Ларгсса нюжмар кьини МахIачкъалалив Дусшиврул къатлуву хьунни Кураевлул цIанийсса ДРКБ-лувусса онкогематологиялул отделениялуву хъин хъанахъисса оьрчIансса ихIсандалул акция. Акциялул сакиншинна дурну дия, «Единая Россия» партиялул жаваблувшиннаралу, «Живи и дари жизнь другим» тIисса ихIсандалул фондрал.
Акция цурдагу хас дурну дия февральданул 15-нний щаллагу дунияллий дувайсса онкологиялул азаруннил къашавайсса оьрчIал Кьинилун хасну.

Къашавайсса оьрчIал ялун биян бувкIсса хъамаллуравух ия МахIачкъалаллал администрациялул бакIчинал хъиривчу Рафик Буттаев, Советский ва Кировский районнал каялувчитал, ДР-лул Халкьуннал Мажлисрал депутатътал, министерстварттал ва ведомстварттал пишакартал ва жяматийсса сакиншиннардил вакилтал.
Хъамаллурал оьрчIан цIуллу-сагъшиву ва вайннал нитти-буттан ссавур чIа тIисса махъру лавхъун махъ, акциялийн бувкIминнал хьхьичI махъру лавхъунни ва оьсса азарданущалсса талатавриву ххув хьуминналгу.
Дусшиврул къатлул жанахI­раву акциялул хахливу хьунни оьсса азаруннил инжитсса оьрчIал каруннил дурсса затирдал ихIсандалул аукцион ва «Судьба особого режима» тIисса фотовыставка. Аукциондалий гьуртту хьуминнал машан ларсунни суратирттайну цала хияллал дуниял тIиртIусса ДРКБ-лийсса отделениялий хъин хъанахъисса оьрчIал дирхьусса караматсса рангирдал суратру. Аукциондалий хьусса арцу сакиншинначитурал харж дуван тIий бусса бур мюрщи къашайшалтран даруртту, аьркинсса оборудование машан ласун.
«Живи и дари жизнь другим» тIисса ихIсандалул фондрал каялувчи Лейла Каримовал циняв шиккун бувкIминнахь барчаллагь тIий, кIицI лавгунни укунсса къашайшалтран, чIивисса бунугу, бувсса гьарнал кумаг хъуннасса, багьа бакъасса чувшиврун ккаллийшиву.
Акциялул ахирданий фонд­рал каялувчинал цала чIарах бацIаврихлу хъунмасса барчаллагь баян бувунни шагьрулул администрациялул бакIчи МахIаммад Сулаймановлуйн, шаннагу райондалул хъуними – СалихI Сагидовлуйн, МахIмуд Амиралаевлуйн ва ХIажияв Дар­бишевлуйн.