Февральданул 14-нний Дагъусттаннал БакIчи Рамазан АьбдуллатIипов лавгунни Дарбантлив, кIул хьунни культуралул, тарихрал, архитектуралул, диндалул гьайкаллал ва кIичIирттал тагьарданущал. ЦIанасса ппурттуву шагьрулул кучарду гьарта буллай, дузал буллай бур 2000 шин шаврил шадлугъирттайннин. Республикалул хъунама ивунни «Караул-тепе» тIисса кургандалийн ва тикку ххалбунни ХУIII ттуршукулул кIилчинмур бутIуй Дарбантуллал хъунмурну бивкIсса Татту-Бикал мавзолей ва цаймигу кIанттурду.
Ганал цаппара тапшур бавуртту дунни хIатталлу дакьин даврин хасну, яла лавгунни Арманинал килисалувун. Тичча Рамазан АьбдуллатIипов увкIунни Жюма-мизитравун, тикку ганал чакгу бувну, ихтилат бунни мизитравун бувкIминнащал.
Дагъусттаннал БакIчи ивунни мукуна 1830-1834 шиннардий декабрист Александр Бестужев-Марлинский ялапар хъанай ивкIсса къатлувун, цIана гания музей бувну бур. Р. АьбдуллатIиповлул аьй дунни музейрал каялувчинай, га культуралул объект ургала акъа личIан бувсса тагьарданий ккавккукун, тапшур бунни га бакьин бан.
Дагъусттаннал БакIчи 1-ма Петрдул къатлувун (чIаттиравун) ивну, гагу ххалбувну, тапшур бунни га гьануцIакул бакьин бан.
Яла Рамазан АьбдуллатIипов лавгунни шагьрулул бухмур бутIану хъанахъисса махIлардайх (магалы), ихтилатру бунни тикку яхъанахъисса дарбантлувтуращал. Инсантал аьрзарду буллай бия щинал щаллуну бакъашиврул хIакъираву. Республикалул хъунаманал тапшур бунни жаваблувсса каялувчитурайн инсантурал проблема щаллу бан.
Яла Дарбантуллал бакIчинал кIанайма Мавсун РахIимовлущал архIал Р. АьбдуллатIипов лавгунни ДР-лийсса Аьрасатнал ФСБ-лул Дазул управлениялул къатрачIан, тикку хьунабавкьунни дазул зузалтращал.
Дарбантуллал дазул кьюкьлул хъунама Владимир Варичлул бувсунни февральданул 11-нний дазул къарал буллалиминнал хIарачатрайну тикку увгьуну ивкIшиву паччахIлугърал дазуйх ихтияр дакъа лавхъсса инсан. Мунийн бувну дазул къарал буллай бивкIсса нарядран Дагъусттаннал БакIчинал дуллунни цIа чирчусса ссятру. Мунияр ххишалагу дазул управлениялун буллунни компьютер, Рамазан АьбдуллатIиповлул луттирду, «Расул ХIамзатов. Мой Дагестан. Исповедь» кинордал дискру.
ХIадур бувссар ХI. Аьдиловлул
