БакIрачIан бувкIмургу чувшиврий бурувччуну, Дагъусттаннан ва Аьрасай паччахIлугъран хъунисса хъинбалардугу биян бувну, чIун дакъа аьпалухьхьун лавгсса, Ккуллал шяравасса Оьргъухъал КьурбанмахIаммадлуя учин ччай бур цаппара затру.

«Дакъакъархьуну хъуслилгу, икъавкIуну чувналгу кьадру кIул къашайссар» тIисса зат хIакьсса бур. Кулпатрангу, оьрчIангу, архIал зий бивкIминнангу, хIатта паччахIлугърангу, дунияллия лавгун махъ кIул хьуна ванал кьимат цуксса лахъсса даражалийн бивну бивкIссарив. Дунияллийсса хъинмуницIун кабакьлай, цана цува хъамаивтун, Ккуллал колхозрая айивхьуну, Дагъусттаннан, щалвагу Аьрасатнан, хIатта чил паччахIлугъирттан цалла элмийсса давурттайну хъунисса хайрду биян бувсса инсан хьуна Оьргъухъал КьурбанмахIаммад. Пахру, ххара, бахшишру КьурбанмахIаммадлун аьркинну дакъая. ЛяличIисса, чиха къалавхьхьусса, дугърисса хасият­рал залуннал учаймур, бусаймур, дуллалисса даврил хIакъи-хIисав цанналусса дикIайва. Укунсса инсан абадлий дунияллийва яхъанан тIини кунмасса асаргу хъанан бикIай чIявуссаннан. Мукунсса инсан дунияллия лавгни, дакIнийн багьлангу бикIай балайлул ххару:

Агь, ттул магьилул хIавий,
инагу лахIайссияв?
Бюхттул зунттай банавшай,
вийхгу сил ритайссияв?

Махъгу-хьхьичIгу гьарца чув ивчIантIишиву кIулнугу, мукунсса инсаннал бивкIугу дакIнил асардаща бухIан къа­хъанан бикIай. ДакIний бур, КьурбанмахIаммадлул ниттихь, Шамай-бавахь: «Цукун дура?» – куний, кIанил жаваб дуллуна: «Цукун дикIава, дирчIайния тIий дура. Ттуяра 15 шинал чIивисса, нава хъара-къутай итлай хъуна увсса Аскандар ивкIлайни, на ший ци дуллай дикIава? Гьакссагу дирчIайния тIий дура…»
КьурбанмахIаммад цIа дур­к­­сса профессорнал, халкьуннал хIакиннал, Аскандар Ма­ссуевичлул ссил арс ия. Кьур­банмахIаммадлунгу Аскандар чувшиврул эбрат ласайсса инсан хьуна. Оьргъухъал агьулданул чIявуми чиваркIунная халкьуннал хIакинтал хьуни, Кьур­банмахIаммадлуя гъаттарал духтур хьуна. Чувшиву ва чумартшиву цаву бюхттулсса, ххаллилсса бакIрал, чурххал залуннан элмулуха, давриха, агьалинал маэшат ххуй бавриха гьарзад хъамадиртун дикIайва. Цахава лавхьхьуми цачIанма гъан буллай, миннал шарикну цувагу ацIайва. Ххуйсса, ххаллилсса инсан ия КьурбанмахIаммад учирчан, му бачIвасса махъри. Ва ия ляличIисса, мукъуйну сурат чичин захIматсса, цалла ххаллилшивруя нузру ларкьусса, мармарчарил гьайкал кунасса инсан.
Ветеринар элмурдал доктор, профессор Рамазаннул арс Оьргъуев КьурбанмахIаммад увну ур 1933 шинал Хъунккуллал шяраву Шамай-бавал ва Оьргъухъал Шагьрамазаннул (Шагьразул) кулпатраву хьхьичI-оьрчIну. Шагьразул буттал Оьргъу Сулайманнул уссу – Оьргъу Кьуби, Къазан-Татарнаву диндалул элмугу лархьхьуну, мунияр махъ Мисрилив Аль-Азгьар университетгу къуртал бувну, накьшибандитурал тIарикьатрал ххуллул шарик ивкIун ур. Та заманнай, бусурман дин зумувнугума, Дагъусттаннал зума-къирагърайсса Ккуллал жяматран бувчIин бувахьунссия Оьргъухъал халкь 19-чинмур ттуршукулул дязаннив цукссава хьхьичIунмай хъит кусса халкь бивкIссарив. Оьргъу Кьурбаннул щарсса, Дурнахъал Кьубанчи­хъал душ Ханича, 4 оьрчIал ялату бивкIукун, ванал кIилчин кулпатгу къабувну, накьшибандитурал диндалул саннарду дуклай, мудан Аллагьнайн лаизлай, ххуллийх нанинигума чих къауругайсса инсан ивкIун ур. Оьргъу Кьурбаннул арснал арсная Шамиллуя хьуну ур хьхьичIа-хьхьичIсса хIакин. Бакуй институт къуртал був­сса Шамил тиччава дяъвилийн увцуну, зана къавхьуну ур. Зана къавхьуну ур ванал уссу Ниязбаггу. Махъва-махъсса чагъар Шамиллул бувкIуна тIар: «Ттул больницагу немецнал ччувччунни, жувагу поездрай чуннив бувцуну най буру», – тIисса. Та поездгу немецнал пIякь учин бувну бивкIун бур. Кулпат бакъулт, мина дакъулт, гьав дакъулт Оьргъухъаягу цимигу хьуну ур.
Оьргъу Кьубил уссил Абакардулми оьрчIаягу, Оьргъуя тIайла хьуну, хIакинтал хьуна. Оьргъу Кьубил Сулайман тIима уссил арснал Шагьрамазаннул арс ия КьурбанмахIаммад.
1937-ку шинал, Оьргъу Сулайман увгьуну махъ, кулпатран кка­ккан бувцириннуя буслай бусан къашавай дикIайва Шамай-бава. Кулпат къатлува буккан бувну, яхъанан лувчIиннийсса ца къатта ккаккан бувну бия тIар. Къама бичай сурду, арцул чиллу бусса балчаннул али-кIили, мурцIу-къатта зевххуну бур. Зувива ттизай оьл, 300 яттил хIайван, цIухху-бусу къабувну, бувцуну бур. КIункIурдавух, вяртIуллавух буклай, гьарзат дучIимур зерххуна тIар, зучIа, троцкистурачIа, ккулактурачIа, къабучIиссар цичIар дикIан тIий. Щалла захIматшиву цинна шайва тIар, цанчирчан Шагьрамазан тиха-шиха, кирилийх, Кураллавух, заназисса къаацIайва тIар. Га акъани, циллагу дакI рахIатну дикIайва тIар, хъус зеххирчангу баччи ба­къар, цува къаугьарчан тIий.
Хансса бия Къанна Масул душ Шамай. Кьинирдал ца кьини, задру зехху увкIуни, дуссияв тIар дитира вай али-цIихъарагу, мурцIукъаттавагу, жучIа мюрщи­сса, ппу ивкIусса душ ва оьрчIгу буссарча тIийча, кьацI къабащарчан, инарагу дугьанну увкунни тIар. «Ягъар, вил алхIан-аьпа бухлавгун байлитIивуй, на ссахлу дугьанна, ци къел дурну тIий дугьанна?! Ина зехлан хъус ядурну тIий дугьаннав, ккутI щун щялу дакъасса къазий! Дукку шива, дарбадан, дугьан халкь бучIарчан, дургьуну гьанна, ва ятинсса душгу ттущала бувцуну!» – куну, та дарбадан, къинттуллухун щилай, уккан увссия тIар. Яла дура тIар дугьан инсантал бучIаннин ялугьлай. Дугьан инсангу къаувкIунни тIар, ххишала «дарбадангу» къаувкIунни тIар.
«Инарагу дуцарача, бавай, кьадикIу, ласун ити», – тIий, гьухъу­цIун лачIлай чIивисса Кьур­банмахIаммадгу икIайсса ивкIун ур. Зувиллий мяйра шинай, хъуначуная айивхьуну, щарнил юзбашишиву дурсса, 6 оьрчIал ппу, оьрчIал оьрчIал къюмай хьуну махъ, хьхьунил хьхьудяризал шанувату уккан увну, ялтту янна лаххансса мажал къабуллуну, хьхьурай дишай ххячарттул тIакьлуву, Ваччав прокурорну зузисса ЦIахъардал Вагьаблул, ттупангирал къуннагъ къинттуллухун щилай, хьхьичI авкьуну нанийни, леххаву тIий ия тIар: «Да, арамтал, на ивчIан чIиви акъара, так ттуй­сса тахсирданун цIа бусиракьай?!» – тIийча, ЦIахъардал Вагьаб ия тIар: «Да, хIарамзада, ина уттигу Къурхъмасовлун къячIив дуллан ччайвагу акъарав?» – тIий.
Буттал ппу увгьусса чIумал КьурбанмахIаммад 5 шинавусса чIиви оьрчI ивкIун ур. Та сурат такIуй дакIния къадуккай тIий, буслан икIайва. АьтIий уссияв куну, цIувххукун: «Туну, циняв аьтIий бия, нагу аьтIий уссияв», – учайва, цайва ца хъунмасса тахсир хьуни кунма.
Укун дунияллул гъунттулу яла тIайламур паччахIлугъ дишин бувкIсса коммунистурал цIакьсса чIанкIрал – Дагъла Аьзихъал (укун учайва хьхьичIунмай Оьргъу­хъайн) бакI кьуркьуна.
1941-ку шинал ахирданий КьурбанмахIаммадлул ппу, 40 шинавун увхсса Шагьрамазан, дяъвилийн увцуна. 1912-ку шинал бувсса Шамай 3 цила оьрчIащал ва ивкIусса ласнауссил 2 оьрчIащал шаппа ливчIуна. 1936-ку шинал увсса Масу тIима оьрчI ппу аьрая зана хьуннин, ккашил кIюла ув­ккун, ивкIуна. ШамайчIа ливчIсса ласнауссил мюрщисса арс ва душ яла махъ бикIайва буслай, Шамай-баван цилами оьрчIаяр цив ххира­сса бияв тIий.
Шагьрамазан, Курская дугалий талай унува, немецнахьхьун ясирну иривну, цайминнащал архIал шанзивулийсса къатлувун авкьуну ивкIун ур. «Багьана ба­къанма ппу увгьусса, нава, сагъну личIарчан, жуламинналгу къаитан­ссара, оьрчIангу ккаккан къабув къабитанссар», – тIисса пикри хьусса Шагьрамазан хьхьувай шанзивулия, ивчIангу-уккангу, чIавахьулттийх ххявххун ур. КIивагу ччангу гъавгъун, ххярклий хьхьу-чани хьуннин чун уккангу най ивкIун ур. КIюрххицIун ца ппалничIан ивну ур. Гиву лявкъуну бур госпиталлайн биян бан хIадур бувсса, щавурду дирсса жула саллатI. Гайннащал увцуну ур Рамазангу. КIива-шанма зуруй госпиталлай ччанну хъин бувну махъ, комиссовать увну, шавай итаакьлайсса Рамазаннул командирнахь миннат бувну бур: «Утти жулами ххув хьунсса вихшалагу хьуннича, на, шаймур дуллай, дяъви къуртал хьуннин ацIавияв», – куну. Ттупанг къабитларчангу, саллатIнал янна-ус дакьин дуллай, шаймур буллай авцIуна тиккува. Шавай зана хьуна так 1946-ку шинал.
КьурбанмахIаммад, Ккулув 7 классгу къуртал бувну, 10 къуртал банцIакул ЧIяйннал дянивмур даражалул школалийн занай ия. ЧIун, гьай-гьай, кьянатсса дия. ДакI цIурхьхьу тIисса ниттил Шамайл, инил 6 гуржи дурну, ца-ца кьини ца-ца дуки куну, бурчул кьуцурттуву дирхьуну, КьурбанмахIаммад ЧIяв тIайла уккайва. МахIаммад идавсил куну бакъарив: «Элму лахьхьин, баргъбуккавал чулуха айивхьуну, баргълагавал чулухун ияннин насу», – куну. Бувкунача ккаши та чIумалсса оьрчIал… Мунияту хьуви, Ккуллал халкьуннан бакъассагу, щала Дагъусттаннал халкьуннан ччатI ххирасса! КьурбанмахIаммадлунгу ччатIухсса ишттахI такIуй къалив­ххуна. ИкIайхьунссия цащала чIун архIалсса лакрал шаэр Ссугъури Увайсовлул балай тикрал буллай:

Ттул лякьлун ккавккуссар
ккашилсса юргъа,
ХIасратрал бувккуссар
оьрмулийх гъургъа…

1951-ку шинал школагу къуртал бувну, КьурбанмахIаммад ув­ххуна Дагъусттаннал шяраваллил хозяйствалул институтрал ветеринар факультетрайн. 1956-ку шинал институт къуртал байхту, паччахIлугърал амрулийн бувну, 2 шинайсса тIайла увккуна Таджикисттаннайн ветврачну зун. Ванал кIулшиву ва элмулух­сса шавкьгу хIисав хьуну, тичча ва увцуна Таджикнал Элмурдал академиялучIасса Элмулул ва хъиривлаявурттал институтраву зун. Амма КьурбанмахIаммадлун «кьатIув» лахъи лагансса хиял бакъая. Ххишалдаран, шаппа ялугьлай хъунив хьусса нину-ппу ва ппу дяъвилия увкIун махъ увсса 2 уссугу бия. Буттал ппу увгьуну, ца барзвагу къавхьуну, бивтун увтун махъ кулпатрал щалва умуд ванайн бикIайва. Ккуллал Гьарун Саэдовлул цIанийсса колхозраву зун лайкьсса ветврач аьркинни тIий, леххаврий председатель МахIаммадхIажигу ия. КьурбанмахIаммад 1958-ку шинал ахирданий зана хьуна бу­ттал шяравун, ва най унува ивтуна Ккуллал колхозрал Кочубейлив­сса, районнал дянивсса ветеринар лабораториялул хъунаману. МахIаммадхIажинал ххаришиврул дазу-зума дакъая, цанчирчан, ахирданийгу, ванал тIалав увна колхозрай зун элму дурккусса ветврач. Дяъви къуртал хьуну махъсса 10 шин Ккуллал жяматран яла захIматми шинну хьуна. Кьянатшиву къаккарксса мюрщимигу, хъунимигу шикку бакъая. Хъунмасса талихIран хIисав бан бучIиссар 1956-ку шинал колхозрал председательну ХIажиев МахIаммадхIажи итаву. Ванан кIулну бия экономика гьаз дан­сса тагьар ятту-гъаттара ябавриву душиву. Амма яттил аьдад, личIи-личIисса азарду диллай, чан хъанай дия. Мунийн бувну аьркинну ия ххуйсса специалист-ветврач. МахIаммадхIажи ва Кьур­­банмахIаммад ччяни цаннан ца бувчIуна. Цалла даву хъинну кIулсса, ца ххуллийх, ца пикрилий, маччашиврий, дусшиврий, элму ххирашиврий бакъагу, халкьуннал ахIвал лавай баврил цIаний жанну дулун хIадурсса чиваркI бухьувкун, цала-цала кIанттай кIиягу колхоз гьаз дуллай булувкьуна. ХIаллицIух кьянатшиврула буклай байбивхьуна Ккуллал жяматгу. Бан-битан бакъасса дяъвилул шиннардий цикссагу кIанттурдай кавс ливссуну хъуру дурссия. Амма тIабиаьтрал шартIирдая къабурувччусса, 2000 метралул океандалуяр лахъсса зунттал билаятрай ми хъурунная бувсса захIматран лавхьхьусса хайр биллай бакъая. Ухьунссия колхозрал председатель МахIаммадхIажигу аьрипсса чув, жагьилсса, дахьа институт къуртал бувсса КьурбанмахIаммадлуйн колхозрал ризкьилул щала вихшала дишин бювхъусса. Ухьун­ссия КьурбанмахIаммадгу лайкьсса чув, цайнна дурсса вихшала цIакьну биттур дан бювхъусса. МахIаммадхIажинал Кочубейлив тIивтIуна КьурбанмахIаммадлун элмулул «палегон». Угу-увкуна: «Ччимур хIайвандалий эксперимент бува, амма жула ятту ци азардал вакссава баччибакъа литIлатIиссаривгу кIул бува. КъакIул буварчан – я на председатель акъара, я ина гъаттарал духтур акъара. Жула халкьуннал вин ччимур даву дайшиву ттуннияр хъинну винмагу кIулссар. Аьркиншиву дагьарчан, ттул цIания вина кумагран ччима колхозникгу тIалав ува. Ттул щала умуд утти вийнни, даврихун агьу».

 

 

 

КьурбанмахIаммадлулгу, лахъи лаган къабивтун, опытру буллай, кIул дурна ятту ци азардал литIлатIиссарив ва ми азардан савав шайсса дарурттугу уттинин чувчIав бакъашиву, къабувшиву. Ятту бия нукIура, лап чанну, чил паччахIлугъирттай дакъа къалархьхьусса, ятту-гъаттарал хханххираву шайсса личIи-личIисса азардал литIлай. Миннуйн аьмну учайва «Клостридиозы» куну. Мивун духлай дия анаварну лахъайсса чIярусса цIуцIавуртту. Ризкьилул вив лувгъи хъанахъисса микробирттал итабакьайсса бия токсинну, яни загьру, цалгу анаварсса мутталий литIун байсса ризкьи. КьурбанмахIаммадлун багьуна, такIуй дакIни-мазрай къабивкIсса микробиологнал давурттахун агьну, ссятирттай ми лахьлан. Хъиривва айивхьуна ми азардансса даруртту буккан бансса сантирах луглай, яни, яттин зарал къавхьуну, ми микроорганизмарду литIун дансса куц ххал буллай. ХIаллицIух мунал буккан бувна кьувахъул вакцина, яни яттинсса дарув. Ми даруртту ишла буллан бивкIун махъ хъинну лахъ хьуна колхозрал яттил аьдад. 1963-ку шинал му аьдад дируна 61000-ннийн. Тай шиннардий кунма аваданну къабивкIссар Ккуллал жямат. ЗахIматрал кьинирдах вайннал ласайва тоннардайсса къама, яттил гьухъаллу. 1966-ку шинал, Кочубейлив зийгу унува, КьурбанмахIаммадлул дурурччуна элмурдал кандидатнал диссертация, ваная хьуна ветеринар элмурдал кандидат. Колхозрал ризкьи буруччиншиврул ччаннай авцIусса КьурбанмахIаммадлуя хьуна цIакьсса микробиолог. Ва дия хъинну захIматсса, уттигума диялну лахьхьин дурасса микробиологнал сянат. Жулла дуниял лярхъуну махъ хьхьичIра-хьхьичI дунияллийн лярхъусса рухIирдал – микробирттал аьдад лап хъуннасса дур. Циксса лахьларчангу, аьлимтурал тIутIимунийн бувну, уттигу миннул ацIва бутIул ца бутIа бакъа лахьхьин бувар. Мунил савав, ми рухIру мюрщисса дуну, янин ххал къашаву дур. Клостридиозругу (ризкьилул вив яшайсса ца клеткалия сакин хьусса паразитру) мукунсса рухIру дур. Укун дакIний-мазрай къадиркIсса даврихун агьан багьуна КьурбанмахIаммадлун – Ккуллал уздансса колхозрая айивхьуну, щала Дагъусттаннал ва Аьрасатнал ризкьи, хаснува ятту ххассал буллансса давурттив дуллай.
Жагьилшивугу, даву ххирашивугу, устталугъгу, учаймунил, бусаймунил ляличIишивугу, пикрилул лагругу ишла дуллай, улувкьуну ия КьурбанмахIаммад яттил азардал гьану лахьлай. ДакI марцIсса, тIайламур бацIан байсса, шилтагъмунищал дяъвилий уккайсса, чIявуну тIайламур сававрай хъуниминнан хас акъасса, дустуращал дакI тIайласса ва вин ччимур кумаг бан хIадурсса, циняв инсантурал диялдакъашивурттаву лавмартшиву багъишла къадитайсса, бутта кунасса, буттал ппу кунасса, агьлу-зурият, мачча-гъанми, щала Ккуллал щар ххирасса, Дагъла Аьзихъал арулва арххалийх нанисса дугъришиву цаву цалархIал хIасул хьусса инсан ия Оьргъухъал КьурбанмахIаммад. Ихтилат байва иминну, багьан бувну, махъ ца-ца бутлай, алвагьну, такIуй гьавасирттахун къабувтун, вичIилухух тIааьнну бишлашисса цанмалусса лугъатрай, амма дикIуя ттаркI батIул дансса мяъналий.
Инсан тарбия увну-къаувну тIун бикIай. Ттулва пикрилий, му оьванмасса зад бур. Тарбиялул 90% ниттил лякьлуватура дикIай. Аьлимтурал бусласимунийн бувну, ххуймигу, оьккимигу къириятру 100 никирал махъгу тикрал шайссар тIар. Ми 2000 шин хъанахъиссар. КьурбанмахIаммадлул ппу аьрая зана хьуну махъ бувсса цала уссурвавраятугу – Сулайманнуя (1947) ва Рабадиннуя (1951) тIалав дайва мура инсаншиву ва къирият, интеллигентшиву. Хъунив хъанахъисса нитти-буттан захIмат къахьун, ми ванал цачIанма бувцуну, дуккингу бувну, оьрмулул ххуллийнгу бивчуна.
Даву дан тивталсса Ккуллал жяматрава, паччахIлугъраха хъус дарцуну авадан хьусса инсан акъахьунссар. Кочубейлив 1958-ку шиная 1967-ку шиналнин зий ивкIсса КьурбанмахIаммадлухь вин ччикунсса каши дия лавайсса даражалул кьяйдалий яхъанансса. Амма ванал учайва: «ЖучIара дикIан аьркинмур жура захIмат бувну ляркъумурди», – куну. ТIайла дакъа ляркъумунил заллугу къавхьуна. Та ккаши-мякьсса ва тахсир бакъа халкь репрессиялул хьун буллалисса замана лавгун, элмулухун агьансса каши дирияйхту, Москавуллал зума-къирагърайсса, чIявучия кьюлтI бувсса, элмурдал институтраву, хъунмасса захIмат бивхьуну, ванал 1981-ку шинал докторнал диссертация цалийн дуккан дуруна.
Амма акъая КьурбанмахIаммад пасикьгу. Хъинну ххирая ванан тяхъашивугу, дустуращалсса щяикIаву-изавугу. КьурбанмахIаммадлул хьхьичIунсса дус, профессор ХIажи Аьбдуллаевич Аьбдуллаев (АьлилхIажи) буслай ур: «Ттул дус КьурбанмахIаммад ия нартнал кунмасса битавсса чурххал заллу, тIабиаьтралла цIакьсса цIуллушиву дуллусса инсан. Хъинну дуккан дурсса чяйгу хIачIайва, бачIи стакан качарданулгу бивчуну, пIапIрусгу зумату хIура къадайссия. Москавлив увкIтари, тийх аспирантуралуву ккалаккисса ттучIая ликкайсса. На ичIува унугу, акъанугу, бавтIун за дукан ххирасса ттул дусталгу, тIитIинтIиссия ссупра, дишинтIиссия «увгьуну гьануксса хIан». Гайннащал цувагу икIантIиссия, зал хъамаивтун, канай, хIачIлай, кайп буллай. Ссят кIинний дакIнийн багьантIиссия шампанский хIачIан. «Да, ресторанну лавкьуссар, кIюрххилнин ссавур да!» «Да, ци тIий ура ина, ваксса хIачIан ччисса чIумал къахIарчIун, кIюрххилнин циван ацIава», – куну, таксилий рестораннавух увккун, учIантIиссия ляркъуну. Зий ухьурчан, гьантлун 16-18 ссятрай зун икIайсса ия КьурбанмахIаммад. Игьалаган ччисса чIумал, дуниял хъамадиртун, кайп буллан икIайссагу ия. Ттун ккавккуна га кIулми, ганащал зузими, цуксса ганан элму кIулшиврийн мукIруну, ганал хIурматрай лавай бавцIуну бивкIссарив».
1967-ку шинал МахIачкъалалив Ветеринар институт тIитIайхту, гикку зун тIалав увна КьурбанмахIаммад. Дайдирхьуна ванал хIакьсса аьлимчунал давурттив. 1972-ку шинал дурсса даврихлу ванан дуллуна хъунама элмурдал зузалал цIа. Микробиолог хьуну, аьдад дакъасса микробирттал паччахIлугърай КьурбанмахIаммадлул лякъайва ятту-гъаттарайн азарду диян дуллалисса сававртту. Ва дия хъунмасса хайр биян буллалисса даву. Хъунмур маэшат ризкьилий буллалисса Дагъусттаннал колхозирттаву ятту-гъаттара литIаврийну миллионнансса зараллу хъанай бивкIссар. Гьунар бусса аьлимчу КьурбанмахIаммадлул буккан бувссар дунияллийн ризкьи хъин буллансса вакцинарду. Ми ххалбивгьуссар Гьарун Саэдовлул цIанийсса колхозрал «полигондалий». Ми дарурттайн аьмну «политаксин» учайва. КьурбанмахIаммадлул ккаккан бувсса дозарду ишла бувну, буручлан бивкIссар ятту-гъаттара, хъун хъанай дарчуссар миннул аьдад. Машгьур хьуссар щалагу Совет Союзрай профессор КьурбанмахIаммад Ургъуевлул цIа. Ванал дурсса давурттал багьа бивщуну, дуллуссар СССР-данул ВДНХ-лул арцул медаль – та чIумалсса лахъсса награда. СССР-данул Министртурал Советрал хьхьичI бивхьуна масъала – ятту-гъаттарал чIярусса цIуцIавурттан савав шайсса вакцинарду итабакьин. Му проектрал хъунаманугу ацIан увна профессор Ургъуев. Му давугу ванал щаллу дурна чув мяш хьунсса куццуй, хъинну лажин кIялану. Мунийну паччахIлугъран биян бувна миллионнансса, чIун хIисавравун ласурчан, миллиардирдансса мюнпат.
Профессор Юсупов Оьмар Юсупович тIий ур: «Оьргъуев К.Р., Дагъусттаннай акъассагу, щала Союзрайгу ия лахъсса даражалул микробиолог. ПаччахIлугъран мунал бусан къашайсса куццуйсса хайр биян бувссар, ми азарду хьхьичIуннай къадиллансса чаранну лявкъуссар. Мунал буккан бувссар клостридиозирттайн къаршисса полианотоксинну».
КьурбанмахIаммадлул кIунттила дуркссар 200-нниха лирчусса элмулул давуртту, 5 монография ва м.ц.
Ци давраннай чIаларчангу, инсан ссаякIуй урувччуну къаикIайхха, ххирану, эшкьи-ччаву хьуну, 1967-ку шинал бувсса КьурбанмахIаммадлул кулпат, Надежда, 1976-ку шинал, хъин дан къашайсса азарданул бувгьуну, мюрщисса 2 оьрчIгу КьурбанмахIаммадлун циявасса аьпалун кьабивтун, бивкIуна. Му бивкIулул ва гъюжу уккан увна. Бюхъай хьхьичIва-хьхьичI мунил бивкIулул кьутI кунугу бикIан ванал къюкIлийх. Кулпат бансса пикригу бакъа, хIарачатрай ия нину дакъасса душнин ва арснан ятиншиву ккаккан къадитан. ОьрчIахсса аякьагу, дазу-зума дакъасса давугу дия ванал дардиран дарман. Мукьра-ххюра шинава 50 шинавун ухлахисса КьурбанмахIаммадлул ахиргу бувна кIилчинмур кулпат – Хъун ЦIувкIратусса Узлипат, тамаша банну чурххал, бакIрал Надеждаха лавхьхьусса инсан. КъакIулли тахсир щий хъанай бивкIссарив, амма къабавкьуна бутталщар ва лувоьрчIру. Чара ция, цува кулпатращал ца къатлуву яхъанай, душ ва арс Шамай-баващал цамур къатлуву яхъанахъи бувну, кIива кулпатралсса буллай, кIиуцавайсса куна, зий-занай икIайва КьурбанмахIаммад.
2014-кусса шинал, шамилчинмур инфарктраща ххассал къавхьуну, лакрал ва Дагъусттаннал ххаллилсса чув лавгуна аьпалухьхьун. Ветеринар элмурдал хъунасса специалист, профессор Леонид Веньяминович Кериллов ур дакIнийн бутлай: «КьурбанмахIаммад ия бюхттулсса даражалул аьлимчу, цал дурсса давурттал цIа, Дагъусттаннай дакъассагу, щалла дунияллийх ппив хьусса. Мунащал ихтилат бувни, ттул дакI рахIатну авадан шайва. Мунал марцIсса пикрирдах вичIидирхьукун, ттун ватандалуха зунсса шавкь ххи шайва. Муная хъунасса аьлимчу хьуссар, щилчIав кумаг къабувну, цанчирчан мунал элму ттинин щилчIав лархьхьусса къадиркIун тIий. Мунал лахъсса даражалул инсанлугърал цачIанма кIункIу байва чIявусса халкь. Ялун уруган личIисса пIяй бакъанугу, муначIа дия чища машан ласун къашайсса чувшиву ва марцIшиву…»
Мукуна ваная дакIнийн бутлай ур Социалист ЗахIматрал Виричу, Аьрасатнал элмурдал мяйжаннугусса академик, профессор Игорь Алексеевич Бакулов: «КьурбанмахIаммад Оьргъуевлул элму хъинну захIматсса душиву, мунал давурттал агьамшиву ва аьркиншиву жунма хIакьину цинявннан кIулли. КъюкIмур дия къювулий ванахун дахчуну: гьантлий 16-18 ссятрай дуллалисса даву, чурххахун дахчусса цIуцIаву – инсан сагъну личIайссарив? Даврихун агьсса чIумал, мунахь игьалагу, утти гьар учинсса инсан къаикIан аьркинссия. Даву щаллу хьувкун, мунаяр хъинсса рухIгу дунияллий къадикIайссия: дуцлантIиссия балайлул гъунгъу, буслантIиссия ляличIисса анекдотру, дакIнийн бутлантIиссия лавгмур, бувкIмур, бучIантIимур, хаснува нину-ппу, мачча-гъанми…»
Жула ккуличу Алексей ХIажиев тIий ур: «Цала дуллалисса цIакьсса даву сававрай, КьубанмахIаммад Оьргъуев хъунмасса хIурматрай икIайва, Ккуллал ризкьичитурачIа акъассагу, циняв Дагъусттаннал колхозниктурачIа. Шиная шинайн гьарза хъанахъисса ризкьилуя дучIаймуниву гьарца колхозникнал дакI марцIну бувсса захIмат бушиву кIулсса колхозрал председатель ХIажиев МахIаммадхIажи ххарину ва пахрулий икIайва, ми ххувшавурттаву хъунмасса бутIа Оьргъуев КьурбанмахIаммадлул буссар тIий. Ва зун айивхьусса шиннардийри Гьарун Саэдовлул цIанийсса колхозраву гьаз хъанай дайдирхьусса ризкьилул аьдад. 1963-ку шинал яттил аьдад дирссар 62000-ннийн, лухIи ризкьилул – 3600-ннийн, яни 3 шинал мутталий яттил аьдад гьаз хьуссар 40000-нния 62-ннийн. Ми хьхьичIуннайшивурттал бакIщаращуй бавцIуну бивкIссар колхозрал председатель ХIажиев МахIаммадхIажи ва ветврач Оьргъуев КьурбанмахIаммад. Та дия, элму ва производство чут хьуну, кIия дугърисса чувнал марцIсса хияллу мурадирайн биллалисса, оьрмурдугу, жаннугу агьалинал цIаний харж дуллалисса, гьарма мяш хьунсса даву. Му ппурттувур Ккуллал халкьуннал буччиннин ччатI бувкусса, ахIвал биялну хьхьичIунмай хъит увкусса. Миччар КьурбанмахIаммад щища-дунугу сазлан дан къашайсса куртIсса элмулувун лавгсса».
Утти щил ци тIурчангу, чув мяш хьунну, халкьуннан эбратранну бувтун цалва оьрмугу, жучIатува 10 шинал хьхьичI лавгунни КьурбанмахIаммад. ЛивчIунни цуппалу ванал кIилчинмур кулпат Узлипатгу. Ххирасса ия Узлипатлунгу КьурбанмахIаммад, лап ххирасса ия.
Ххира къахьунссагу акъая оьхъаврил, ххуй-хъиншиврул, дугъришиврул тиха зума дакъасса чув, Ккуллал шяравасса Шагьрамазаннул арс Оьргъухъал КьурбанмахIаммад.

Гулинжан Кьурбанова