ПАТIИХЪАЛ ЮСУПЛУЛ АРС ХIУСАЙНОВ ХIУСАЙН
Журат дусса, ас-намус ххисса чув – ПатIихъал Юсуплул арс ХIусайн ахиратравун лавгун мукьцIал хъанай бур.

ХIусайн увну ур 1939 шинал Ххут­рал шяраву, хъудугьул-къалайчинал кулпатраву. ОьрчIнийсса ванал оьр­му захIматсса бивкIун бур, чIивину унува нину-ппу личIи шаврийн бувну. Ппугу дяъвилийн лавгун, нинугу чIяруну къанаврду дуклан тIайла дуклай, ХIусайн цал буттарссичIа, яла ттаттачIа ялапар хъанай ивкIун ур. Дяъви къуртал хьуну махъ Ростоврай ялапар хъанахъисса буттачIан лавгун, гичча, чIун дирукун, армиялийн лавгун, Москавлив гьавалул аьралуннаву хьхьичIунну къуллугъ бувну бур. Зана хьуну МахIачкъалалив, чIивисса чIумала цанма ччай бивкIсса янна дуруххул пишалий «Дагветъобъединениялул» ца ательелий зун ивкIун ур.
ЧIал къавхьуну тIурча Ермошкиннул цIанийсса янна дуруххай фабрикалул лабораториялул хъунаману цIакь увну ур. Яла тIурча МахIачкъалаллал шагьрулул партиялул комитетрал жагьилсса коммунист ивтун ур 3-мур Интернационалданул цIанийсса янна щащай фабрикалул комсомол организациялул секретарьну. Ва диркIун дур 700-ннийн бивсса комсомолтал бусса. 1980-84 шиннардий ХIусайн увчIуну ивкIун ур шагьрулул комсомол организациялул комитетрал бюрорал членну. Мукьра шинавату ХIусайн ивтун ур Дагъусттаннайсса циняв шагьрурдайсса янна дуру­ххай фабрикартту цивун бухлахисса «Дагинветбыт» объединениялул директорну.
ХьхьичIунсса захIматрахлу ХIусайн лайкь хьуну ур чIярусса бахшиширттан, грамотарттан, дипломирттан.
ХIусайн ия ххаллилсса чувгу, вихшаласса ласгу, жяматрал бусравсса вакилгу. Дуруна МахIачкъалаливгу, Лаккуйгу чIалансса къатригу, чумартну хъамалгу кьамул байва.
ХIусайннул бивкIулул кьурчIи­шиву кIидачIлай, жижара буллай буру кулпатрахь, арсурваврахь, душваврахь, куявтурахь, махъсса гъан-маччанахь. Цал гьав нурданул дуцIиннав, алжан нясив баннав. Махънал оьрмурдай барачат бишиннав. Амин.
Ххутрал жямат

————————————

МАХIАММАДЛУЛ АРС ИБРАГЬИМХАЛИЛОВ МЯММА
Уттигъанну, тамансса хIаллай къашавайгу ивкIун, аьпалувух ивхьунни яхI-къирият дусса зунтталчу, буттал шяраву хъунагу хьуну, зий-занай угьара хьуннингу биялсса захIмат бивхьусса, шофернал касмулул минахур, ЧIяйннал шяравасса МахIаммадлул арс Ибрагьимхалилов Мямма.
Мямма увну ур 1934 шинал Ибрагьимхалиллул ва Муъминатлул хъунмасса кулпатраву ЧIяйннал шяраву. Уссу-ссурвавраву Мямма ивкIун ур хъуна-хъунама, вайминнай дакI цIуцIима, чIарав ацIу, ка-кумагчи. Мямма цувагу хъанай ур дяъвилул шиннардил щавщи биян бувсса оьрчIавасса, най унува хъуна хьусса, захIматрал сасан-сисин увсса чув-адамина.
Мямма, къуртал бувну ЧIяйннал школагу, аьрали бурж лахъан лавгун ур 3 шинайсса. Армиялия увкIун махъ зий ивкIун ур Ккуллал райондалул райпорал машиналий, ххуллурдал участокрал машиналий, больницалул «Анаварсса кумаграл» машиналий шоферну. Чув, цумур идаралий зурчагу, даву усттарну кIулсса Мяммал кьадру-кьимат архIал зузиминначIа, хаснува зун­ттал шяраваллал агьулданучIа, лавайсса бивкIун бур. Дуллуну дур грамотартту, бахшишру, хIурматрай ивкIун ур Ккуллал райондалий акъассагу, лагма-ялттусса дус-ихтивартурачIа, кIулначIа. ЧIярусса шиннардий хаингу къавхьуну ур цалва оьрмулуву язи бувгьусса пишарайн.
Мяммал бивкIулул кьурчIишиву кIидачIлай, жижара буллай буру кулпатрахь Пазилатлухь, вайннал оьрчIахь, душваврахь, оьрчIая бивзминнахь, уссурваврахь, ссурваврахь ва щалвагу агьлу-авладрахь. Муналцириннал оьрму лахъи баннав, барачатшиву махъ лирчIун лякъиннав. Мяммал гьав нурданул дуцIиннав, алжаннул ххари аннав.
ЧIяйннал жямат

———————————-

Ккуллал райондалул шяраваллаву школардай зузисса учительтал кьурчIишиву кIидачIлай бур Къяннал шяравасса, Каспийск шагьрулий зий, яхъанай ивкIсса, Агъаев Мяъсуд МухIуттиннул арс ахиратравун лагаврийн бувну, мунал кулпатращал Сонящал, арсурвавращал МухIуттиннущал, ХIадислущал, Кимлущал, душнищал Марияннущал, уссищал, гъан-маччанащал. Мяъсуд тачIав жул дакIурдива арх къахьунтIиссар.
Ккуллал райондалул КIулшиву дулаврил управлениялул бакIчи АхIмадов Шамил