Ларгсса нюжмардий Дагъусттаннал СМИ-рдал баян бунни Гъумуксса щайх Жамалуттиннул цIанийсса мадраса лавкьуссар тIий. Аьрасатнал Минюстрал Дагъусттаннал Управлениялул аьрза буллуну бур Дагъусттаннал Верховный судрайн, хасъсса лицензия дакъану тIий лавкьуссар му мадраса тIий. Шиккува кIицI лаганна, ва цалчинсса мадраса бакъашиву Дагъусттаннай лакьлакьисса, ларгсса шинал, масалдаран, Хасавюртливгу лавкьуссия мадраса. Гъумуксса мадраса зун бивкIун бур 2009 шинал. Му лакьаврил авазалул хIакъираву на цIуххав Лакрал райондалул имам ХIажимурадов Щайхмурадлухь.
ПатIимат Рамазанова
«Мадраса лавкьунни лицензия дакъану тIий, му ласуншиврул ва мунинсса хIукуматрал тIалавшиннарду щаллу даншиврул, мадраса хъун бан багьлай бия, муниха зунсса каши дакъая жул. Умудрай буру му мадраса багьайкун дузал бувансса, гьарза-гьарта бувансса чIарахбацIулт — спонсортал букканссар, яла ин ша Аллагь, лицензиягу ларсун, жущава паракьатну мадрасалуву исламрал кIулшивуртту лахьхьин дуллан хьунссар тIий. Мадраса лава-лавкьуссар тIутIаву къатIайлассар, цIана му зий буссар Гъази-Гъумучиял Жамалуттиннул мактаб хIисаврай. Яъни мизитрачIасса школа хIисаврай. Мактабрал ва мадрасалул дянив хъуннасса личIишиву дакъассар, лицензия дусса мадрасалухь дуссар мадраса къуртал бувминнан хасъсса кIулшивуртту ласаврил документру-дипломру буллансса ихтияр, мактабраяр махърив диплом ласуншиврул выпускниктуран исламрал кIулшивуртту куртIгу, цIакьгу дуллан багьлагьиссар МахIачкъалалив исламрал вузирттаву. Минобразованиялул тIалавшиннардугу дузал дурну, даву сантирайн дутайхту, цIуницIа зунтIиссар щайх Жамалуттиннул цIанийсса мадраса.» Вава масъалалул ялув на мадрасалул вакилнащал ва «Ассалам» кказитрал редакторнащалгу бував ихтилат, бахханасса информация цамургу баяйрив. Минналгу, имамнал бувсмур тасттикь барча бакъасса, цIусса цичIав къабувсунни, миннал увкумур чичларча, имамнал увкумур тикрал баву хъанай бур.
