Социал пенсияртту ва паччахIлугърал щаллу байсса пенсияртту (пенсии по государственному пенсионному обеспечению) апрельданул 1-нния шинмай ххи буллалиссар 10,3 процентрал, гьар зурух дулайсса арцуйнусса выплатартту (ЕДВ) – 5,5 процентрал.
ХIасан Аьдилов
Гьар зурух дулайсса арцуйнусса выплатартту федерал льготниктуран (ветерантуран, инвалидтуран, радиациялул зоналий зий бивкIминнан, Совет Союзрал Вирттавран, Социалист ЗахIматрал Вирттавран ва цайминнангу) апрельданул 1-нния шиннай ххи дуллалиссар 5,5 процентрал.
10,3 процентрал апрельданий ххи буллалиссар паччахIлугърал щаллу байсса пенсиярттугу, мукунна цаймигу журалул выплатартту. ЦIана хьунтIисса индексациялул пенсиярттал щаллу баврил даража 3,7 млн. пенсионертуран лахъ буллалиссар.
ЦIанасса пенсияртту ххи баврийну дянивну лавсъсса социал пенсия хьунтIиссар 8 311 къуруш. ОьрчIан – инвалидтуран дянивну лавсъсса социал пенсия хьунтIиссар 12 371 къуруш. Дяъвилий хьусса инвалидтурал дянивну лавсъсса пенсия хьунтIиссар 29 371 къуруш. Хъун дяъвилий гьуртту хьуминнал дянивну лавсъсса пенсия хьунтIиссар 31 488 къуруш.
Гьашинусса шинал лажиндарай яла чIивимур пенсия региондалийсса пенсионернал прожиточный минимумраяр чансса къабикIантIиссар. Агана пенсионернал пенсиягу, муницIун ганал ласайсса цаймигу выплатарттугу хIисавну прожиточный минимумраяр чансса хьурча, мукунсса пенсионернан дишинтIиссар пенсиялул ялунсса доплата.
ДакIнийн бутанну, гьашину феральданул 1-нний 39 млн. пенсионертуран страховой пенсияртту ххи бувссар 11,4 процентрал, дукIумур шинал багьри лахъ шаврих бурувгун. Му ххи баврийну дянивну ласъсса страховая пенсия хьуссар билаятрай 12,9 азарда къуруш.
Гьашину августрай ххи бантIиссар зузисса пенсионертурал пенсияртту.
