Январь зурул 31-нний, Кировлул цIанийсса райондалул администрациялул хъунама СалихI Сагидов цува бакIчину, Кировлул цIанийсса райондалийн багьайсса кIанттурдай дунни ирглийсса субботник.

И. Саидова
МахIачкъала шагьрулул Кировлул цIанийсса райондалул администрациялул хъунаману зий ур жагьилсса каялувчи, жула лакку оьрчI СалихI Сагидов.
СалихI Камаловичлул, ва къуллугърай зий хъунма хIал къавхьунугу, чIалачIи бунни цува зун гъира-шавкь дусса, даврил опыт бусса каялувчи ушиву. Ванал каялувшиву дуллалисса район цурдагу МахIачкъалаллал шагьрулий яла хъуннамур ва чIявусса къайгъурду бан аьркинсса захIматсса дур. СалихI Сагидовлул тIурча, цайнма вихшала бувсса къуллугърал буржру дакI марцIну биттур буллай, дуллай ур цикссагу, агьалинан мюнпатрансса, давурттив, ляхълай ур захIматсса масъалартту дузрайн буккан бувансса чаранну. Ванал каялувшиннаралусса цинявппагу зузалт чялишну гьуртту шай шагьрулуву нанисса цинярдагу мероприятиярдавух.
Махъсса ппурттуву жулва шагьрулий сайки циняв идарар­ттал зузалт хIала-гьурттуну зий бур шагьру ччюрклицIа марцI буллай дуллалисса давурттавух. СалихI Камаловичгу цалва зузалт­ращал бигьалагай кьинирдайгу субботникру дуллай зий ур. Январь зурул 31-нний, СалихI Камалович цува бакIчину, Кировлул цIанийсса райондалийн багьайсса кIанттурдай дунни ирглийсса субботник. Администрациялул коллективрал му субботникрай 6-хъул камазрай 300-хъайсса чуваллу ччюрклил буккан бунни. Ва кьини вайннал букьан бунни ва райондалий салкьи хьуну бивкIсса ччюрклил 69-хъул бакIурду. Аьмну вайннал дуккан дунни 90 тонна ччюрк­лил. Мукунма ва субботникрай гьуртту хьунни Кировлул райондалийсса 87-хъул идарарттал зузалт. Вай давурттив дан ишла дунни уттигъанну шагьрулул ва райондалун итадаркьусса цIусса шанна техника.
Му бакъассагу, СалихI Сагидовлул сакин бунни гихунмайгу райондалийн багьай­сса кIанттурду чапалшивруцIа марцI бувансса давурттив дансса графикгу.