Февральданул 17-нний МахIачкъалаллал администрациялул бакIчи МахIаммад СулаймановлучIа хьунни духсса къатраву ялапар хъанахъисса халкь цIуну дурсса къатравун бизан буллан ккаккан бувсса программалун хасъсса батIаву. Шикку гьуртту хьунни бакIчинал хъиривчутал, хъуншагьрулул районнал хъуними, шагьрулул Архнадзорданул управлениялул пишакартал, «Строитель-7» ООО-лул хъунама директор ва ванал хъиривчутал.
БатIаву тIитIлай, МахIаммад Сулаймановлул кIицI лавгунни, хIакьинусса кьини МахIачкъалаллал ацIунниха ливчусса кулпатру оьрмулун нигьачIисса шартIирдаву ялапар хъанай бушиву, халкь яхъанахъисса, ларгмур ттуршукулий дурсса къатри хIакьину-гьунттий лекьан бюхъайсса тагьардануву душиву.
«НигьачIисса шартIирдаву ялапар хъанахъисса халкь цIусса къатравун бизан баву хIукуматрал къуллугъну, буржну чIалай бур жун», — тIий ур шагьрулул бакIчи.
Шиккува дакIнийн бутан, Дагъусттаннай щурущи дурну дуссар «Переселение граждан из аварийного жилищного фонда на территории городского округа «город Махачкала» на 2013-2017 годы» тIисса муниципал программа. Программалий ккаккан бувсса куццуй, шагьрулий хасъсса пишакартурал дурсса хъиривлаявурттайн бувну, 100-сса чIярузивурду дусса къатри дусса дур нигьачIисса, мугьлат бакъа лекьан дан багьлагьисса тагьардануву.
ЦIана шагьрулул шаннагу райондалий подрядный организациярду зузисса давурттив най дусса дур. Амма ва ишираву программалул ялув зузисса пишакартуран, халкь цIусса къатравун бизантIишиврия ххарину, рязийну бунугу, цин лархьхьусса захIматшивурттугу хьунадакьлай дусса дур. Шикку шагьрулул бакIчинал тавакъю бувунни халкьуннащал ссавурданий, багьайсса куццуй, бувчIинсса ихтилатру буллан аьркиншиву.
Ахирданий МахIаммад Сулаймановлул ххи бунни, халкь дух хьусса къатрава цIусса къатравун бизан буллан аьркиншиву программалий ккаккан дурсса чIумуйннин.
