Гужсса мурчащал (15 м./с.) гъарал ларчIсса январьданул 25-26-сса гьантрай МахIачкъалалив ттукI бакъа ливчIун ур 17 азара инсан.
Шагьрулун ттукI булайсса организациялул зузалтрал анаварсса мутталий яла агьамсса кIулшивуртту дулаврил ва цIуллу-сагъшиву дуруччаврил идарартту ттукIрал дузал буванмур бувну бур.
ТтукIрал ххаллу дазлазисса давуртту хъиривра дуван хъунмасса захIмат хьуну бур кьакъабагьавай марч бишлашаву ва ттукIрал ххаллайн, кIичIирттавун багьсса мурхьру сававну. Ххаллу дазаврил давурттайн бувккун бивкIун бур 25 инсанная сакин бувсса бригадартту, 5 спецтехника. Январьданул 26-нний шагьрулул вивсса кIичIиртту ттукIрал щаллу бувну бур. Муния махъ дайдирхьуну дур ухссавнил чулухсса МахIачкъалаллал кIичIирттаву ххаллу дазлазисса давурттив. Январьданул 27-ннингу 3 азараксса инсан ттукI бакъа ивкIссар.
«Дагэнерго» ОАО-лул директор Амир Амировлул бусаврийну, ххаллу дазаврил даву лахъи ларгун дур марч бацIарчагу гъараллу лачIлай диркIун тIий.
