Февральданул 11-нний Дагъусттаннайн къуллугърал аьрххилий увкIунни Аьрасатнал Федерациялул ХIукуматрал Председательнал хъиривчу Дмитрий Рогозин. «Уйташ» аэропортрай га хьунаавкьунни Республикалул каялувчи Рамазан АьбдуллатIиповлул. Вице-премьернал аьрххилул хъунмур мурад бур республикалул военно-промышленный кашилун кьимат бищаву.
Дмитрий Рогозин аэропортраяту тIайлана лавгунни Каспийскалийсса «Дагдизель» заводрайн. Ганащал архIал бия Рамазан АьбдуллатIипов, Аьбдуссамад ХIамидов ва цаймигу. Дмитрий Рогозиннул ххалдунни производствалул кутак, ихтилат бунни предприятиялул зузалтращал.
Яла хьунни совещаниягу, тикку ххалбивгьунни заводрал давурттал хIакъиравусса, билаятрай хьхьириву ишла байсса битай ярагъ буккан баврил ялун бучIанмур, бумургу низамрайн буцаврил хIакъиравусса масъалартту. Дмитрий Рогозиннул ихтилатраву укун увкунни: «ЦIанасса ппурттуву чялишну зий бур мукьулчинмур никирал атомный подводный флот дузрайн буккан бавриха. Флотран зана дуллай бур модернизироватьгу дурсса шамилчинмур никирал атомный лодкарду. Мукуннасса давуртту дуллай бур дизельданий зузисса щинал лултту лагай лодкардан хаснугу. Билаятрал Президентнал жулва хьхьичI бивхьуну бур гособонзаказ биттур баврил задачартту, хаснува хIакьину, жуйнма кьатIаллил иширттал щавщи биллайгу бухьувкун, хьхьичIра портнерну диркIсса Украиннал промышленностьращалсса дахIавугу къалирчIукун».
Вице-премьернал увкусса куццуй, Аьрасатнал Обороналул министерствалул задачартту бартлаганшиврул, Украиннаву дуккан дуллай бивкIмур аьркинссар ва шинал ахирданийннин дуккан дан. Аьркинну бур заводраву модернизация дуван:
«Дагдизельданул» цехру зий бур хъинну духсса кьай-кьуйлий. Мукунсса технологиялул гьанулий цIусса ярагъ буккан буллан хъинну захIматссар. Агарда республикалул пикри бухьурча модернизация дуван федерал программалийхчил, му чIумал аьркинссар предприятие паччахIлугърал контрольданулун зана бан», — увкунни Д. Рогозиннул.
Дмитрий Рогозиннул мукъурттийн бувну, жунна аьркинну дур ххуйсса торпедартту. Аьркинни цIудуккан дан хьхьичIра бусравну диркIсса «Дагдизельданул» цIа. Му масъала шикку ххалбивгьуну махъ бусан аьркинссар билаятрал Президентнахь, ганал бивхьуну бур задача военно-морской флотрал вооружениялул щалла система уттара дуккан дан.
Дмитрий Рогозиннул жавабру дуллунни журналистътурал суаллахьхьун.
Рамазан АьбдуллатIиповлул ихтилатраву бувсъсса куццуй, балжисса ялунбихьуртту бувну бур завод уттава буккан баврил хIакъираву, финансирттал масъалартту низамрайн буцаврин хасну. Укунсса завод бушаврил дагъусттанлувтуран хъуннасса мяъна дуссар. Жунма аьркинссар жущава шаймур бан завод хьхьичIунну зуншиврул.
