Мяйжаннугу, жула лакку кIану хъинну кьянатсса кIану бур, бакъар жучIава мяъданну, цайми-цайми экономика гьаз дансса аваданшиву. Амма райондалул маэшат гьаз бан жучIара дур нех аьдада экьинай, ссанчIав мюнпат бакъа.

Гай неххал щин тIайлану ишла дарча, жулва ахIвал хъинну гьаз хьунтIиссия. Бан аьркинну бур ца 2-3 плотина. Цалчинмур плотина га цалчинсса ламуяр чансса лавайну бувну, гай щин гьаз хьунсса куццуй турбардавух дачин га Кьубиял электростанция зузи бан яла ми щинай, ламучIату байбивхьуну, ЦIахъардал дазуйн бияннин ишла дан, бугьан гикку калан, помидор, нисварти ва цамур. Лакрал район дузал дан шайсса бакIлахъия хьунтIиссия гичча. КIилчинсса плотина бан кIа Шахьуйннал шяраваллил чIарав хъунмасса водохранилище хьунсса куццуй, гай щин кIай Гъумучиял ламурдачIан диянсса куццуйсса. Бан гикку щинаха лавхьхьусса электростанция, гай токрай зузи бансса насосный станциярду бувну, щин дачин дан КIундив, ЧIарав, ГьунчIукьатIув, Шахьував ва цаймигу щархъавун. Га водохранилищалуву бан балугъру. Та Шахьуйннал даралуву, щингу ишла дурну, бан халкь бигьалагансса коттеджру, парк, фонтаннугу дурну, гай щинаву зузи бан прогулочный катерду. Ччинал балугъру бугьлагьи бан.
Гьарца шяраву, цакуну къахьурчагу, дан ттизаманнул фермарду, 100 оьлинсса, ттизай аппаратругу, холодильникругу бусса, кIай накIлия кIиккура дуллан нис, хIуру нис, нагь, дурну ххуйсса рекламагу, дахлан.
Оьллал фермарду зузи дан аьркинну бур кормовая базарду бан. ЦIана аьрщи зий дакъар. Так ца ЧукIнав дур ттуршли­хъайсса гектар аьрщарал, трактордал гъай учайсса, комбайналул ттихIайсса, ятту-гъаттарал ккуччу дуллай, ишла къадуллай. Бан аьркинну бур МТС-ру. КIай циняв хъуру дугьлан аьркинни гьарца шяраву. ВицIхъав бан аьркинни консервардал цехру, компотру дувайсса, облепихалул нагь дайсса цех.
Га цалчинсса ламучIату байбивхьуну, бугьан елкардал, сос­нардал вацIа, кIа КIунди-ЧIарав бияннинцIа, та Лаващав буххавайсса кIанттай кунма.
Гьарца шяраву, спортрал дворцы къабарчангу, волейболданул площадкарттувагу бан, ттурникIру дишин, настольный теннисрай буккайсса помещение бан.
Га Кьубиял фермалучIату Гъумукун маршрутка итабакьин аьркинни кIюрххилния ахттакьуннин.
Та Ккурккуллал шярава лавай ххуллу барча, ТтурчIиял шяраву дуссар марцIсса лухIи аьрщи, кIий нувщи, калан бугьларча, га МахIачкъала буччин бан хьунтIиссар. Ялагу кIий буссар кIяла чарил зунтту, камнерезный комбайнердал ххуку дан шайсса къат дуссар. КIай чарттайну, чунчIав къалавгна, жулла район къатри дайсса чар­ттал дузал хьунтIиссия. Аьркин­ссаксса арцугу хIукуматрая тIалав дурну, вай ишру дузал барча, жулла тагьар мадара къулай хьунссия.
Бадвани Чарандаев