ХIАЖИНАЛ АРС СУЛАЙМАНОВ МУРАД
Апрель зурул 16-нний, оьрмулул 20 шинаву, Москавлив авариялухьхьун агьну, нязаннийсса бивкIулул жуятува личIи унни дахьа оьрмулул аргъиравун ухлахисса, ГьунчIукьатIатусса жагьил, Сулайманов Мурад. Мурад увну ур февраль зурул 13-нний 1995 шинал МахIачкъалалив.

Дянивмур даражалул школагу бувккуну, Москавлив дугу дуклай, зий уссия. Мурадлун Лакку кIану хъинну ххирасса бия. Гъинттул цала ниттил буттачIан ГьунчIукьатIув лагайва.
Ва хъуна увуна ниттил Салидатлул, ниттияр ххирасса рухIгу Мурадлун дунияллий дакъая. Нину дурсса кьинилущал барча дурну, «на вийн кьунниялайгу оьвчинна» куну, цува акъа чара бакъамигу оьвчиннин ялугьлагьи бувну, гара кьини апатI нясив бувну бур.
Я Аллагь, щинчIав нясив къабаннав укунсса кьадар. Мурадлунсса Аллагьнал чичру укунсса духьунссия. Цанма ххирасса Лакку билаятрай ГьунчIукьатIув ниттил буттал янилу абадсса мина дуван увкIунни архсса Москавлия.
Мурадлул кьурчIисса бив­кIулул жижара буллай буру ванал ниттихь Салидатлухь, мяммахь ХIасан-ХIусайннухь, дадахь ХIабибатлухь, нитти­уссихь Мансурдухь, цинявппагу ссурахъаврахь, гъан-маччанахь.
Я Аллагь, зухьхьун ссавур дулуннав ва нязаннивсса бив­кIулул кьурчIишиву лялиян дувансса. Мурадлун бакъамур ванал авладран булуннав. РухI хъинний дишиннав, гьав нурданул дуцIиннав.
ГьунчIукьатIрал ва КIямашрал жяматру

————————————————

МЯММА­КЬУР­БАНнул арс
МЯММАКЬУРБАНОВ СУЛАЙМАН
Апрельданул 6-нний, оьрмулул 90 шинаву, дунияллия лавгунни ЧIяйннал шяравасса Мяммакьурбаннул арс Сулайман, шяраву, райондалий бусравну оьрму бувт­сса учитель.
Буттал КIанттул цIанийсса дяъви байбивхьусса шинал ЧIяйннал дянивмур даражалул школалул цалчинсса выпускрал выпускник зун ивкIун ур байбихьулул кла­ссирттал учительну Ккулув, Ваччав, ЧIяв. Сулайман Мяммакьурбанович уссия чIярусса шиннардий райондалийсса школардал байбихьулул классирттал секциялул хъунаману, республикалул учительтурал кIулшиву гьаз даврил институтрал байбихьулул кла­ссирттал кабинетрал методистну. Ванал даврил усттаршивруя чивчуну буссия «Начальная школа» журналданийгу. Ва ия оьрчIангу, нитти-буттангу хъинну ххирасса учитель. 60-нния лирчусса шиннардий бувсса захIматран лавайсса кьимат бивщуну, хIукуматрал ванан дуллуну дур чIярусса наградартту: СССР-данул ва РСФСР-данул халкьуннал просвещениялул отличникшиврул хIурматрал цIарду, цаймигу бахшишру.
Сулайман ия Буттал КIанттул цIанийсса Хъунмасса дяъвилул ва захIматрал ветеран. Лайкь хьуну ур чIярусса медаллан: «За трудовые отличия», «За доблестный труд в ВОВ», «За победу над фашистской Германией» ва м.ц.
Цибанссар, лавгунни дунияллия ЧIяйннал школалул цалчинсса выпускрал выпускник. Сулайман аьпалул шаврил кьурчIишиву кIидачIлай, жижара буллай буру уссурваврахь, кулпатрахь, оьрчIахь, гъан-маччанахь, махъсса щалвагу агьлу-авладрахь.
Цал гьав нурданул дуцIиннав, алжаннул ххари аннав, махънал оьрмурдай барачат бишиннав. Амин.
ЧIяйннал жямат