Къутаннайгу буккайссар цалчинсса хъарас дигьин хъувх. Зунттал шяраваллава бивзсса, чув яхъанай бухьурчагу, аьрщараха зий аьдатсса инсантурал къакьаритай Хъурдуккаврил байран. Вана мартрал 28-сса кьини лахъа-хъунну хьунадаркьунни, тIайладурккунни Ибрагьимовхъал кулпатралгу Хъурдуккаврил байран.

Ва кьини лагма-ялттусса инсантал, цинявппа гъан-маччами, уссурссу, лагма лавгун бия хъузала Ибрагьимов ХIажимурад Ибрагьиннул ва Кумсиятлул арснал дуллалисса даврил.
Ибрагьимовхъал кулпат хъинну аьрщарал хIал кIулсса, захIматрал кьадру-кьимат бусса инсанталли. Му гьанугу бивзссар миннал аьпа_биву буттал Ибрагьимов Ибрагьимлул – ххаллилсса агрономнал. На ванаяту «Илчи» кказитрайгу чирчуссия макьала ва дакIнийн утлай, ванал бихьлай ивкIсса захIмат махъначIа кьиматрай бушиву бусласисса. Вана ХIажимурадлул, нину-ппугу дакIнийну, гайнналгу рухI ххари хьуншиву кIулну, гьарца аьдатругу ларайсса даражалий щаллу дурну, тIайла дурккунни Хъунил байран.
Дия жура-журасса дукрарду, щинни-пинни, хъузалал хъирив бачIлачIисса кIургулттив нацIу-кьацIулул, хъунисса бартри. Бяст-ччаллий тIуркIурдаву хьхьичIун бувкминнан дуллай бия бахшишру, бартри. Хъузалал хъарасрал хьхьичI бия муххал бугъа, кьашивурттай бакъа чара бакъасса. Утти тIайлабацIу баннав хъузалтран цалла хъуру ххуйну-ххаллилну дугьлан, гъар-гъарагъи дакьиннав, хъунил хъатIуй дурцири дуаьрду тIайла дацIаннав, дуниялгу паракьатну, датIлай ка хъирив лаллай бакъару бакIлахърулул чIярушиврул тIисса кIанттайн бияннав. Барачат ххи баннав. Яла-яла цIуллушиву дулуннав гьарнахьхьун миннуха зунгу, занангу.
ЯлунчIил хъув уккан ХIажи­мурадлуща кьуру лавсунни Къушиев Жаватхан Аминнул арснал. Барачатну лавсъсса кьуру хьуннав, цIуллушиву дулуннав.
Р. S. ДиркIун дур буттал бу­ттахъая шихуннай нанисса жура-журасса аьдатру. Пикри булларча, гьарца аьдатраву ххаллилсса мяънарду дур: дугьлан ихтияр дулаву, Хъунил хъатIи бувну махъ. МухI щун буккаву. Шяраваллил кIанай ур­тту кьукьин ихтияр къадикIайва мухIирах мухI щуннин хьхьичI, лажин лухIину бикIайва чIиллух, мухIирах урттуйн ка щурча.Каних риттун бучIиссия, мухIирах кьукьин къабучIиссия, баян бувну, хIакьину мухI щун буккияра учиннин.
Гъаттарал, яттил хъирив хIух­чалт бия, гьарзатраву цилла-цилла низам дия. Дургьуналмур ттихIиннин, аьрщарава дукканнин хъув ятту-гъаттара гъан хьун къабитайва. ХIайп… Ялу-ялун низамру лиллай, хъамадитлай, пикри бакъулшиву ялтту дуклай чIалай дур. Гьарзатравура низам цIакьсса хъинни, гьарцанналгу цая-цаятура дайдихьу дурну. Яла гьарнан бигьану бикIанссия зунгу, яхъанангу.
Загьрани Аьбдуллаева