Апрельданул 30-нний Ваччиял шяраваллил школалул хIаятравусса гьайкалданул хьхьичI хьунни Ккуллал райондалия дяъвилийн лавгми дакIнин бичлачисса Аьпалул Вахта .
Гьайкалданул хьхьичI чIюлусса яннардаву, ттугъащал, вирттаврал суратирттащал бавцIуну бия райондалийсса школардал вакилтал. Аьпалул Вахталувух гьуртту хъанай бия Ккуллал райондалул бакIчинал хъиривми Хизри Мутаев ва Сабрина Илиясова,КIулшиву дулаврил управлениялул бакIчи Альбина ХIаммакуева, райондалул бакIчинал маслихIатчи ва пресс-секретарь Шамхал Хизриев, райондалул Ветерантурал советрал председатель Аьбдул Загьидиев, райондалул администрациялул Жагьилтурал ва туризмалул комитетрал бакIчи МахIаммад Чаринов, школардал директортал, завучтал, райондалул къуллугъчитал, тамашачитал.
Аьпалул Вахта тIитIлатIишиву баянгу бувну Хизриев Шамхаллул, дакIнийн бувтуна дяъви байбивхьусса лахIза. Хъирив радиолувух ттупангру битлатисса, пIякь-шякь тIисса чIурду баллали бувна. Вай чIурдал хъирив Юрий Левитаннул жуйнма немецнал фашистал ххявхшиву бусласисса баян баву дуруна. Хъирив «Вставай, страна огромная, вставай на смертный бой» балай итабавкьуна. Хизриев Шамхаллул бувсуна Ккуллал райондалия дяъвилийн лавгсса чиваркIунная, къинттуллух зий бивкIминная, къанаврдайн лавгми оьрчI-хъами, къужри дакIнин бивчуна. Яла баян бувна дяъвилий жанну кьурван дурминнан хас дурсса «Минута молчания».
Махъру лавхъуна Чаринов МахIаммадлул, Мутаев Хизрил, Загьидиев Аьбдуллул, ХIаммакуева Альбинал. Махъру буллуна гьарца школалул вакилтурахьхьунгу. Вайннал дяъвилий чувшиву дурсса чиваркIуннан хас бувсса шеърирдугу бувккуна. ТIутIал шалкри, кацIру бивхьуна гьайкалданучIа Ваччиял оьрчIал багърал ва школалул вакилтурал.
Шиккува Ваччиял школалул директор Мирзаева Бажил Ккуллал райондалул шяраваллавух бувксса Аьпалул лу ва Ттугъ тапшур бувна Ккуллал райондалул музейрал директор Абакаров ТIагьирдухьхьун.
