АЬВДУЛМАЖИДЛУЛ АРС МАЖИДОВ ХIАЖИ
Уттигъанну, оьрмулул уччиннин къаивтун, дунияллия лавгунни Ккурккуллал шяравасса Аьвдулмажидлул арс ХIажи Мажидов. ХIажи увну ур 1961 шинал ноябрь зурул 26-нний, Ккурккуллал шяраву, 9 оьрчI бусса хъунмасса кулпатраву.
ХIажи ия кару мусилсса усттар, цалла даву ххуйну кIулсса лавайсса даражалул пишакар, жаваблувсса зузала. 1982 шинал ва зий уссия Ккурккуллал Культуралул къатлул директорнал хъиривчуну. КIира шин миккугу дурну, 1984 шинал ва лавгуна Къазахъисттаннайн. ЧIярусса шиннардий щалва коллективрангу хъинну бусравну зий ия Шевченко шагьрулий, Ералиевский КПП-лий. 1996 шинал Дагъусттаннайн зана хьуну, МахIачкъалалив ТЭС буллалисса бригадалуву зун ивкIуна. 2004 шинайн ияннин Ирганайский ГЭС-рай зий уссия.
ХIажи ия хасиятрал авкьусса, аьчухсса, хъярч-махсартту ххирасса инсан. Гьарнал чIарав ацIан ччисса, кумаг бан чялишсса ия. Мунияту ххирану икIайва архIал зузиминнангу, дустуран ва гъан-маччанангу.
Лавгунни дунияллия жагьилсса оьрмулуву, кулпатгу, кIива душгу махъ кьабивтун. ХIажи аьпалул шаврил кьурчIишиву кIидачIлай, дакIнийхтуну жижара буллай буру кулпатращал, душваращал, уссурссуннащал, махъсса гъан-маччанащал. Цал рухI хъинний дишиннав, алжаннул ххари аннав.
Ккурккуллал жямат
—————————-
ЖАБРАИЛЛУЛ АРС ОЬМАРОВ РАФИК
Хархавар бакъа, машиналул рульданух най унува, къюкIлил инфаркт хьуну, жула дянивату лавгунни ххишала акъа захIмат ххирасса ишбажаранчи, аьркиннал чIарав ацIайсса инсан, мажлис-компания чIюлу дувайсса мукъул усттар, кулпатрал чул бищай кIану, ШавкIуллал шяравасса Жабраиллул ва Зубайдатлул кулпатраву хъуна хьусса Оьмаров Рафик.
Рафик дунияллия лавгсса лухIи-цIансса хаварданул банд лаган бувсса инсантал хъуннасса кьурчIишиву кIидачIлай, жижара буллай буру кулпатрахь, арснахь, душнихь, ссурваврахь, ссурахъаврахь, агьлу-авладрахь. Мунан бакъамур оьрмулул бутIа оьрчIан, мунан ххирану, аьзизну ивкIнан булуннав, ххаришивуртту ялун дияннав. Рафиклул рухI бигьаний, чурх чаннаний хьуннав, алжаннул ххари аннав. Аммин!
Рафик, жул чаннацIукуй,
ЛухIи паранну щурив,
Жул ятIул мусил зунттуй,
Мусиватрал ччувччурав?
КIяла магьилул хIави
Дянивату гъавгъунни,
Зам-зам щинал щаращуйн
Загьрулул чявхъа бунни.
Вин ци къия дируна
Ххуллул манзил битаннин,
Заннал рухсат бакъаяв
Шаванахь барчаллагь чин?
Кьадиртсса тIайлассарив
Ина пана дуниял,
Тти шанашу, жул пахруй,
Лакьи чарил нузкьунттив.
Алжаннул ххари аннав,
Гьав нурданул дуцIиннав,
ХIурулъэнтурал дянив
Гьан бува ливчIмур оьрму.
Вил бивкIулул къума-банд лаган бувсса гъанчу Сурая
ш. ШавкIул
—————————————
АСАДУЛЛАГЬЛУЛ ДУШ БУТТАЕВА АСИЯТ
Жула ххишала бакъа ххирасса ва ххаллилсса зузала, коллега Асадуллагьлул душ Буттаева Асият аьпалухьхьун лагаврийн бувну, Дагъусттаннал ПаччахIлугърал университетрал биологиялул факультетрал цинявппагу муаьллимтурал ва студентътурал чулуха хъуннасса пашманшиву кIидачIлай буру Асиятлул ичIуваминнахь ва махъсса щалвагу агьлу-авладрахь.
1965-ку шиная шинмай Асадуллагьлул душ Асият зий бивкIссар ингилис мазрал хъунмур дарсдихьуну. Ванил кьадру ва кьимат мудангу лахъсса даражалий бивкIссар цила даврил уртакьтурал ва студентътурал дянив.
Мудангу хъамаллуран тIивтIунмасса, барачатшиву ххисса буссия ванил къатта-къушгу. Ва хIат-хIисав дакъа ххирасса бия циламиннангу, чIахху-чIарахминнангу.
Асиятлул нур дизлазисса симан мудангу личIантIиссар ванил кьанкь дияйцириннал ва кIулцириннал дакIурдиву.
Цил бунагьирттал аьпа баннав, рухI рахIатний дишиннав!
Даврил уртакьтал,
дустал, гьалмахтал
——————————————
САНИНАЛ ДУШ ГЪУЖИЕВА АЙМИСАЙ
Февраль зурул 15-нний аьпалул хьунни Ккурккуллал шяравасса уздансса агьлу-авладрал душ, ххаллилсса учитель ва хъинсса нину Гъужиева Аймисай Санинал душ.
Аймисай бувну бур 1932 шинал январь зурул 10-нний Ккурккуллал шяраву. Шиккува школагу къуртал бувну, бувххун бур Дагъусттаннал учительтурал институтравун. 1953 шинал мугу къуртал бувну, зун бивкIун бур учительну. Цилва хъунмур оьрму ванил хас бувну бур оьрчIру тарбия баврил ва миннан кIулшивуртту дулаврил даврин.
Аймисай Саниевна зий бивкIун бур ГьунчIукьатIрал, Кумиял, КIундиннал ва Ккурккуллал школардай.
Ва бия кIулшивуртту дусса, цилла даву ххирасса ва оьрчIах ччаву дусса учитель. Ванил хIурмат хъунмасса бия дуклаки оьрчIачIа ва учительтурал коллективрачIа. ДакI аьчухсса, аьмал-хIал бавкьусса Аймисай ххирасса бия гъан-маччанангу, чIахху-чIарахнангу.
Цила ласнащал, бусравсса учитель Гъужи Гъужиевлущал, ххуйсса тарбиягу дуллуну, цалва-цалва оьрмулул ххуллийн бивчуну бур ххюва оьрчI. Миннаягу нитти-буттал цIа бусравну дуручлачисса, яхI-къирият дусса оьрчIру хьунни.
Аймисай Саниевнал дарс дирхьусса оьрчIалгу хIакьинусса кьинигу хIурматрай зумух ласай ххирасса учительницал цIа.
Аймисай Саниевна аьпалухьхьун лагаврил кьурчIишиву кIидачIлай, дакIнийхтуну жижара буллай буру ванил оьрчIахь, уссур-ссуннахь, махъсса гъан-маччанахь. Имандалий лавгун лякъиннав, алжаннул ххари баннав.
Ккурккуллал жямат
——————————————————
Давудлул арс АьбдулхIамидов Руслан
Уттизаманарвав савав, ахир-заманнивав гъан хъанахъисса, азардурвав ялу-ялун лавмартшиву дуллалисса, тIисса, къума-банд лаган буллалисса хаварданул халкьуннал дакIру аьраххан дунни вай интнил кьанкь ришлашисса гьантрай, чIун дакъасса бивкIулул жагьилсса, дахьра къупливату тIутIи хъятIисса оьрмулуву, ГьунчIукьатIрал шяраватусса АьбдулхIамидов Руслан Давудлул арс жуятува личIи шаврил.
Ниттил буттал Мудунов Абакар Аьлиевичлул бачIикссавагу оьрмулий яхьун къаивтун, жула дянивату лавсунни ххаллилсса лакку оьрчI, ниттил язисса арс, кулпатрал чул бищай ттарцI, мусил магъи, душнин дазу-зума дакъа ххирасса мямма, уссурссуннан акъа чара бакъасса Руслан.
Русланнул язисса бивкIулул хъюлчай тIутIи бунни бюхттул зунттурду, къявхъа тIутIи дунни къумасса ратIру, зурзу тIутIи бунни муруллив-ххяллу, зума тIутIи бунни жяматрал агьлу. Лакку билаятрайсса гьарцагу инсаннан якьама къабивзун бикIайссарив вил кьурчIисса кьадар, Руслан! ХIайп, вил жагьилсса жан, чинарданул чурх, утта хъачIру, сахIибулхайр дусса симан хIавтIливух дишин, уттиния тиннай ххиранан къаккаккан. Азарийла хIайп. Циван чичайвав Заннал кьурчIисса кьадарду. Жунгу, чIаравсса шяраваллил жяматран, зущал уссурссу кунма, хъамалну, дакI тIайласса дусталну бивкIсса инсантуран ххишала бакъа бювххунни, кьувтIунни Руслан аьпалувух ивхьусса бивкIулул хавар, зущал архIал бакъашиврулгу дур кьюлтI учин къашайсса къумашиву дакIниву, кIирисса макь къявхъа тIий иттату.
Русланнул рухIгу алжаннул ххари даннав, гьав нурданул дуцIиннав, тIий, жижара буллай буру ниттихь Луизахь, кулпатрахь Марияннухь, душнихь чIиви ТамарихIажинахь, Маликлухь, Гьидаятлухь, Шагьрузатлухь, Сиянатлухь, цинявппагу уссу-ссурваврахь, Мудуновхъал ва Къушиевхъал агьлу-авладрахь. Русланнун бакъамур оьрмулул бутIа мунал душнин, мунан язину, ххирану ивкIнан булуннав Заннал. Ва кьурчIисса кьадар бухIансса ссавур дулуннав зухьхьун Заннал. ЯхI бара, ссавур дара, духIайначIаннитIархха кьинигу дучIайсса, ххуймири тIархха Занналгу буцайсса.
Зун ахир дакъасса ссавур чIа тIисса ГьунчIукьатрал
ва КIямашрал жяматру
————————————
Ца акъа-акъасса аьзизсса арснал бивкIулул захIматсса кьурчIишивугу дакIнийхтуну кIидачIлай, жижара буллай буру ниттихь Мудунова Луизахь, арснал кулпат Марияннухь, арснал душ чIиви ТамарихIажинахь, Гьидаятлухь, Шагьрузатлухь ва махъсса щалвагу агьлу-авладрахь вайннал ишин-итан кIану бакъасса, нурданул чирахъ, бюхттул чинарданул мурхь, бавал язисса утта хъачIру,
Руслан
чIун дакъасса оьрмулий, дурагу 26 шин хьуну, аьпалувух ишаврийн бувну.
КIулли чаннасса дуниял лухIи-цIан ларгшиву, кIулли дакIру гъюжу дуркшиву, кIулли азаруннил лавмартшиву дурну луркIан дуркшиву. Хъунасса Заннал зухьхьун ссавур дулуннав тIий лабизлай буру Заннайн, зущал архIал Русланнул кьурчIисса кьадар кьюлтI учин къахъанай. Зухьхьунна цIуллушиву дулуннав, Русланнун къабуллумур оьрмулул бутIа ТамарихIажинан булуннав, ганан ххирану, язину ивкIнан булуннав. Алжаннул ххари аннав, гьав нурданул дуцIиннав. Аллагьуммаамин!
ГьунчIукьатIрал учительтурал
ва школданучIасса «Дараччи» клубрал коллектив
——————————————-
КЬАДИЛА-КЬУРВАННУЛ ДУШ ЖАБРАИЛОВА ТАМАРИ
Оьрмулул 95 шинаву аьпалухьхьун лавгунни ас-намус ххисса ххаллилсса зунттал хъамитайпа, Ккуллал шяравасса Кьурваннул душ Жабраилова Тамари.
Тамари бувну бур 1920-кусса шинал Ккуллал шяраву, Кьадила-Кьурваннул ва Марияннул къушлий. Дяъвилул шиннардий, цилва оьрмулул душваращал, Мариян лавгун бивкIссар къанаврттайн. Зий бивкIссар Къаяккантуллал ва Ленинккантуллал кIанттурдай, бивхьуссар хъинну хъунмасса захIмат, бувхIуссар ккаши. Ми циняв кьадарданул дайдишругу дурурччуну, ванил бувтссар ччинал дахIалий чинсса, лажин кIяласса оьрму.
Цила лас Жабраиллущал хъунгу бувну, чивун буккан бувссар ххаллилсса 4 арс ва 1 душ.
Тамари аьпалухьхьун лагаврил жижара буллай буру арсру Рашидлухь, Ризваннухь, Арсеннухь, Алексейхь, душ Раяхь ва махъсса цинявппагу гъан-маччаминнахь.
Цил бунагьирттал аьпа баннав, рухI бигьаний дишиннав!
Ккуллал жямат
—————————————-
ДакIнийхтуну хъуннасса кьурчIишиву кIидачIлай, жижара буллай буру Качар ХIусайнаевахь ва щалвагу ХIусайнахъал тухумрахь, миннан ххирасса
Загьидат
дунияллия лагаврийн бувну.
Цил рухI Алжаннаву хьуннав, гьаттай нур дизаннав. Загьидатлун къабуллумур оьрмулул бутIа мунил наслулун ххи бувну лякъиннав.
«Дараччи» клуб
——————————————-
ДакIнийхтунусса кьурчIишиву кIидачIлай, жижара буллай буру Светлана Шабановахь, мунил ххирасса лас
АьбдурахIман
дунияллия лагаврийн бувну.
АьбдурахIман имандалий лавгун лякъиннав, рухI алжаннаву хьуннав, гьаттая нур дизаннав, махънахьхьун цIуллушиву дулуннав.
«Дараччи» клуб
