Февральданул 27-нний Дусшиврул къатраву Дагъусттаннал БакIчи Рамазан АьбдуллатIиповлул Хъун дяъвилул ветерантуран дуллунни Ххувшаву ларсун 70 шин шаврин хасъсса медаллу.

ХIасан Аьдилов
Шадлугъругу тIиртIуну, Рамазан АьбдуллатIиповлул ветерантурахь аьла-ссалам бунни, чIа кунни миннан ттинияр тихуннайгу чIярусса шиннардий яшаву. «Гъан хъанай дур бюхттулсса байран – Совет халкь немецнал чапхунчитураяр ххув хьуну 70 шин шаву. Ва жулла Ватандалун ляличIисса шинни, барчаллагьрал шинни, Аьрасатнал агьали цачIун шаврил шинни», — увкунни Республикалул бакIчинал.
Рамазан АьбдуллатIиповлул увку­сса куццуй, ва иширал, ва байрандалул агьамшиву так ветерантуран дакъасса, республикалулгу, билаятралгу циняв миллатирттангу, ялун нанисса никир­ттангу хъанахъиссар.
«Севастополлай хьурчагу, Волгоград­рай хьурчагу, полярный круграл тийх хьурчагу, Ярославрай хьурчагу – гьарца кIанай чирчуну дикIай цала чувшиврул гьунарду ккаккан бувсса дагъусттанлувтурал фамилияртту. Мива махъру учин хьунссар Совет Союзрал ччимур миллат­рал хIакъиравугу.
Яла Рамазан АьбдуллатIиповлул Хъун дяъвилул ветерантуран дуллунни наградартту.
Ветерантурал ихтилатирттаву Респуб­ликалул каялувчинахь барчаллагь тIий бия цахьра къулагъас дуллалаврихлу, республикалий тагьар хъинчулиннай да­ххана дан хIарачат буллалаврихлу. Хъундяъвилул ветеран Сяид ХIусайнаевлул бивщуну каманчагу, увкунни дяъвилун хас бувсса балайрду лакку ва оьрус мазурдий, циняв бавтIминнал гужну хъатру ришлай бия.
«Вана вари совет инсаннал яхI, кьянкьашиву. Гьаман ва яхIлилли жува ххув бувсса», — увкунни Республикалул хъунаманал ва тапшур бунни Сяид ХIусайнаевлун дулун «Дагъусттан Рес­публикалул культуралул лайкь хьусса ишккакку» тIисса цIа.
Региондалул каялувчинал уттигу цал барчаллагь увкунни ветерантурахь Хъун дяъвилий ккаккан дурсса чувшиврухлу ва гьунардахлу.