Февральданул 24-нний Дагъусттаннал БакIчи Рамазан АьбдуллатIипов гьуртту хьунни Аьрасатнал ПаччахIлугърал Советрал президиумрал заседаниялий. АьФ-лул Президент Владимир Путиннул каялувшиврулу ххалбивгьунни цIанасса макроэкономикалул тагьардануву регионнал бюджетру цIакь бансса чаранну ва регионнайсса буржирдал гьивурду чан даврин хасъсса масъалартту.
Ххалбигьлагьисса масъаларттал агьамшивугу хIисавравун ларсун, ПаччахIлугърал бакIчинал увкунни: «Цинявннан аьркинссар зун бавкьуну,
анаварсса бущилий, мукунма регионнайгу. Къааьркинссар ялугьлан личIину ялату ккаккан баннин. ЧIявуми регионнай бур захIматсса тагьардануву хьусса чIумалсса давурттал опыт. Му опыт цIана хъинну бучIи лякъинтIиссар. Мунияту жулва хIакьинусса заседаниялий гьуртту хъанай бур президиумрал члентураяр ххишала, Федерациялул субъектирдал каялувчитал ва Госсоветрал консультативсса комиссиялул члентал.
Владимир Путиннул бавтIминнан дакIнийн бувтунни, Аьрасатнал ХIукумат дайдирхьушиву гьашинусса шинал экономика ва социал бутIа лябуккан баврил план дузрайн дуккан дуллан. Мукуннасса планну хIадур дуллай буссар АьФ-лул субъектирдалгу.
«Гьарца региондалий хъинну мюрш бивкIун хъирив лавну луртаннан кьимат бищун аьркинссар, бюхъурду кIул бан аьркинссар. Ми луртанну мюнпатну ишла даврил мухIлу-хIин кIулну дикIан аьркинссар.
Ттул пикрилий, ХIукуматраву Игорь Шувалов бакIчисса Экономика лядуккан даврил ва интеграциялул комиссия хIала-гьурттуну зун аьркинссар Федерациялул субъектирдащал ва кIантту-кIанттурдай кумаг буллан кризисрайн къаршисса давуртту бартлаглан», — увкунни Владимир Путиннул.
Билаятрал Президентнал мукъурттийн бувну, бюджетрал арцуй кадирхьуну ишла дуллан аьркинсса тагьардануву хьувкун, цалчин ирглий арцул луртан харж дуван аьркинни паччахIлугърал кумаграх мюхтажсса инсантал социальну буруччаврил иширттан. Микку аьркинссар балжину личIи дан приоритетру, яни чара бакъами, агьамми кIанттурду. Приоритетру личIи байнигу аьркинссар хIукмурду кьамул бан шайссаксса агьалинан кIулну, аьчухну арцу чун ва щин тIайла дуклакиссарив, аьркинссар муданна дахIаву дикIан законодательный собраниярттащал, политикийсса партиярттащал, жяматийсса организациярттащал ва укунмасса инсантуращал.
Муния махъ масъала ххалбигьлан бивкIунни нузкьун аьнт дурсса тагьардануву.
ХIадур бувссар ХI. Аьдиловлул
