БатIаву дайдишин хьхьичI террорданийн къаршисса комиссиялул члентал: агьалинал мюхчаншиву дуруччаврилсса буллалисса райондалул администрациялул бакIчинал хъиривчу Юсуп Рамазанов, террорданийн къаршисса отделданул каялувчи Щамххала Сайпуллаев, ГО ЧС-рал отделданул пишакар Надир ХIасанов. Жагьилтуращалсса даврил ва туризмалул отделданул каялувчи МахIаммад Гадаев лавгуна Карашрал школалийн.
Школалул ялтту бувккун, ххалбувна идара цIу дагьаврия цуксса мюхчан бувну буссарив. Думур-дакъамур хIисавравунгу ларсун, аьркинсса маслихIатру бувна Надир ХIасановлул. Щамххала Сайпуллаевлулгу учительтуращал бувна экстремизмалул ва терроризмалул нигьачIаврийн багьайсса ихтилат. Вара темалийн багьайсса ихтилат бувна Сангардал школалул лавайми классирттал дуклаки оьрчIащалгу.
Муния махъ Сангардал клубраву Лакрал райондалул бакIчи Юсуп МахIаммадовлул каялувшиннаралу хьуна ялув кIицI ларгсса темалун хас дурсса батIаву. Муний гьуртту хьуна райондалул террорданийн къаршисса комиссиялул члентал, Лаккуйссагу, Бабаюртуллал райондалияссагу низам дуруччай органнал зузалт, СПК-рдал хъуними, школарттал директортал.
Ва кIилчинсса батIавур терроризмалул ва экстремизмалул масъалалун хас дурну къутаннал шяраваллаву хьусса. ХьхьичIмур хьуссия ларгсса шинал ГьунчIукьатIрал къутандалий.
БатIаву тIитIлай, Юсуп МахIаммадовлул бувсуна Халкьуннал Мажлисрайнсса Рисалалуву Республикалул БакIчи Рамазан АьбдуллатIипов хьхьичI бихьлайна ушиву экстремизмалийн ва терроризмалийн къарши бацIаву гужлан дансса мурадру.
Уттигъанну «Дружба» комплексраву хьусса совещаниялийгу Республикалул БакIчинал кIицI лавгун бур 2014 шин, хьхьичIминнух бурувгун, паракьатну гьарчагу, экстремизмалул ва терроризмалул ишру чан хьурчагу, му масъала цIуцIинува личIлай бушиву, дакIру ларну ялапар хъанансса чIун жунна ттигу дучIан дурашиву.
— Ца полицанал гужирдайну ва масъала щаллу бан къабюхъайссар. Халкьуннащал ччя-ччяни хьунабакьлан, жагьилтуран зузи кIанттурду буллан тIалав буллай ур Республикалул БакIчи. Дагъусттан агьлу миналулва шяраваллил хозяйствалуха зузисса агьлу бухьувкун, аьрщараха ва ризкьилуха зузи буллансса тIалавшинна дур, хаснува къутаннай ялапар хъанахъисса халкь. Жунма чIалай бур экстремизмалущал талан цуксса жапану буссарив, му дайщун дансса чараннах луглан аьркинну, — увкунни Юсуп МахIаммадовлул.
Райондалул администрациялул бакIчинал хъиривчу Юсуп Рамазановлул цалва ихтилатраву бувсуна 2014 шин райондалун жапасса хьушиву — ялун лирчуну дур экстремизмалул ва терроризмалул 8 тахсиркаршиву, увгьуну ур ми иширттавух хIала ивкIсса 12 инсан, миннавух бивкIун бур ГьунчIукьатIрал, Кумиял ва Гъумучиял шяраваллавасса жагьилталгу. Бувсунни террорданийн къаршисса комиссия низам дуруччай органнал зузалтращал, шяраваллал администрациярттал бакIчитуращал ва жяматрал вакилтуращал цачIуну зий бивкIшиву райондалул бакIчинал цIакь дурсса пландалуцIун бавкьуну. Уттинин дурну дусса дур 9 батIаву, миннува 3 – шяраваллаву (Щарав, ГьунчIукьатIув ва ГьунчIукьатIрал къутандалий). Школалий дуллайнма бусса бур профилактикалул давуртту, мюхчан буллай бусса бур агьали чIявусса батIайсса кIанттурду. Балжину бувсунни хъун хъанахъисса ник ватан ххирану тарбия дан дуллалисса давурттая.
Аьрасатнал МВД-лул «Лакский» МО-лул уголовный розыскрал хъунама оперуполномоченный МахIаммадов Исламлул бувсуна Лакрал райондалий экстремизмалул ишру цалчинма-цалчин хьушиву 2009 шинал. Тани Кумиял шяравунсса ххуллул шанбачIулий хьусса данди бацIавриву ивкIуну ур кIия полицанал зузала, ивкIуну ур вай ливтIусса Ираннавасса инсангу. Мукьуннаща лихъан бювхъуну бур. Миннавасса кIия — Буршай хьусса иширттавухгу хIала бивкIсса Лаващиял бандгруппалул бакIчи Рабаданов Халид ва Лакрал группалул бакIчи Какраев Жабир бат бувссар спецоперациялуву, КIундиннал шяраваллил лувсса нуххулу. Гихуннайсса давурттаву ялун личин увну ур вайннан кумаг буллай ивкIсса 12 инсан. ХIакьинусса кьининин вайннан цинявннан судрал багьайсса танмихI кьувкьуну бур. Ца усса ур розыскрай. Вай цинявппагу бусса бур 18-28 шинал оьрмулувусса жагьилтал, аькьлу-кIулши цалий дацIан дурасса, дунияллий хъанахъимуния цалва пикри бакъасса. Исламлул бусласимунийн бувну, сайки гьарца шяраву бусса бур чIаважагьилтал баччан буллалисса инсантал, ми агьалинал цила чIумал ашкара къабуллалаврийнур жулла райондалийн оьсса баларду ялун бивссагу. Сириянавугу тамансса бусса бур шагьрурдай ялапар хъанахъисса лакку оьрчIру.
Къутаннайсса Кьубиял школалул директор Залимхан МахIаммадовлул бувсуна экстремизм ва терроризм дайщун дан цала школалий дуллалисса давурттая. Ванал бусласимунийн бувну, «Ххячара кIюланияр дуцайсса» тIисса кунма, яла бигьану му чулухунмай баклай бусса бур ахIвал кIюласса, пикри хIурасса жагьилтал. Школалий сакин бувну бусса бур, дуклаки оьрчIал нитти-буттахъулгу хIаласса, террорданийн къаршисса комиссия. Дурну дусса дур 1-мур классрая тIайла хьуну 11-ми классирттайн бияннин дансса давурттал планну. Ччя-ччяни дайсса дур Бабаюртуллал райондалул полицанал зузалтращалсса хьунабакьавуртту, экстремизмалиясса заралдания бусласисса. ЦIуну школалийн кьамул уллалисса оьрчI диндалия лапва гьарзану гъалгъатIий хIисав хьурча, муссят ганащал зузи байсса бур учительталгу, балугъравун къабивсса оьрчIал иширтталсса буллалисса инспекторталгу, мизитрал имамгу. Сакин дурну дусса дур учительтурал хьхьурайсса дежурстварду.
ГьунчIукьатIрал шяраваллил администрациялул бакIчинал хъиривчу Юсуп Шуаьевлул кIицI лавгуна къахьун аьркинсса ишру цала шяраву шаврия начну-ламусну бушиву шяраваллил агьлу, мукунсса ишру гихунмай тикрал къахьунсса давуртту дуллай бушиву. — Экстремизмалул чул бувгьуми цивппагу махъзуманив хъинну мюхчан хьуну бур, чIиртту бивчуну занай, ми бувчIин бигьану бакъар. Школалий оьрчIру итталу бур, школалия лавгун махъ бур ми тиху-шихунмай баклай. Мунияту миннал ялув бацIаву кьянкьа дан багьлай бур школалия лавгун махъ, — тIий ур ва.
Юсуп МахIаммадовлул бувсуна ларгсса шинал МахIачкъалалия бувкIсса пишакартуран ГьунчIукьатIрал шяраваллил лулттусса паччахI ххуллий лявкъуну бивкIшиву, бронитехникара ххит дансса гужирал, кIива-кIива бомба. Гай бивхьумигу лявкъуну бур ГьунчIукьатIув ялапар хъанахъисса жагьилтал.
Яла тIааьн бакъасса ишру Буршай хьушиву дакIнийн бутлай, бувсуна хъиривлаявурттаву ялун ливчушиву полицанал зузалт ливтIуминнавасса Лаващиял райондалиясса жагьилтал 4 гьантлий кIикку ялапар хъанай бивкIшиву.
— 26 къатта бусса шяраву 4 гьантлий чачIавсса инсантал цукунни щинчIав къаккавксса? Махъва-махъ суд бувсса кIайннавасса цаннал бусласимунийн бувну, кIай ливтIуну махъ бурширичу ивкIун ур «УАЗикрал» лув пIякь чайсса зат дихьлай, кIиккун бавтIсса халкьгу пIякь учин бан. Цукссава сси бивкIссар цалва жяматрайн? Щия ци оьбала бивссар цала буттал шяраву, буттахъал гьаврду дусса кIанттай кIакссара рахIму бакъасса тIул дан? – увкунни Юсуп МахIаммадовлул.
Райондалул кIулшиву дулаврил управлениялул каялувчи Явсупи ХIамзаевлул кIицI лавгунни миллатрал аьдад хIисав дурну, экстремизмалул чул бувгьуми яла чIявусса лакраву бушиву.
— Лакрал цайминнаяр ччяни кьамул дай гьарцагу цIушинна. Дин хьхьичIра-хьхьичI кьамулгу дурну дур, хьхьичIра-хьхьичI кьагу риртун дур. ЦIунилгу цIусса журалий кьамул дурну дур. Царагу шяравалу дакъар, чялишну акъахьурчагу, миннал чул бувгьуми бакъасса. 2014 шин паракьатну ларгунни тIурчагу, я хIура бан къабучIиссар. Полицанал зузалал бусласимунийн бувну, Сириянавугу лак бусса бур чIявусса. Оьрмулия ка ларсъсса, ци бангу махъаллил къахьунтIисса инсанталли тай. Тайннал пикрилул уртакьтал шийхвагу къачанссар. Хъирив нанисса ник миннал биялалухьхьун къадирияншиврул, профилактикалул даву гужлан дуллан аьркинссар жува.
Цилва ихтилатраву Сангардал школа-интернатрал директор Магинора АхIмадовал кIицI лавгуна 7 шяравасса личIи-личIисса миллатирттал оьрчIру дуклакисса школалий укунсса хьунабакьаврил агьамшиву хъуннасса душиву.
— Дунияллий хIасул хьуну дур цIакь бусса террорданул паччахIлугъ. Жагьилтал бигьану кIункIу бансса гужру му паччахIлугърачIа хъунисса бур. КIулшиву дулаврил министерствалул му масъалалух агьамсса къулагъас дуллай бур, хъунисса дур жуясса тIалавшиннардугу. Амма ттун ччива СПК-рдал хъунимигу, шяраваллал бакIчиталгу цачIун хьуну чаранну ляхълан. Жунма чIалай бур цIана интернетрая жулва оьрчIан хайруксса заралгу бушиву. Микку тахсир нитти-буттахъайгу бур. Ттул оьрчI циванни оьваннасса телефондалущал занан аьркинсса тIий, багьлул ххирасса телефонну ласлай бур. ОьрчIругу ми канища щяв дихьлай бакъар. Мукун ххуй бакъасса информациялул мугьалттулу личIлай бур. Совет заманнай хъунмур жаваблувшинна школалий диркIхьурча, хIакьину замана баххана хьуну бур, жаваблувшиннагу нитти-буттахъай дур. Буслайри лахьхьайсса, мунияту нитти-буттахъангу школалущалсса дахIаву гужлан дан багьлай бур, укунсса хьунабакьавурттугу ччя-ччяни дуллан багьлай бур, — увкунни ванил.
Бабаюртуллал райондалул виваллил иширттал отделданул участковый полица АьлихIажи Маврановлул бувсуна хIакьинусса кьининин Бабаюртуллал райондалул отделданул сияхIрай ушиву экстремизмалул чул бувгьусса 152 инсан. Миннавух Лакрал къутаннаясса усса ур 2 инсан. Бабаюртуллал райондалия Сириянаву талай усса ур 30 инсан. Вайннавух лак бакъасса бур. Тиха зана увсса 4-ннал хIакъираву сукку дурну дусса дур уголовное дело, 208-мур статьялийн бувну – закондалий бакъасса ярагъуннищалсса кьюкьравух гьурттуну бушиврухлу.
Ялув ихтилатру бувминнал кунма, АьлихIажиналгу кIицI лавгуна балардансса хъунмур багьана агьалинал личIлул бакъашиврия бушиву. Мунияту тавакъю бунни ахханасса, щак бусса инсанная вихшалдарал телефондалийн оьвкуну, низам дуруччай органнайн баян баван.
Къутаннайсса хозяйстварттал иширтталсса буллалисса Лакрал райондалул администрациялул пишакар Аьлил Аьлиловлул бувсуна Лаккуй ГьунчIукьатIув экстремизмалул чул бувгьусса жагьилтал бувгьусса чIумал, гилусса шяраваллавугу КТО баян бувну, къушру, фермарду ххалдуллай бивкIшиву. Муния мукьахгу вайннал участковыйнащал архIал ххалдурну дур гьарца шяраву гьарца хIаят. Уттигу зуруй цал школарттал, къушал, фермардал ялтту буккайсса бур. Бахчарду бугьан тиха-шиха бувгьусса инсантал хъинну хъирив лавну ххалбайсса бур.
Экстремизм дайщун дан шяраву дуллалисса давурттая бувсуна КIамахъаллал шяраваллил администрациялул бакIчи Сяид Аьбдуллаевлул.
Ахирданий, гьуртту хьуминнал ихтилатирттайн бувну, ххалбигьлагьисса суаллал ялув кьамул бувна жяматрал мюхчаншиву дуруччин дуллансса давурттал хIукмурду.
