ИЛДАР ва ЗАГЬИДАТ
Апрель зурул 28-нний леххаврил хавар бавунни Къизлардая. Дунияллийн инт дуркIун, гъили дагьну, уртту-тIутIив ххяхлахисса гьантрай, чIун дакъасса бивкIулул жагьилсса, дахьва август зуруй ларгсса шинал хъатIи бувсса Илдар ва Загьидат жуятува личIи шаврил хавар.
Илдар зий уссия Къизлардай муххал ххуллий, Загьидат, Орджоникидзелий институтгу ЯтIул дипломрай къуртал бувну, зий буссия гиккува, 1-мур школданий учительницану. Илдардун дия 27 шин, Загьидатлун – 24. КIивагу Къяннал шяраватуссар. Яхъанай буссия Рыбалка тIисса шяраву. КIивагу гьарца кьини архIал бачайва даврийн, ахттакьунмай — шаппайн.
Га лухIи кьини, шаппайн най бунува, машиналун авария хьуну, кIивагу цалархIал батIул хьуссар жуятува. Лякьлуву буссия 4-5 зурухсса оьрчIгу. Вайннащал ивкIссар шагьрулия шавайн най ивкIсса Илдардул дусгу.
Ва кьурчIисса бивкIулул къявхъа тIутIи дунни цинявннал дакIру, зума тIутIи бунни циняв инсантал.
Илдардул ва Загьидатлул рухIру алжаннул ххари даннав, гьав нурданул дуцIиннав тIий, жижара буллай буру ниттихъахь — Абризатлухь ва Зояхь, буттахъахь — Батталлухь ва Фрунзехь, уссурссуннахь ва махъсса цинявппагу гъан-маччанахь.
Ва захIматсса кьадар бухIансса ссавур дулуннав зухьхьун хъунасса Заннал!
Къяннал ва Рыбалкаллал
жямат
Ниттихъал дакIнивасса махъру
Жул ххира чаннацIурттий,
Дадахъал ххазинарттув,
Зу ци цIарал ччувччуру,
Ччяни бакъа хьуннухха.
Къявхъа тIий бур жул яру,
Къадагъа дан къахъанай,
Ва макIрив ягу кIихьрив,
МакIну къалякъинххурав!
Лякьлуву бивкI чIиви оьрчI
Хьурдай аьпалун личIан,
Къявхъа тIисса жул яру
Паракьат шайрив ккаккан!..
————————————
ХIАММАДАЛ АРС КУРАЕВ МАХIАММАДГЪАЗИ
Май зурул 12-нний, чан-кьансса хIаллай къашавайгу ивкIун, оьрмулул 81 шинаву жуятува личIи хьунни ХIаммадал арс ххаллилсса лаккучув Кураев МахIаммадгъази. МахIаммадгъази увну ур 1934 шинал ЧукIуннал шяраву.
Оьрмулул чIивину уна МахIаммадгъази нину-ппу бакъа ливчIун, ЧукIуннал дянивмур даражалул школалийгу дуклай унува, захIмат буллай ивкIун ур колхозрал личIи-личIисса давурттай, колхозрал председательнал кумагчинайн иянцIакул.
Мунияр махъ МахIачкъалалив ивзун, зий ивкIун ур «Дагнефтьрай» механикну, яла шупирну автобусирдал паркраву, яла махъ домоуправлениялий инженерну пенсиялийн укканнин.
Чув зий ивкIхьурчагу, гьарца кIанай ЧукIуннал жяматран ваная хъинмур бакъа цамур къабаяйва. ХьхьичIунсса зузала хIисаврай ванал даврин лавайсса кьиматгу бивщуну, мадарасса бахшишругу дуллуну дур: хIурматрал грамотартту, арцуйнусса бахшишру, барчаллагьру, ва «ЗахIматрал ветеран» цIа.
Шагьрулий унугу, гьарца шинах МахIаммадгъази буттал шяравун, ияйва, колхозрал давурттугу цукун най дурив, ци кумаг аьркинну бурив ккаккан.
ИчIувагу ва ия хъинну хIал бавкьусса кулпат Калиматлущал ва оьрчIащал.
МахIаммадгъази аьпалухьхьун лагаврил кьурчIишиву кIидачIлай, дакIнийхтунусса жижара буллай буру ванал кулпатрахь, оьрчIахь ва цинявппагу гъан-маччанахь.
Цал бунагьирттал аьпа баннав, рухI рахIатний дишиннав, ванал махъ ливчIсса авладрал оьрмурдайгу барачат бишиннав.
ЧукIуннал цIанияту
Арбухан МахIаммадов
———————————————-
КЬУРАМАХIАММАДЛУЛ АРС ГЪАПУРОВ МАХIАММАД
Оьрмулул 94 шинаву, Ххувшаврил 70 шин хьусса кьини хьунадакьин къаивтун, дунияллия лавгунни Буттал КIанттул цIанийсса Хъунмасса дяъвилул гьурттучи, Ххюлуссуннал шяравасса КьурамахIаммадлул арс Гъапуров МахIаммад.
МахIаммад 1921-кусса шинал увну ур Ххюлусмав. Буттал шяраву 7 классгу къуртал бувну, дуклай ивкIун ур Гъумучиял педучилищалуву. Муния махъ дуклан увххун ур Буйнакскаллал финансирттал техникумравун. 1942 шинал увцуну ур армиялийн. Сухумрайсса бахьттагьалтрал училищагу къуртал бувну, лейтенантнал чингу ларсун, тIайла увккун ур фронтрайн. Дяъвилий кIусса щаву дирну, агьну ур госпитальданийн, хъин хъанай ивкIун ур Цхинвал шагьрулий. 1943 шинал ахирданий кIилчинсса щаву дирну, шавай зана увну ур. Муния махъ Гъапуров зий уссия ЦIуссалакрал район сакин дуллалисса шиннардий райком комсомолданул секретарьну, финотделданул хъунаманал хъиривчуну. МахIаммадлул чIярусса шинну дурссар Гъумук зий. Партшколагу бувккуну, зий ивкIссар райкомрал ва райисполкомрал жаваблувсса къуллугъирттай. Кьураксса шинну хьуссар МахIаммадлул МахIачкъалалив ПМК «Дагколхозстрой» организациялул кадрардал отделданул хъунаману ва миккува партийный организациялул секретарьнугу зий ивкIссар. Чув зий унугу, ванал хъунмасса захIмат бивхьуссар инсантурал даража гьаз бан, багьу-бизу лавай бан. Хъунмасса хIурмат бикIайва райондалул хъуниминналгу ва лагмасса зузалтралгу. МахIаммад КьурамахIаммадович ия дяъвилул ва захIматрал ветеран, лайкь хьуну ия орденнан, медаллан, грамотардан. МахIаммадлул бивкIулул кьурчIишиву кIидачIлай, жижара буллай буру ванал уссихь, арсурваврахь, душваврахь, щалвагу агьлу-авладрахь.
Цал гьав нурданул дуцIиннав, Алжаннул ххари аннав. Махънал оьрмурдай барачат бишиннав.
Ххюлуссуннал жямат
——————————————
ХIАСАННУЛ АРС ХIАСАНОВ ИДРИС
Хъунмасса хIаллай къашавайгу ивкIун, Хъун дяъвилий Ххувшаву ларсун 70 шин шаврил ххаришиву дуллалисса гьантрай, аьпалухьхьун лавгунни ххаллилсса лаккучу, яхI-къириятрал ва аькьлу-кIулшилул увччусса зунтталчу, щарнил жяматраву, цащала зузиминначIа ва цува кIулминначIа сийлий оьрму бувтсса, дакI-аьмал хIалимсса, къатлулгу, кулпатралгу, оьрчIалгу дакI ххари дуллай ивкIсса адамина.
Идрис увссар 1933-ку шинал Инишиял шяраву хъудугьул кулпатраву. ЧIивину унува ппугу ивкIуну, ниттин кумаг буллай зий аьдатсса Идрислул дяъвилул шиннардий хъунисса арамтурал дайсса давурттив дуллай ивкIссар. Шяраву школагу къуртал бувну, цалва аьралий бурж биттур бувну махъ, колхозрал яттил хIухчуну зий ивкIссар, пенсиялийн укканнин. Дурсса хъин-хъинсса давурттахлу Идрис лайкь хьуссар чIярусса хIурматрал грамотарттан, щарнил барчаллагьран ва бахшиширттан.
Идрислул ва мунал кулпат Аслижаннул цалвами оьрчIругу лайкьну тарбия бувну, кулпатирттал щаллу бувну, оьрчIал оьрчIру хъуни бувангу хъунмасса ка-кумаг бувссар.
Идрис ия дакI марцIсса, уздансса, дугърисса адамина. Ванал чаннасса аьпа жул дакIурдиву абадлий личIантIиссар. Цал бунагьирттал аьпа баннав, гьав нурданул дуцIиннав, алжаннул ххари аннав.
Идрислул кьурчIисса бивкIулул къумашивугу кIидачIлай, жижара буллай буру ванал кулпатрахь Аслижаннухь, оьрчIахь МахIмудлухь, душваврахь, ссихь, куявтурахь, махъсса гъан-маччанахь. Ванан бакъамур оьрму махънан булуннав, оьрмурдай барачат бишиннав.
Инишиял ва Ккуцрал жямат
—————————————
ЩАЙХАХIМАДЛУЛ АРС ЗАГЬИРОВ ЖАМАЛУТТИН
Уттигъанну, оьрмулул 80 шинаву, жуятува батIул хьунни Хъусращиял шяравасса Загьиров Жамалуттин ЩайхахIмадлул арс.
Жамалуттин увну ур Хъусращиял шяраву 1935 шинал. Буттал шяраву 7 классгу бувккуну, дянивмур даражалул кIулшиву ларсун дур Ккуллал школалий. Школа къуртал бувну махъ, Украиннай, Совет Аьралуннаву къуллугъ буллай ивкIссар. Аьралуннаву къуллугъ бувну зана хьуну махъ зий ивкIссар МахIачкъалаллал портрай.
Къуртал бувссар Дагъусттаннал ПаччахIлугърал Пединститутрал географиялул факультет. Дарс дихьлай ивкIссар МахIачкъалаллал школарттай. Мунищала архIал зузалтрал общежитиярттал тарбиячинугу ивкIссар.
1973 шинал Ростоврайсса МВД-лул Юридическая Академия заочнайну къуртал бувссар. Пенсиялийн укканнин зий уссия МВД-лул Учебный центрдануву дарс дихьлай.
Зузиссаксса мутталий Жамалуттин Загьиров цимилагу лайкь хьуну ур ХIурматрал грамотарттан, бахшиширттан, хIатта та чIумалсса МВД-лул министр Щелоковлуяссагума. Ванан дуллуну дур «Отличник милиции» тIисса ва «Ветеран органов внутренних дел» тIисса цIарду.
Цалва кулпат, бусравсса педагог, аьпа биву, Загълиева Раящал лайкьну хъуни бувссар кIия арс ва ца душ.
ДакIнийхтуну хъуннасса кьурчIишиву кIидачIлай, жижара буллай буру Жамалуттиннул уссурваврахь Рамазаннухь ва Забиуллагьлухь, ссихь Булбуллухь, арсурваврахь Станиславлухь ва Камиллухь, душнихь Беллахь, цинявппагу гъан-маччаминнахь. Махъминнал оьрмурду лахъину лякъиннав, Жамалуттиннул рухI хъинний дишиннав, алжаннул ххари аннав!
Хъусращиял жямат
