Хъаннил байрандалул хьунийн ххуйсса, мяйжаннугусса бахшиш хьунни вай гьантрай Каспийскалий мюрщултрансса «Звездочка» тIисса садик тIитIаву.

Залму АьбдурахIманова
Каспийскалий аьралуннал часть дирхьусса хIаятраву яхъанахъисса аьрали кулпатир­ттавасса оьрчIру бакъасса, ши­ккун кьамул буллантIиссар частьрал лагма-ялтту яхъанахъисса кулпатирттавасса оьрчIругу.
Садик тIитIлатIисса шадлугърал кьини шарикирттал ва тIутIал чIюлу дурсса цIусса садикрал хIаятравун бавтIун бия оьрчIру, вайннал нину-ппу, шиккун даврийн кьамул бувсса педагог-тарбиячитурал цIусса коллектив ва аьралуннаву къуллугъ буллалими.
Садикрал зузалт, мюрщулт ва вайннал нину- ппу барча бан шадлугърайн увкIун ия ДР-лул Халкьуннал Мажлисрал Председательнал хъиривчу Сайпуллагь Исакьов, Дагъусттаннал БакIчинал кумагчи Жамалуттин Оьмаров, № 95152 аьралуннал частьрал командирнал хъиривчу Заур МутIалинов, Каспийскалийсса «Единая Россия» партиялул исполкомрал отделениялул каялувчи Людмила Левицкая.
Шадлугъ тIитIлай, Жамалу­ттин Оьмаровлул кIицI лавгунни, садик бакьин бувну, зузи буваву хияллаву бакъа къачIалай бивкIсса, шиккусса халкьуннан ва иш мяйжаннугу агьамсса иширан ккаллийшиву.
— Ва ца шиккусса халкьуннал ххаришиву дакъасса, щалвагу Каспийскаллал оьрмулуву хьусса хьхьичIуннайшиврун хIисавсса ишри. Каспийскалийгу, щалва Дагъусттаннай кунма, оьрчIан садикирттаву кIанттурду биял къахъанахъимур масъала ца яла хьхьичI ххуттаймур масъала бур. Сайки мукьазарунниха ливчусса мюрщулт бур цалла чIун дияннин ирглий бавцIуну. Умуд бур чан-чанну тIий жулва шагьрулий ва къизгъинсса масъала иширайну щаллу буван бюхъантIишиврийн вания гихунмайгу укун къуццу тIурчан, — увкунни ванал.
Хъирив Сайпуллагь Исакьовлул бувсунни, цIана респуб­ликалий ялунсса кIулшивуртту дулайсса идарартту буллалаврих къулагъас хъуннасса душиву.
— Махъппурттуву республикалул оьрмулуву ххуйсса аьдат­рал гьану бизлазаврия дакI ххари хъанай дур. Барз-кIива ляхну республикалул цумур-цагу шагьрулий, районнал щархъаву садикру, школарду тIитIлай, ми щурущи буллай бур. Электрон сияхIрайн бувну цIана Дагъус­ттаннай бусса бур 67 азарва оьрчI садикирттайн гьан бувасса, — увкунни ванал.
С. Исакьовлул бусаврийну, Аьрасатнал Президент В.В.Путиннул «О мерах по реализации государственной политики в сфере образования и науки» тIисса ХIукмулийн бувну, 2016 шинайннин шанна шинавату арулла шинавун бияннинсса оьрчIал 100% школалийн гьаннинсса кIулшивуртту дуллалисса идарарттайн кьамул бувну бикIан аьркинну бусса бур. Мунияту республикалул бюджетрал хъунмур бутIа харж буллан ккаккан бувну бусса бур вай идарартту буллансса давурттан.
Дагъусттаннал ХIукуматрал ва цала чулуха Каспийскаллал халкь садик тIитIаврищал барчагу бувну, Сайпуллагь Исакьовлул умуд бивхьунни ва садикрава бувксса оьрчIая Каспийскаллал жяматран пахрулун лайкьсса халкь хьунтIишиврийн.
Хъамаллурал барча буллалисса ихтилатирттая махъ нитти-буттал ва оьрчIал лахъсса, ххарисса хъатурдихун ятIул лиссугу кьуркьуну, шадлугърал циняв гьурттучитал мюрщулт тIуркIу тIунсса, утту бишинсса, дукра дукансса ва цаймигу касмурду лахьлансса гъилисса ва гьарта-гьарзасса къатравух бувккунни.
Шагьрулул КIулшивуртту дулаврил управлениялул баян бувсса конкурс лайкьну дурхIусса ва цIусса садикрал хъунмурну бивтун бур жулва миллатрая­сса Карина Ссамадова. Ванил ппу Чакъалиятусса Ссамадов Апанни Каспийскаллал хъунама архитекторну зий ивкIун ур, нину тIурча, Каспийск шагьрулул оьрмулуву хъунмасса бутIа бивхьусса, Ваччиял шяравасса Ссамадова Зоя Тажуттиновнагу Каспийскаллал 44-сса оьрчIал садикрал хъунмурну зий бивкIун бур.
ЦIусса садикрал хъунмунил бусаврийну, шиккун 120-130 оьрчI кьамул бансса шартIру дузал дурну дусса дур. 60% аьралуннал оьрчIал кьамул буварча, 40% частьраву къазузисса кулпатирттавасса оьрчIал бикIан тIий бусса бур. Цалсса сакин бувну бусса бур оьрчIал 4 группа. ОьрчIру кьамул баврицIун,садик тIитIаврийну халкьуннан зунсса кIанттурдугу хьушиву хIисавравун ласун аьркинссар.
— Цалчин, ва ххарисса иширащалгу, шиккун занансса жулва оьрчIал нинухъру, оьрчIащал зунсса ттулва зузалт ва цинявгу жула хъами-душру ялун нанисса Хъаннил байрандалущалгу барча буллай, чIа учин ччива яла ххарими, ххуйми асарду, оьрмулул буцири неъматру ва оьрчIая пахрурду буллансса лахIзарду.
КIилчин, навагу, жул коллективгу умудрай буру, «цIусса чIапIи» рутлатисса кунма, ва садикраву жущара оьрчIан мюнпат-хайрсса цIушиннарду дуван бюхъантIишиврийн. Хъунмур кьюч бигьин умудрай бура гьарцагу оьрчIаву пагьму-гьунарду ляхълан, творчествалухух гьан буллан ва оьрчIру тарбия бувавриву уттизаманнул методру ишла дуллан, — увкунни Карина Ссамадовал ттущалсса ихтилатраву.
Каспийск шагьрулул гьарцагу аралуву хъуннасса гьур­ттушинна дувайсса, ва агьам­сса шадлугърай гьуртту хьусса МахIаммадова Таисия Билаловналгу кIицI лавгунни, гьантлия гьантлийн гьарта-гьарза хъанахъисса Каспийскаллан ца садик тIитIавугума хъинну щуркIал хьунсса, халкьуннал дакIурдиву вихшала, умуд цIакь хьунсса иширан ккаллийшиву. Ялун нанисса ххарисса ва тIааьнсса Хъаннил байрандалущал дакIнийхтуну циняв душру-хъами барчагу буллай, Таисия Билаловнал чIа увкунни садикрал щалвагу коллективран цIуллушиву ва тIайлабацIу.
Садикравун бувхсса циняв хъамаллуран хъинну дакI даркьунни шиву оьрчIру уттубишин, за дукан, тIуркIурду ва цаймигу творчествалул давурттаха зунсса кьай-кьуйлий, шартIирдай. Гьарта-гьарзасса ва чаннасса группардал къатраву бивхьуну бия гьарцагу оьрчI цуппа-цуппалу уттубишинсса цIусса шану-кIараллащалсса мюрщи кроватьру, суратру дихьлансса ва букки-чичин лахьлан­сса стол-кIантту, музыкалул ва къавтIавурттал дарсру лахьлан­сса инструментру. Гьарзатрай ябацIлай, ккавкнал дакI мяш хъанай дия.
Садик тIитIаврил шадлугърал ахирданий хъамаллуран ккаккан дурунни Дагъусттаннал эстрадалул балайчитурал ва Каспийскаллал магьирлугърал школардал цачIу хIадур дурсса концерт.