Март зурул 2-нний 55 шин хьунтIиссар ххаллилсса инсаннан, ЧIурттащиял шярава­сса Малланал арс МахIаммадов АхIмадлун.
Му цал ЧIурттащиял школалий уссия дуклай, яла – Гъумук. Къурталгу бувссар Гъумучиял школа физикалул ва математикалул дарсру лахьхьавриву хьхьичIунсса, итххявхсса выпускник хIисаврай ХIурматрал грамоталущал. Ца­ппара шиннардий зий уссия Лакрал райисполкомрал культуралул отделданий. Республикалийх цIа дурксса къавтIала Жамалуттин Муслимовлул каялувшиврийну «Гъази-Гъумучи» фольклорданул ансамбльданул гьану бивзминнавух АхIмад Маллаевичгу уссия.
ЛухIи хьхьирил флотрай аьра­ли бурж биттур бувну махъ му Кабардин-Балкарнал агромелиоративный институтравун дуклан ув­ххун, ххуйсса кьиматирттащал къуртал бувну бур мугу. ХьхьичIунсса выпускник хIисаврай зун тIайла ув­ккун ур Липецкаллал областьрайсса «Домачевский» тIисса цIанихсса, хъуннасса совхозрал хъунама инженерну. Миккугу мунал цува бюхъу-хIарачат бусса пишакар ушиву ккаккан бувну, совхозрал цIа гьаз дурну дур. Муния махъ зий ивкIун ур личIи-личIисса давурттай: тиккува Липецкаллал областьрай «Лев Толстой – Агроспецмонтаж» ООО-лул директорну; «Мирный» тIисса совхозрал хъунаману; Псковкаллал областьрал пиво дай завод­рал гендиректорну; «Интерстрой» тIисса строительная компаниялул хъунама инженерну. ХIакьинусса кьинигу мура компаниялий зий ур технический директорну ва гендиректорнал хъиривчуну.
Ми къуллугъирттай зузисса чIуннардий АхIмад Маллаевичлул дагъусттаннал инсантал давурттаву итххявхсса, бюхъу-бажар бусса бушиву исват бувссар, коллективраву мунал хIурмат хъунмассар, лагма-ялттуминначIагу сийлий уссар. Чил кIанттурдай цалва чулухунмай хIурмат буну, узданну къу­ццу тIисса, давриву хьхьичIунсса МахIаммадов АхIмад Аьрасатнал МИД-рал (КьатIаллил билаятир­ттал министерство) капстроительствалул ва собственностьрал департаментрал электроустановкардал хъунама экспертну Аьрасатнал МИД-рал му цимилагу тIайла увкссар кьатIаллил билаятирттайн, Аьрабнал Эмиратылийн, Эфиопиянавун ва цаймигу билаятир­ттайн, электроустановкардал даву тайнначIагу ххалдигьин, цанма кIулмур тайннан лахьхьин бан, тайнналмур даврил опыт лаласун.
Кулпат Асият Аминовнащал ххуйсса тарбия ва кIулшивуртту дуллунни арснан ва душнин. Арс Сиражуттин, Москавуллал энергетикалул институтгу ххуйну къуртал бувну, зий ур электроцехрал сменалул хъунаману «Газпром» ОАО-рай, душ Альбина дуклай бур Москавуллал индустриальный институтраву 5-мур курсирай. Нитти-буттал цIакьсса тарбиялун лайкьну къуццу тIутIисса, итххявхсса бур АхIмад Маллаевичлул арс ва душгу.
ДакIнийхтуну барча дуллай буру жула ххаллилсса дуснал, гъурбат­райгу лакрал цIа гьаз дуллалисса багьадурал юбилей. Ххари улланнав ина оьрмулул ва ичIувацириннал, жул ххаллилсса дус! ЦIуллушиву дулуннав вихьхьунгу, вил наслулухьхьунгу!
Дустал, гьалмахтал