Мартрал 17-нний Дагъусттан Республикалул официальсса делегациялул члентал, Симферополлайн бивну махъ, хьунабавкьунни Къирим Республикалул БакIчи Сергей Аксеновлущал.

ХIасан Аьдилов
Делегациялул бакIчи Аьлибаг Аьлиевлул Дагъусттаннал БакIчи Рамазан АьбдуллатIиповлул цIанияту уссушиврийсса республикалул бакIчинахь барча увкунни Аьрасатнавух хIала хьуну шин шаврил шадлугъру ва дуллунни бахшишругу, миннувух дия халкьуннал касмулул затру, Расул ХIамзатовлуясса кинорал диск ва МахIачкъалалиясса художественный изделияртту.
Сергей Аксеновлул хъунмасса барчаллагьрайну кьамул дунни барча бавуртту ва бувсунни Рамазан АьбдуллатIиповлухьгу ссалам буккайсса ва Къиримнавун хъамалу оьвтIий ушиву. С. Аксеновлул мукунма бувсунни цува Дагъус­ттаннайн учIаврия ивсса асардал хIакъиравугу. Ганал барчаллагь увкунни Дагъусттаннал каялувчинахь ва циняв дагъусттанлувтурахь Аьрасатнал регионнавату жулла республикалул цалчин уссушиврийсса кумаграл ка тIитIаврихлу, кIицI бунни мукунма дагъусттанлувтал гьурттуну бивкIшиву Къиримнал мизитру бакьин бавриву, ихIсандарал кумаг тIайла буккавриву «МахIачкъала – Симферополь» тIисса автопробеграву.
«Дус кIул шайссар ялун бала бивсса чIумал. Жуйн захIматсса кьини дурксса чIумал, жун хъинну аьркинну бия циняв аьрасатлувтураясса кумаг. Жун му кумаг хъинну асар хьунни», — увкунни Къирим Республикалул БакIчинал.
Аьлибаг Аьлиевлул бувсунни Дагъусттаннал делегациялущал архIал дуркIшиву 35 тонна оьрчIал къатраву хъуни буллалисса оьрчIансса кьай-кьуйлул, дукиялул. «Дукия дуссар экологиялул чулухату марцIсса, жулла республикалий ххяххан дурсса. Жу хIарачат барду оьрчIан чара бакъа аьркинмур личIи дуван», — увкунни Аьлибаг Аьлиевлул.
Сергей Аксеновлул бувсунни Дагъусттаннаясса хъус хьунадакьин тIий бушиву шадлугърал тагьардануву ва оьрчIачIан щаллуну диянтIишиву.