Мартрал 18-нний МахIачкъалалив Родопский бульварданий хьунни Къирим Аьрасатнащал цачIун хьуну шин шаврил шадлугърал митинг.

ХIасан Аьдилов
Митинграй гьуртту хьунни ДР-лул ХIукуматрал ва парламентрал вакилтал, министерстварттал ва ведомстварттал, муниципал сакиншиннал, вузирдал зузалт ва студентътал, политикийсса партиярттал ва жяматийсса цачIуншивурттал каялувчитал ва цаймигу шагьрулул инсантал.
Митинг тIитIлай, Дагъусттаннал профсоюзирттал хъунама Аьбдулла МахIаммадовлул дакIнийн бувтунни хIакьину шин хъанахъишиву Къирим цила агьалинал биялалийну цIунилгу цила тарихийсса ватан Аьрасатнащал цачIун хьуну.
«Дагъусттаннал профсоюзирттал пикрилий, Къиримнал инсантурахь, цайми билаятирттал инсантурахь кунна, ихтияр дуссар цалва оьрмулул кьадар цахьхьунма ласун, цалва биялалий къуццу тIун, чил билаятирттал тIутIимунийх къалавгун.
Ва ххувшаврил кьимат цахъисгу лахъ хъанахъиссар, цанчирча Киеврайгу, Харьковрайгу, Одессалийгу, Украиннал цаймигу шагьрурдайгу демократиялул законнугу, нормардугу лиян дуллалисса чIумал, Властьру цалва агьалинащал талатисса чIумал, цалва халкьру литIлатIисса чIумал цачIун хьуну тIий Аьрасатнащал.
Так Къиримнал агьалинал кьянкьасса биялалийну, Аьрасатнал каялувчи Владимир Путиннул сивсусса хIукмулийну ва циняв аьрасатлувтурал кабакьаврийну бювхъуссар, граждан дяъвигу хьун къабивтун, Къирим зана бан цила аьмсса къатлувун – Аьрасатнавун. Муния махъ Украиннай хьусса иширттал, тIайланма учин, Киеврал хунталул цалва халкьуннащал Донбассрай байбивхьусса дяъвилул уттигу цал исват бунни Къиримнал ва Аьрасатнал тIайласса даву дуршиву.
Ми иширал паракьат хьун битлай бакъар Америка ва Евросоюзрал билаятру, мунияту баянгу бунни Аьрасатнан санкциярдал дяъви. Му тагьардануву жува аьла-ссалам буллали­ссару уссушиврийсса Къиримнал агьалинахь, баянгу буллалиссару жува къарши буклай бушиву Къиримнайн ва Аьрасатнайн тархъаншиврийн къаршисса гьужумирттайн. Жу мукунма къарши буклакиссару США-нал кIилийнусса стандартирттайн», — увкунни Аь. МахIаммадовлул. Мува куццуйсса ихтилат бунни митинграй Аьрасатнал Федерациялул Халкьуннал артист Айгум Айгумовлул. «Российский Союз ветеранов Афганистана» тIисса жяматийсса организациялул председатель МахIаммад Хадулаевлул цалва ихтилатраву гьарца Дагъусттанналгу, Къиримналгу, щалва Аьрасатналгу къатлун чIа кунни дакьаву ва буллугъшиву. «Авгъаннайсса дяъвилул иширттая, ветеран хIисаврай, ттун учин ччай бур: ччимур дяъви къуртал шай­ссар, душманталгу та-бунугу дакьил шайссар, чIаххулгу бухьувкун. Океандалул тийхсса билаятрал жуйнма къаршисса ци булларчагу, гайннал жуйнма буллалимур ссайнчIав къабуккантIиссар. Я Аьрасат, я Дагъусттан, ягу Къирим тачIав тайннал тIутIимунийх къалагайссар», — увкунни Хадулаевлул.
Митинграй ихтилатру бунни мукунма Къизлардал къазактурал обществалул къужрал советрал председатель атаман Виктор Быстровлул, ДР-лул Жяматийсса палаталул член Арсен ХIажиевлул, Каспийскаллал 6-мур школалул директор, «Матери России» тIисса жяматийсса организациялул республикалийсса отделениялул президиумрал член Мадина ХIамзатовал ва цайминнал.
Митинграя махъ ккаккан дунни Дагъус­ттаннал эстрадалул артистътурал ва оьрчIал творчествалул коллективирттал концерт.