Интернационал бурж би­ттур буллай жанну дуллуми дакIнийн бичин шиккун бувкIун бия Дагъусттаннал парламентрал вице-спикер, «Единая Россия» ДРО ВПП-лул секретарьнал хъиривчу Сайпуллагь Исакьов, ДР-лул захIматрал ва социал иширттал министр Малик Баглиев, генерал-майор Оьмар Муртузялиев, ДР-лул аьрали комиссар Дайтбек Мустапаев, МахIачкъала шагьрулул мэрнал цалчинма хъиривчу Рафик Буттаев, «Единая Ро­ссия» партиялул, жяматийсса ва ветерантурал организациярдал вакилтал, жагьи-жугьулт.

Митинг тIитIлай, ихтилат бун­ни Авгъанисттаннал ветерантурал координационный советрал председатель Оьмар Муртузялиевлул.
Цалва ихтилат байбишин хьхьичI, Оьмар Муртузялиевлул тавакъю бунни ливтIуминнал аьпалун минутIрайсса пахъ багьаву дан.
— Ва кьини 26 шинал хьхьичI Авгъаннава увкссар махъа-махъсса Совет Солдат. Гьарица шинах кунма, гьашинугу бавтIун буру жува чил аьрщарай жанну дуллусса интернационалистал дакIнийн бичин, Ватандалул хьхьичI цалва буржгу дакI марцIну лавхъун зана хьуминнахь барчаллагь учин. Жула билаятрал каялувчитурал азарахъул инсантал тIайла бувккун бивкIссар Авгъаннавун, цIусса власть цIакь хьуннин миннан кабакьу бан.
Та дяъвилуву Дагъусттаннал жагьилтурал ккаккан дурссар цалла чувшиву, кьянкьашиву, Дагъусттаннал аьралитал та билаятрай хъинну бусравну бивкIссар. Тай шиннардийри жулва билаят хьхьчIва-хьхьичI ххуйну хIадур хьусса ва ярагъуннил балгусса исламрал террористуращал хьунабавкьусса.
Миннал политика ва оьсса кьяйдарду хIакьинугу щуруй дур. Жунма чIалай бур респуб­ликалий хъанахъимур. Цаппара ххуй чулиннайсса дахханашивуртту хьунни. Амма жулва мурад куннан кув бувчIлай, дакьаврий оьрму бутавур, — увкунни Оьмар Муртузялиевлул.
Кьиблалул аьрали округрал каялувчитурал ва республикалул Аьрали комиссариатрал зузалтрал цIания митинграйн бавтIми барча бунни ДР-лул аьра­ли комиссар Дайтбек Мус­тапаевлул. Ванал кIицI лавгунни, аьрали иширттаву гьуртту хьусса гьарицагу инсаннах хъуннасса къулагъас дикIан аьркиншиву властьрал чулуха. Тай дяъвилул иширттаву интернационалистурал ккаккан дурссар ляличIисса чувшиву ва Ватандалийн тIайлашиву, — увкунни Дайтбек Мустапаевлул.
ДР-лул Халкьуннал Мажлисрал председательнал хъиривчу Сайпуллагь Исакьовлул цалва ихтилатраву кIицI лавгунни Авгъаннавусса дяъвилия 15 азарунния ливчусса инсантал зана къавхьушиву.
— Авгъаннавусса дяъвилул къюву тай иширттаву гьуртту хьуминнан дакъассагу, щалвагу шагьрулун асар хьуссар. ХIакьину жува бавтIун буру та дяъвилул иширттаву жанну дуллуми дакIнийн бичин. ХIукуматрал властьрал органнал къуллугърал ва инсаншиврул буржри захIматсса тагьардануву ливчIминнан кумаг баву. Авгъаннал ветерантуран ва тийх ливтIуминнал кулпатирттан асар хьунсса кумаг буллан аьркинссар ХIукуматрал. Махъсса 10 шинал лажиндарай, хьхьичIрасса шиннардих бурувгун, чIалансса кумагру бунни. Ларгсса шинал республикалул каялувчитурал Авгъаннаву къуллугъ буллай бивкIсса 60 аьраличунал кулпатран квартирардал кIулли дуллунни. ХIакьинусса кьини 500-ннийн бивсса инсантал ЗахIматрал ва социал иширттал министерствалий квартирарду ласун сияхIрай бавцIуну бур, — бувсунни Сайпуллагь Исакьовлул.
Республикалул захIматрал ва социал иширттал министр Малик Баглиевлул цалва ихтилат­раву кIицI лавгунни шиная шинайн аьрали иширттаву гьуртту хьуми чан хъанай бушиву. Мунийн бувну, Хъунмасса Буттал КIанттул цIанийсса дяъвилул ветерантурал ялун нанисса ник Ватан ххирану тарбия даву мурад­рай дуллай бивкIсса давуртту, гихуннай авгъанцынан дуллан багьантIишиву.
Министрнал бувсунни 2006 шиная шихунмай къатрал сертификатру 6-нния 60-ннийн бияннин ххишала хьушиву.
— Аьрасатнал субъектирдаву так жучIава, Дагъусттаннайри, авгъанцынан цала бюджетрава арцу итадакьлакьисса. Уттиния тихунмайгу жу миннахсса къулагъас чан хьун къаритантIиссар, — увкунни Малик Баглиевлул.
Хъирив ихтилат бунни аьрали иширттал ветеран, полковник Нисрет Исмяиловлул.
— Авгъанисттаннал чIявусса инсантурал оьрмурду къак-щук бувссар, азарвахъул кулпатир­ттал ялун хъуннасса кьурчIишиву диян дурссар. Та аьрщарай жанну дуллуссар чIявусса жула ватанлувтурал. Цаппарасса ясир багьссар, цаппарасса ятIа-тIар бакъа бакъахьуссар. Чансса бакъассар хIукуматрал наградарттан, орденнан лайкь хьусса, — бувсунни ветераннал.
— ХIакьину жул дустал чIявуми жущал бакъар, 1913 шинал сияхI­рай уссия 3600 авгъанец, ларгсса шинайннин минная 2700 инсан ливчIун ия.
КьурчIисса статистика.
Жува буссияв ххаллилсса саллатIталну, утти инсаншиву ядурсса инсанталну личIан аьркинссару, — увкунни Авгъанис­ттаннал Ветерантурал Дагъус­ттаннал Союзрал председатель Нажмуттин Акаевлул. Мунал тавакъю бунни захIматсса чIумал цаннал чIарав ца бацIияра, куннал куннан кумаг бувара куну.
Ихтилатру къуртал хьуну махъ Авгъаннаву жанну дуллуминнан дацIан дурсса лухIисса мармарчарил гьайкаллачIа тIутIив дирхьунни. Мичча интернационалистурал гьаттардий тIутIив дишин хIатталлив лавгунни.
Мура кьини ларкьунни Авгъаннаву жанну дуллуминнал аьпа­лун хьхьичI кьини «Спартак» спорткомплексраву тIиртIуну диркIсса дзюдорал Дагъусттаннал 14-мур чемпионат.