Вай гьантрай МахIачкъалаллал администрациялул бакIчинал хъиривчу МахIаммадамин ХIажиев Архнадзорданул ва строительствалул отделданул каялувчи МахIаммад Аьзизовлущал ивну ур духсса къатраву яхъанахъисса халкь бизан бан цIусса къатри дуллалисса кIанттурдайн.
Шиккува дакIнийн бутан, федерал программалийн бувну, шагьрулул администрациялул пишакартал зий бусса бур О. Кошевойлул цIанийсса кIичIираву ва «Эльтав» заводрал чIарав 16 зивулийсса къатри дуллай байбишинтIисса давурттал ялув. Вай къатравун бизан буван тIий бусса бур дух хьусса къатраву ялапар хъанахъими. Халкьуннащал дурсса икьралданийн бувну, О. Кошевойлул цIанийсса кIичIираву духсса къатраву ялапар хъанахъисса халкьуннан ччан бивкIун бур цивппа бусса микрорайондалийва къатри дуван. Халкьуннан ччан бивкIсса куццуй шагьрулул администрациялул ккаккан дурссар давурттив нансса кIану. ЧIярузивулийсса къатри дуван ккаккан бувсса кIанай халкь заллусса 18 гараж ва чIаравсса детсадрал сушилка бусса бур. Ккаккан дурсса чIумуйннин лахъ къатри дурну халкьуннайн тапшур даншиврул строительтуран гиккусса гаражру ва сушилка лекьан буван багьлай бусса бур. Ва иширащал къарязисса микрорайондалул халкь бувккун бур митинграйн. Вайннал тIимунийн бувну, гаражру лекьан баврищал вай рязийну бакъасса бур ва ливчIмур кIанай цалва оьрчIру тIуркIу тIунсса площадка бан ччай бусса бур. Къарязисса халкьуннащал ихтилат бан увкIсса МахIаммадамин ХIажиевлул бувсун бур шикку 12 зиву дусса лахъ къатри дикIантIишиву ва ванил строительство гьашинусса шинал декабрьданул ахирданий къуртал хьунтIишиву. Вай къатри дуллалисса давурттах хъуннасса къулагъас дикIан тIий дусса дур Дагъусттаннал ва МахIачкъалаллал бакIчитурал чулухагу.
Шагьрулул бакIчинал хъиривчунал баян бувну бур къатри дурну махъ, строительтурал лагма-ялтту марцI бувну, лавкьуну махъ, оьрчIансса площадкагу бантIишиву.
Хъиривмур кьини лахъ къатри дувансса кIанайсса халкьуннал гаражру лекьан буллалисса давурттив щурущи дурну дур.
