КIундиятусса Шамиллул душ Хъунбуттаева Анисатлул Дагъусттаннал университетрал кьатIаллил билаятирттал мазру лахьхьайсса факультет ЯтIул дипломращал къуртал байхтува хиял бивкIун бур гихунмай элмулухун багьан. Гьашину мунил дурурччуну дур филологиялул элмурдал кандидат хьунсса диссертация, лакку, оьрус ва ингилис мазурдил фразеологизмарду ххалдигьлагьисса.
П. Рамазанова
Анисат цила монографиялуву «Богатство» («Хъус») тIисса лексема шанмагу кIицI лавгсса мазраву цачIу дирхьуну ххалдигьлай бур. Лакку мазраву му лексемалул кIира мяъна душиву хIисавравун лавсун:
1. товар, хъус дучIан дан;
2. имущество, хъус дусса.
Исвагьи литературалувугу «Хъус» тIисса лексема ишла даврил хъирив багьну, му бур «Богатство» тIисса концептравун лакку мазрай хъус, арцу, муси, аваданшиву дагьлай душиврул балжисса мисаллу буцлай. Хъунбуттаева Анисатлул монографиялул рецензия чирчуну дур профессор Роза ХIажиевал ва филологиялул элмурдал кандидат, доцент П. Д. ПаттахIовал. Редакторшиву дурну дур филологиялул элмурдал доктор, профессор Маллаева Зулайхатлул.
Анисат цIанакул зий бур учительтурал даву магьир дай институтраву хъунама преподавательну. Уттисса никирал ниттил маз лахьхьаврих дурагу къулагъас дакъасса заманнай, ниттил мазрал кIулшивуртту куртIгу, цIакьгу дуллан гъира­сса ва хIарачатрайсса аьлимтал бушаву, гьай-гьай, миллатрал мазрай дакIцIуцIаву думиннан тIааьн бизансса зат бур. Ниттил маз ахттар буллай элмурдал кандидат хьунсса диссертация дурурччуми барча бангу, ххари хьунгу сант дагьлай дур. ДакIнийхтуну барча буллай буру жугу Хъунбуттаева (Оьмариева) Анисат. Виву ялу-ялун цIакь хьуннав ниттил мазрахсса ччаву. Элмийсса давурттавугу тIайлабацIу баннав.