлил арс Наби.
Байрандалийн бувкIун бия шяраваллил хъунама Исупов Заурбекгу, цIуну ивтсса культуралул къатлул хъунама АхIмадов МахIаммадгу.
Учкъул оьрчIругу хIалану, мажлисрай ккаккан дуруна авадансса литературалул ва музыкалул программа.
Дяъвилул шинну, аьрай талай бивкIми, къинттуллух захIмат буллай бивкIми дакIнийн бичлачисса ва хIакьинусса кьинилул масъалартту гьаз буллалисса ххуй-ххуйсса ихтилатру бувна: МахIаммадов МухIадлул, Мусаева СалихIатлул, Биргьузова БатIил. Аьщуй-ххуттай авцIусса, шяраваллил тарих кIицI буллалисса гьарза-гьартасса махъ лавхъуна шяраваллил хъуначу Оьмаханнул.
Оь. Вагьабов,
ш. Кьуби-Ттурзи