Зунттурду, ратIру, нехру, лахIунтту, хъач-бакIру – вайннулгурхха цалла макьаннай балай учайсса. Жулла вичIан къабаяй макьанну баяйсса пурмалийн дуцин бювхъума ур гьунарданул заллу. Га гьунар инсантурайх кIибачIин бюхъаву хъанай дур гьунарданул залуннал дакIнил хъиншиву. Гьай-гьай, кьюлтIсса, махIатталсса зат бакъар, балайчи, къавтIала, макьанну руцу гьайбатрал ва чурххал сий дусса уну ччан бикIай жунма. Мукунсса дакI хъун дакъасса, амма пашманминнал дакIру тирх учин дувайсса, зунттал халкьуннал аьдатру, багьу-бизу искусствалийн кIурабаен буллалисса маданиятрал минахур бур Гулжагьра Рамазанова.
Ларгсса Маданиятрал шинал Гулжагьра лайкь хьуну бур «Лучший работник культуры РД» завалун. Гулжагьра зий бур Ккуллал райондалул досуговый центрданучIасса фольклорданул пишакарну.
Ванил сахIналийнсса ххуллу байбивхьуну бур школалий дуклай бунува.
Гулжагьра бувссар ЧIяйннал шяраву Рамазаннул ва ХIуруннул дянив. Вайннал хъунмасса кулпат бивкIун бур (4 уссу, 4 ссу). Бутта ва нину, жула зунттал чIявуми инсантал кунма, колхозраву зий бивкIун бур, бутта хIухчуну, нину дояркану. ХIуруннулгу учайсса бивкIун бур цинна лархьхьусса такьвалий балай. БакIрая ниттиха лащан ччай, хъирив Мирханум Шариповал балай тIисса такьва ххуй дизлай бивкIун бур Гулжагьра. Кьанчуллалу гъуркIун дурцусса хьхьирунтрал, бяра бакIуй чIев-чIев тIий ихтилатрайсса чIелмултрал, къурув марща буван лавгний баяйсса ххюнкIрал «къакъабарду» бигьану лаласайсса диркIун дур душнил. Ванин тIабиаьтралва чIурду лаласаврил пагьму буллуну бур. Балайлул дарс дишайсса Амирова Зубайдатлул, ваниву бумур кIулну, чIявуну балай учин буллай, чIявусса маслихIатру бувайсса бивкIун бур. Школалий дувайсса байраннал циняв давурттавух гьуртту шайсса бивкIун бур. Школагу къуртал бувну, бувккуну бур Гулжагьрал Дагъусттаннал культуралул ва искусствалул училище. Яла, 1988 шинал, зун байбивхьуну бур Ккуллал райондалул культуралул къатлуву макьанну руцуну, хъирив – автоклубрал хъунмурну, худрукну. 2012-ку шиная шинмай зий бур райондалул досуговый центрданий фольклорданул пишакарну. Райондалул вив ва кьатIув шайсса циняв культуралул давурттавух гьуртту шайссар ва. 1995-ку шинал ва лавгун бур, лакрал шаннагу райондалул цачIусса фольклорданул коллективращал, Польшанал Закопан тIисса шагьрулийн. Тиха вай Мусил рикI ларсун бувкIун бур. Ганияр махъ Санкт-Петербурглив Дагъусттаннал культуралул кьинирдай гьуртту хьуну бур цачIун був коллективравух.
Махъсса шиннардий сахIналийн буккайсса балайчитурал, къавтIалтрал лахлай бур цалва миллатрал аслийсса культура ккаккан дуллалисса янна-ус. Мунилгу балай, къавтIаву хъиннура дюххан дуллан дикIай. Хъиннура даркьуну дикIай Гулжагьрай, лакрал миллатрал ца тIимуну хъанахъисса, арцул къуруширттащалсса бакIбахIу ва гьухъа. Ванил чIу бур цайминнаха къалавхьхьусса, хъинну кIукIлусса, махъру бувчIлачIисса, жула зунттал тIабиаьтрал ххуйшиву хьхьичI дацIан дуллалисса.
Гулжагьра яла чагъираву, пагьму-гьунар ялун личин буван бюхълахъисса чIумуву бур. ЧIа учинну жувагу ванин мукьахуннай культуралул давурттаву лахъ-лахъсса ххувшавуртту.
