Уттигъанну ляличIийнува итххявхсса оьрчIансса Мурад Къажлаевлул цIанийсса школа байбивхьунни цIусса проект иширайну щаллу дуллай. Мунил лагрулуву цалчинсса шадлугъ хьунни Къизлар шагьрулул 1-мур оьрчIал искусствалул школалий. Му школалул оьрчIачIан ва кьини хъамалу бувкIун бия Мурад Къажлаевлул цIанийсса Республикалул искусствалул школа. Хьунабакьавугу ларгунни Дагъусттаннал Халкьуннал шаэр Расул ХIамзатовлул «…И живем мы сердце к сердцу — дети одного дома» тIисса ххуттардилу. ЦIусса проектран цIагу вара дур.
Бадрижамал Аьлиева
Ва проектрайн бувну Мурад Къажлаевлул цIанийсса школалул тарбиячитал гастрольданул турдай занан тIий бур Ухссавнил Ккавкказуллал Федерал Округрал шагьрурдайх. Мунил авторгу ур композитор, СССР-данул Халкьуннал артист Мурад Къажлаев цува. Ва проект сакин дурманал мурадругу бур оьрчIру ватан ххирану, патриотизмалул ва интернационализмалул зумуну тарбия баву, Ухссавнил Ккавкказуллал республикарттал дянив культуралул, творчествалул опыт кIибачIлачIисса хьунабакьавуртту даву.
Ва кьинисса батIавугу хьунни оьрчIал музыкалул мяйжаннугусса байранну. ОьрчIал кка­ккан дунни ххаллилсса концерт.
Къизлар шагьрулул администрациялул бакIчинал цалчинма хъиривчу Любовь Дубовал барчаллагь увкунни Мурад Къаж­лаевлухь ва ва школалул щалвагу коллективрахь цалла даву дазу-зума дакъа ххирашиврухлу, пишакаршиврухлу, махъа нанисса никирахсса личIлулсса бургаврихлу.
Мурад Къажлаевлул ва школалун дуллунни Г. ХIасанов, Н. Дагъиров, С. Агъабабов ва цува М. Къажлаев 1957 шинал Къизлардай буна рирщусса сурат.
Ва зурул ахирданий Къизлардал ОьрчIал искусствалул школа бучIан тIий бур Мурад Къажлаевлул цIанийсса школалийн хъамалу, педагогикалул ва методикалул опыт кIибачIаву мурадрай.
«…И живем мы сердце к сердцу — дети дома одного» проектрал лагрулуву тIурча М. Къажлаевлул цIанийсса искусствалул школалул оьрчIру чIал къавхьуну гьантIиссар Грозналлал М. Магомаевлул цIанийсса искусствалул школалийн.