Оьрмулул къачансса шинну дусса инсантурава чIявуминнан, хаснува МахIачкъалалив ялапар хъанай бивкIминнан, хъинну ххуйну кIулссар жулла республикалул дяшагьрулувусса Клуб рыбников. Вай гьантрай хьунни му клубрал ремонт бувну, цIулаган бувсса къатри шадлугърал тагьарданий тIитIлатIисса ххарисса батIаву.

Бадрижамал Аьлиева
Ларгсса ттуршукулул 20-ку шиннардия байбивхьуну му клуб бивкIссар шагьрулул инсантал бигьалаган батIайсса кIануну, культуралул кюруну. Миву шайсса диркIссар шагьрулул ва республикалул лагрулийсса культуралул агьамсса давурттив, батIавуртту. Мива чан къашай­сса бивкIссар музыкалул чIурду, ххарисса, тяхъасса инсантал. Махъ му клубрая дворец хьуну бур. 2007 шинал Дагъусттан Республикалул ХIукуматрал постановлениялийн бувну, му хьуссар ДР-лул паччахIлугърал учреждение «Дворец культуры». 2009 шинал дайдирхьуссар ми къатрал капитальный ремонт. Сайки 100 шинал хьхьичIва бувсса къатрал чIиртту щала цIакьну къалявкъуну, ремонтрал давурттан кIанай, реконструкция дувансса хIукму бувссар. Ахиргу му къуртал дурну, цIуну нузру тIиртIунни Культуралул дворецрал.
Культуралул дворец тIитIла­тIисса шадлугъравух гьуртту хьунни ДР-лул ХIукуматрал Председательнал цалчинма хъиривчу Анатолий Карибов, ДР-лул культуралул министр Зарема Буттаева, ДР-лул печатьрал ва информациялул министр Азнаур Аджиев, ДР-лул миллатрал политикалул министр Татьяна Гамалей ва чIявусса цаймигу.
Шикку махъ лахълай, Анатолий Шамсуттиновичлул увкунни:
— На хIакьину хъинну хъуннасса ххаришиврущал ккаккан бан ччай ура зун Культуралул дворецрал цIулаган бувсса къатри. Зун ккаккантIиссар шиву гьарта-гьарзасса фойе, ххаллилсса репетициярдал зал, концертрал чIивимур зал. Щаллу дурну дуссар вокалданул ва хореографиялул паччахIлугърал «Дагестан» ансамбльданун зун­сса ххаллилсса шартIру. Культуралул дворецраву цалла даву дайдихьлай бур балетрал ва вокалданул студиярттугу. Мукунма уттизаманнул тIалав­шиннардащалсса звукозаписьралмур студиялулгу. Вай цимурцагу — реконструкциялул анжагъ цалчинмур этапрай. КIилчинмур дайдишинтIиссар гьашину ва лахъи лагантIиссар 2018-ку шинайннин. Пландалийн бувну, му хIаллай бан­тIиссар азарва кIану бусса концертный зал, репетициярдал ца зал ялагу ва гримерныйрду. КIилчинмур этап къуртал хьуну махъ Культуралул дворецраву бикIантIиссар Опералул ва балет­рал театргу, — увкунни ванал.
— ХIакьинусса ва иширал агьамшиву дур ххишала дакъа хъуннасса — кIива-шанма коллектив зунсса кIану цал архIал щаллу хьунни. Шикку щаллу дурну дур аьркинсса куццуйсса давринсса ва творчествалунсса шартIру. Мурив республикалул культура хьхьичIуннай дачаврил хъунмасса бутIар.
Вай ххаллилсса къатраву зун нанисса цинявннанмагу ва ххарисса кьини чIа учин ччай бура цIакьсса цIуллу-сагъшиву, буллугъшиву, творчествалуву цIу-цIусса ххувшавуртту, жулла ватандалул цIанийсса хьхьичIунсса даву, — увкунни Зарема Ажуевналгу. Гихунмайсса цилва ихтилатраву ванил кIицI лавгунни ва Дворецрайну жулла республикалий ххи хьушиву магьирлугърал ца ужагъ, цивугу ликказан дуллантIисса респуб­ликалулми творчествалул коллективирттал дакъа, жулва билаятрал цайми регионная ва чил билаятирттая бувкIминнулгу, шиккува тIитIинтIишиву Музыкалул фольклорданул центргу, музыкалул инструментирттал музейгу.
«Дагестан» ансамбльданул каялувчи Дабай Дабаевлул цалва ихтилатраву кIицI лавгунни вай къатрал реконструкциялул цалчинмур этапран харж хьушиву республикалул бюджетравасса сайки 50 миллион къурушрал, проектрайн бувну вай къатрал реконструкция аьмну сайки 350 миллион къуруширттайн лахълай душиву.
Махъру лавхъун, аьдатрайн дурсса ятIул лиссу кьуркьуну, ва шадлугърал официалмур бутIа къуртал хьуну махъ, шиккун бавтIми бувккунни цIулаган бувну, букъавчIайсса куццуй бакьин бувсса къатравух. Хъирив бия ва шадлугърал музыкалулмур бутIа.