АЬЛИЛ АРС МУДУНОВ АБАКАР
Цаппара хIаллай къашавай шанийгу ивкIун, оьрмулул 97 шинаву аьпалухьхьун лавгунни Лакрал ва Дагъусттаннал машгьурсса чичу, шаэр, публицист ва педагог, Дагъусттаннал школалул лайкь хьусса учитель, Хъунмасса Буттал КIанттул цIанийсса дяъвилул гьурттучи, Аьлил арс Мудунов Абакар.
Абакар увну ур 1918 шинал ГьунчIукьатIрал шяраву. 1936 шинал къуртал бувну бур Гъумучиял педтехникум. Зий ивкIун ур лакрал щархъаву учительну.
1941 шинал лавгун ур аьрайн. Талай ивкIун ур Къиримнаву, Бряннай, Сталинградрай. Ванан дуллуну дур ЯтIул ЦIукул орден ва чIярусса медаллу.
Дяъвилия зана хьуну махъ зий ивкIун ур личIи-личIисса щархъаву учительну, Лакрал райондалул «Ххяххабаргъ» кказитрал редакторну, райком партиялул инструкторну, школалул директорну. Заочнайну дуклай, 1960 шинал къуртал бувну бур Дагъусттаннал университетрал филологиялул факультет.
Лакрал ва Дагъусттаннал буккултран Абакар Мудунов кIулссар гьунар бусса чичу ва шаэр хIисаврай. Дунияллийн бувкссар личIи-личIисса шиннардий ванал чивчусса прозалул ва поэзиялул луттирду: «Ччаврил бургъилу», «Буттал шяраву», «Щюллисса къур», «Оьттуву лархъсса цIу», «Вихасса балай», «ЦIарал пиягьру», «Аьраясса чагъарду» ва м.ц.
Ванал прозалул лу бувкссар оьрус мазрай Москавливгу.
Лакрал халкьуннал цIа дурксса арс Абакар Мудунов аьпалухьхьун лагаврил пашманшивугу кIидачIлай, дакIнийхтунусса жижара буллай буру ванал душваврахь, миннал оьрчIахь ва махъсса цинявппагу гъан-маччаминнахь.
ГьунчIукьатIрал жямат,
Лакрал райондалул
администрация
__________________________________
САЛИХIЛУЛ АРС ХIУСМАНОВ РУСЛАН
Чаннасса, баргъ бивтсса кIюрххил жул Вихьуллал шяраву шанма къатлуву цIу лерщуна. Яла цакуну вичIив къюкI дуллалисса, ча наниссарив къакIулсса «кумаг бувара» тIисса чIурду гьаваллаву хIасул хьуна. Амма гай щинчIав баллай бакъая. АпатI хьусса кIану шяравату архну бия.
Га кьини Ккуллал райондалий судрал приставну зузисса ХIусманов Руслан ахиратравун лавгун ия.
Руслан увссар Ккуллал райондалий Вихьуллал шяраву 1961-ку шинал, къуллугъчитурал СалихIлул ва ПатIиматлул кулпатраву. 1979-ку шинал къуртал бувссар Вихьуллал школа, дуклан увхссар Дагъусттаннал шяраваллил институтрал зоотехниктал хIадур бувайсса факультетрайн.1985-ку шинал, институт къуртал бувайхту, зун тIайла увкссар Лакрал райондалийсса ГьунчIукьатIрал шяравун зоотехникну. Гикку зий Русланнул дурссар 5 шин. Гания махъ зий икIайссия Ккуллал райондалул шяраваллил хозяйствалул управлениялий, Вихьуллал колхозраву. Зий уссия Руслан Вихьуллал колхозрал ревизиялул комиссиялул председательнугу. Махъсса 8 шинай зий уссия Ваччав судрал приставну.
Русланнул ва ванал кулпатрал Аьйшал ччаннай бацIан бувуна шанма душ. КIива къатрал хьуну, ца уттигу бувассия щаллу буван.
Руслан уссия чIявусса ихтилат бакъасса, дакI хъинсса, гъанссаннал, дустурал чIарав мудан ацIайсса, къирият дусса зунтталчу. Цибанссар, хъинну ччяни Аллагьнал цачIана увцунни. Махъ ливчIнал ахир-хайр дуваннав, ганан къабуллумур махъминнан булуннав. Аьпа буваннав. Паракьат хьусса кIанттул ялату нур дизаннав. Аммин.
Вихьуллал жямат
——————————-
БАТIАЛАВЛ АРС ЧАРИНОВ ЧАРИН
Вихьлияту Ваччав даврийн, давурттащал бавхIусса иширттай нанисса кIанттай, машина ахьния багьну, жул Вихьуллал шяравасса шама жагьилсса инсан ахиратравун лавгунни.
ХIазран бакъахьунссар тталат кьинилийн «лухIи кьини» учайсса. Бунияла дакIру лухIи шаврищал, га кьини Вихьуллал инсантуращал кьурчIишиву кIидачIин бувкIсса инсантурал хIат-хIисав дакъая.
Му кьини апатIрахьхьун агьсса шамуннава цану хьунни Чаринов Чарин. Ва ия спортсмен. 2009-ку шинал Вихьлив спортшколалун цIусса зал бувния шинай тренерну, школалул директорну зий уссия Чарин. Гания шиннай чIярусса соревнованиярду дурссар Вихьуллал спортшколалуву. ХIарачат бувссар Чариннул шяраваллил цикссагу жагьилтал спортрахун бичин, гайннан мяърипат лахьхьин дуван.
Чарин увссар Вихьуллал шяраву 1959-ку шинал. 1977-ку шинал къуртал бувну Вихьуллал школа, аьрали къуллугъ биттур буван лавгссар. Зана хьуну махъ къуртал бувссар Дагъусттаннал пединститутрал физкультуралул факультет. Зун ивкIссар цалла даврий райондалий, Вихьлив физкультуралул учительну, тренерну. Вихьлив оьрчIал спортшкола тIитIайхту, шикку директорну ва тренерну зий уссия. Чариннун цала буттал БатIалавл лажин ххалкъархьуссар. ХIарачат бусса, дуллалимур кIанийн дуртун дувайсса жагьил уссия Чарин. Кулпатращал Асбатлущал ччаннай бацIан бувну дуккин бувуна цала ца арс ва шанма душ. Утти дахьва ташулул хьун чIун дирсса оьрчIру хьуну буссия. Къаивтунни Чарин хъунбутта хьуннин. Цибанссар. ОьрчIал ахир-хайр даннав, махъминнахьхьун цIуллушиву дулуннав. Чариннулгу бунагьирттал аьпа баннав, рухI куклуний дишиннав.
Вихьуллал жямат
———————————————-
РАМАЗАННУЛ ДУШ САЙКIУЕВА МАРИТАНА
Оьсса апатI савав хьуну ахиратрал хьунни Ккуллал шярава Вихьуллал шяраву оьрмулул кюру буван бувкIсса СайкIуева Маритана. Ва зий буссия Вихьуллал шяраваллил библиотекалул хъунмурну.
Шяраву, райондалий шайсса культуралул циняв давурттавух цуппагу, библиотекалувун бучIайсса буккултгу, лаххан бувну Вихьуллал бакIвахIурду, чIинчIурду, гьухъригу, гьуртту шайссия, лакрал аслийсса культура ккаккан дуллай. Культура хьхьичIуннай дуллалисса пишакар буссия. Календарьданийсса гьарцагу агьамсса кьинилун хасну, конференцияртту, диспутру, интермедияртту бувайва Маританал. Бунияла учин бюхъанссар Вихьуллал библиотека Маританал каялувшиву дуллан бивкIния махъ, шяраваллил культуралул тIювану хьуссар куну. ХIайп, ччяни лавгунни Маритана жула дянива.
Бувссар Маритана 1964-ку шинал Ккуллал шяраву къуллугъчинал кулпатраву. Школа къуртал бувайхту хасъсса кIулшивугу ларсун, зий бикIайссия бакIрайва Ваччавсса оьрчIал библиотекалуву пишакарну. Яла, махъ, 1984-ку шинал Вихьуллал СайкIуев Нуруллагьлун щар хьуну, ца-кIира шинавату зун бивкIуна Вихьуллал шяраваллил библиотекалул хъунмурну. Нуруллагьлул ва Маританал хъуни бунни кIия арс ва ца душ. Арс ва душ щаллу бувну, кIилчинма арс щаллу уван дакIнийну буссия. Цибанссар, инсаннал ссят къуртал хьувкун, ци- бунугу багьана шай.
Махъ ливчIминнахьхьун цIуллушиву дулуннав, Маританал рухI чаннаний дишиннав, бунагьирттал аьпа буваннав.
Вихьуллал жямат
———————————————
ЗАГЪАЛАВЛУЛ АРС ХIАСАНОВ ХIАСАНЧАЛАБИ
Уттигъанну оьрмулуцIа хьунни ххаллилсса лаккучу, бюхттулсса ас-намусрал инсан, хьхьичIунсса учитель, ЦIуйшатусса Загъалавлул арс ХIасанов ХIасанчалаби.
ХIасанчалаби увну ур 1942 шинал ЦIуйшиял шяраву, дянивмур даражалул школа къуртал бувну бур Ккулув. Дуклай ивкIун ур Хасаврайсса шяраваллил хозяйствалул техникумраву, га къуртал байхту, зий ивкIссар ЦIуйшиял колхозраву. КуртIсса кIулшиву ласун ччай, ХIасанчалаби дуклан увххун ур Москавуллал университетравун тарихрал факультетрайн, миву 2 курс къуртал бувну, увцуну ур Совет Аьралуннавун къуллугъ буллан. Зана хьуну махъ ХIасанчалаби увхссар цIуницIа вава МГУ-рал философиялул факультетрайн. Му факультет къуртал байхту, гьан увну ивкIун ур Къазахъисттаннайсса вузравун, амма зана хьун багьну бур ЦIуйшав учительну зун. Ххаллилсса специалист хIисаврай, ХIасанчалаби ивтуна ЦIуйшиял школалул директорну. Директорну зий хьуну дия ХIасанчалабил 30-хъул шинну.
ХIасанчалабин дуллуссар «Дагъусттаннал лайкь хьусса учитель» тIисса цIагу. ЦIуйшиял школалул коллективран дакIний ливчIссар ХIасанчалаби хъинну дакI тIайласса, инсаншиву ларайсса, тIайламур ччисса, кIулшиву куртIсса ва кьянкьасса тIалавшиннардал учительну.
ХIасанчалаби мудангу бусравну уссия, ЦIуйшиял шяраваллин акъассагу, щаллагу райондалун. Цайминнал чIарав ацIангу хIадурссия, аькьлу куртIсса маслихIатчигуя. ХIалимсса хасиятрал заллуя ХIасанчалаби.
Лавгунни ахиратравун, чIун диян дурану дунура, рахIму бакъасса бивкIулул лавсун.
ХIасанчалаби аьпалухьхьун лагаврил кьурчIишивугу кIидачIлай, жижара буллай буру ванал кулпатрахь, душварахь, арснахь.
РухI хъинний дишиннав, цал бунагьирттал аьпа баннав, алжаннул ххари аннав.
ЦIуйшиял жямат,
дустал, гъан-маччами
————————————-
Дяъвилул ва захIматрал ветеран, ДАССР-данул лайкь хьусса учитель, ЯтIул ЦIукул ордендалул кавалер, Буттал КIанттул цIанийсса 1 степеньдалул ордендалул заллу, Чичултрал союзрал член, чIявусса луттирдал, назмурдал автор
Мудунов Абакар Аьлиевич
аьпалухьхьун лагаврил кьурчIишивугу кIидачIлай, жижара буллай буру ванал душварахь Гьидаятлухь, Шагьрузатлухь, Луизахь, вайнная бивзминнахь ва щалвагу агьлу-авладрахь. Махънахьхьун цIуллушиву дулуннав, Абакар Аьлиевичлул барачат махънайн бияннав, оьрмурдая щалиххан битаннав. Абакар Аьлиевичлул рухIгу алжаннул ххари даннав, гьав нурданул дуцIиннав. Аммин!
ГьунчIукьатIрал учительтурал ва школданучIасса
«Дараччи» клубрал коллектив
———————————
Хъунмасса Буттал кIанттул цIанийсса дяъвилул ветеран, Дагъусттаннал АССР-данул лайкь хьусса учитель, чIярусса орден-медаллал заллу, чIярусса шиннардий жулва оьрчIан зад лахьхьин буллай ивкIсса учитель
Мудунов Абакар Аьлиевич
аьпалувух ишаврил къумашивугу кIидачIлай, жижара буллай буру душварахь: Гьидаятлухь, Шагьрузатлухь, Луизахь ва вайннал щалвагу агьлу-авладрахь. Абакар Аьлиевичлул барачат махъ ливчIун лякъиннав, мунал оьрмулувун къаивну цучIав яла къагьаннав. Алжаннул ххари аннав, рухI бигьаний, чурх кIукIлуний хьуннав. Аммин!
КIямашрал жямат
————————————-
ХIурмат бусса Качар Абачараевнай!
Вил ххирасса ссу
Загьидат
оьрмулува лавгсса кьурчIишиву вищал ва вил гъан-маччанащал кIидачIлай буру. Зул гъан-маччаминнахьхьун цIуллушиву дулуннав, оьрмулул буччиннин битаннав, Загьидатлулгу гьав нурданул дуцIиннав.
Ваччиял жяматрал ва Гь. Саэдовлул цIанийсса
фондрал вакилтал
