Шамилчинмур Львовскаллал къутаннайсса Кьубиял шяраваллил школалий цIакь хьуну дур хъинсса аьдат. Гьарца шинал Ххувшаврил кьинилул хьунийн шикку шайссар ва школалун цIа дирзсса, 1999 шинал август зурул 3-нний ЦIумадиял райондалийсса Агъваллал шяраву къачагътуращалсса талатавриву жан дуллусса Аьрасатнал МВД-лул 102-мур бригадалул аьрали хIакин МахIаммад Берцинаев дакIнийн утлатисса батIаву.
Микку гьуртту хьунни МахIаммад Берцинаевлул кулпат Шагьрузат, арсру, ссу Светлана, гъан-маччами, школалул учительтал ва дуклаки оьрчIру.
Шадлугъ тIитIлай, школалул директор Залимхан МахIаммадовлул бувсуна ивчIайсса лахIзалуву МахIаммад Берцинаевлул дурсса виричушиврия. КIицI лавгуна дуклаки оьрчIругу, учительталгу пахрулий бушиву цалва школа Виричунал цIанийсса бушиврия. Виричунал цIанин лайкьсса наслу тарбия бавур тIива школалул коллективрал хьхьичIсса хъунмур мурадгу.
Светланалгу кIицI лавгуна цивппа хъиннува пахрулий бушиву уссил цIанийсса школалул хьхьичIуннайшивурттая.
— Школа лайкь хьуну бур Аьрасатнал Президентнал грантран. Грантран дурххусса арцух щалва школа лащу-щаллу бувну бур компьютердал, бур ттизаманнул матахIрал дузалсса медкабинет. Зул хьхьичIуннайшивуртту – жул хьхьичIуннайшивурттур, — увкуна ванил.
Дуклаки оьрчIал бувккуна МахIаммад Берцинаевлун хас бувсса шеърирду. Ккаккан дуруна концерт. Ахирданий дуклаки оьрчIру кьамул бувуна МахIаммад Берцинаевлул цIанийсса пионертурал кьюкьлувун. Миннай галстукру бавхIуна МахIаммад Берцинаевлул гъан-маччаминнал.
