Февраль зурул 11-нний 50 шин хьунтIиссия 2011 шинал декабрь зурул 15-нний оьрмулуцIа увсса пагьму-гьунар бусса журналистнан, «Черновик» кказитрал гьану бивзма ва учредитель ХIажимурад Камаловлун.
ПатIимат Рамазанова
ХIажимурад Камалов махъсса шиннардий оьрмурдацIа увсса 16 дагъусттаннал журналистнал кьюкьлувассар. Му язиминнал кьюкьлувугу ХIажимурад ца яла ябацIанма ва яргмая. Щалва Аьрасатнаву машгьурсса инсанъя. Мунаятур Аьрасатнал Журналистурал союзрал секретарь Павел Гутионов тIутIисса: «ХIажимурад, Ухссавнил Ккавкказнаву бакъассагу, Аьрасатнаву ца яла хьхьичIунмур кказитрай каялувшиву дуллалимая».
Ккавкказуллал агьали ххирасса машгьурсса тележурналист Максим Шевченколгу мудан централ телевидениялий лахъсса кьимат бищай ХIажимурадлул дурсса даврингу, мунал бюхъу-гьунарданунгу:
«Камалов ХIажимурадлул цIа – му журналистикалувусса бюхттулсса чувшиврул цIар, му ия ца яла цIанихма преподаватель, мунал хIасул бувна журналистикалул щаллу-ккурккисса школа», — тIий ур ХIажимурадлущал дусну ивкIсса Шевченко.
Республикалул агьалиначIа ХIажимурадлул аьпалул хIурмат лавайну бур, му ур Республикалий тархъансса журналистикалул гьану бивзма. Тархъаншиврул цIаний цIаравун ххявхма. ХIажимурадлун хъинну кIулну бивкIссар тIайламунил цIаний цува буниялттунгу цIаравун агьангу бюхъайшиву. Амма мунал адаврал, яхIлил кьамул къабувссар къатIайламургу бухIлай яхъанан. Властирдаха санаъру дуллан.
Къаххуймунищал, къатIайламунищал баранбал увксса ХIажимурад къаччан хьуминнал ссигу, оьхIалшивугу ялтту дуркссар. Мунащалгу лавсъссар кьадарминнал яхI буминнащал, адав бюхттулминнащал ласайсса щилтагъсса ххуллу…
2011 шинал декабрь зурул 15-нний «Черновикрал» редакциялул хьхьичI ХIажимурад Камалов оьрмулуцIа увссар. Мукьра шин гьарчагу, бувассар лякъин мунайн ка гьаз дурсса чиплагътал. Шиккува кIицI лаган, бувассар дагъусттаннал цайми журналистътал ливтIумигу лякъин, бугьан, танмихIрайн кIункIу бан.
Цалсса республикалий даймур даву цар дусса – «дело возбудить дурссар». Мукьра шинай лахъи ларгссар му «дело», ттигу мунил цуксса тарих буссарив къакIулссар. 2011 шинал «машрикьуллал Европанал тархъансса пресса» тIисса премиялун лайкь хьусса, 2012 шинал (аьпалухьхьун лавгун махъ) Андрей Сахаровлул цIанийсса премиялун лайкь хьусса ХIажимурад Камаловлул оьттулучутал лякъин, бугьан къашаву – му дагъусттаннал агьалинал яхIлин къакьамулну бикIан аьркинссар. Органнал зузалтрангу мукунма ХIажимурадлуйн ка гьаз дурми къалякъирча. Му миннал даврий ликъаххай ттангъану личIансса преступление дуну тIий.
