Ларгсса нюжмар кьини Новостройрай хьунни ЧIаящиял шяравасса Аьйшат ХIажиевал «Зияраты лакских алимов» тIисса луттирал презентация.

Найбунува учин, чIявусса агьали бавтIун бия презентациялийн, гиха, ЦIуссалакрал райондалия, шагьрурдая бувкIсса чIявусса бия.ЧIалай бия му мероприятиялул хъар цилла хъачIунттайн ларсъсса, ЦIуссалакрал райондалул хъунаманал хъиривчу Аьбдурашид Буттаевлул биялсса хIарачат бувшиву даву лайкьсса даражалий дуван, лакрал аьлимтурал тарих батIлай биялсса захIмат бувсса ва буллалисса Аьйшатлухь лайкьну барчаллагь учин.
Презентациялул дайдихьу дуллалисса махъ лахълай, му мероприятие дачин дурсса Лакрал театрданул артист, миллатран хайрсса давурттив дуван чялиш увксса жагьил Нураттин Юсуповлул кIицI лавгуна дунияллул гъунттулу цамур бакъашиву шамийла мина даххана дуллан багьсса ляличIисса миллат. Бувсуна лакрал аьлимтурал цIа республикалийгу, кьатIаллил билаятирттайгу машгьурну диркIшиву.
Гуманитар институтрал ректорнал кумагчи, теологиялул кафедралул хъунама УмархIажиев МахIаммадлул цалвамур ихтилат­раву кIицI лавгуна исламрал дин хьхьичIуннайгу, студентътуран лахьхьингу давриву хъунмасса бутIа бихьлай бушиву цачIава зузисса лак­рал хьхьичIунсса арсру Давуд Тумалаев ва Хизри Илиясов, лавайсса кьимат бивщуна Аьйшат ХIажиевал луттиран. Бувсуна цачIара институт­равугу дувантIишиву му луттирал презентация.
Тележурналист Аьлишаев АхI­мад-хIажинал бувсуна цува Аьйшатлущал уртакьну зий ушиву, му хъинну хъирив лавну лакрал тарих ххалбигьлай зий бушиву. Бувсуна аьлимтурал оьрмурдая цIу-цIусса затру кIул буваву мурадрай, Аьйшат цимилагу зунттавун лагайшиву, лакрал хъинну авадансса тарих бушиву аьч буллай, дакI дирхьуну зузисса инсан бушиву.
«ЧIявусса бур лакрал хьхьичIун­сса давурттив дурсса хъами: имам Шамиллуясса лу чивчусса Мариян Ибрагьимова, лакрал хъаннил «Дараччи» ккурандалий каялувшиву дуллалисса Мариян Илиясова ва м.ц. Аьйшат ХIажиева тIурча диндалул чулухуннайсса укунсса давурттив дуллалисса цалчинсса хъамитайпа бур, ванил ххаллилсса энциклопедия чивчуну бур.
ХIакьинусса кьини жулва жагьилсса инсантурал багьу-бизулуву чIярусса диялдакъашивуртту дур, ми духлаган даншиврул эбрат аьркинну дур. Аьйшатлул лу­ттиравасса циняв аьлимтал эбрат ласунсса арамтал бур. Шиккува кIицI лаган ччива, репрессиярдал ххутIахьхьун бирив­сса лакрал миллатрайн, исламрал аьлимтурайн личIиссава хъунмасса щавщи бившиву. ХьхьичIунми динчитал бухлаган буллалисса даврил дайдихьу лакрая дурну диркIшиву, исламрал интеллигенциялуцIух цIу дирхьуну диркIшиву ва хIакьинусса кьинигу му баларал хIасиллу асар хъанайнна душиву», — увкуна чичу ва аьлимчу Хизри Илиясовлул.
«На дакIнийн бутлай ура Аьй­шат-хIажи цалчин вай луттирдахун багьсса чIун. Ттун мунил пикри ххуй бивзуна. Утти ва чIявусса луттирдал автор бур. Щархъавух занай, чIявусса аьлимтал бушиву кIул бунни, минная чивчунни. Ва жула заманнул виричури, дякъивух, марххалттанивух, замгьарданувух, ссахчIав къабурувгун, лакрал аьлимтурал тарих лахьлай занай бивкIссар. Укунсса душру миллатраву чIяву баннав, виртталгу миннал чIарав бацIаннав», — увкунни чичу, публицист ва аьлимчу Сулайман Мусаевлул.
Аьйшат ХIажиевал луттиран ххуйсса кьимат бишлашисса ихтилат­ру бунни Дагъусттаннал бусурманнал рувхIаний управлениялул вакил Дадаев Мурадуллагь-хIажинал, Чапаевкаллал школалул директор Камил Аьлиевлул. Му луттирая цанма чIявусса хайр-мюнпатрансса затругу лавхьхьушиву бусласисса ихтилатру бунни Гуманитар институтрал студентътурал.
Лях-карах нашидру увкунни «Гъази-Гъумучи» группалул.
ЦIуссалакрал райондалул администрациялул хъиривчу Аьбдурашид Буттаевлул барчаллагь увкунни райондалул жяматрал цIанияту лакрал цIанихсса аьлимтурая, щайхтурая лакку мазрайгу, оьрус мазрайгу луттирду чичлачи­сса Аьйшатлухь, дуллунни мунин арцуйнусса бахшишгу.
ЧIявуя презентациялий Аьйшатлухь барчаллагьрайсса ихтилат­ру бан ччими, лакрал тарих гьаз бавриву мунил хъунмасса бутIа бивхьушиврий чIурчIаву дуллалими.
«На Аллагьнайн барчаллагьрай бура нава тIайласса ххуллийн буккан бувсса, аьлимтурал тарихраха зузи бувсса, — увкуна презентациялийн бувкIцириннахь барчаллагь тIий Аьйшат ХIажиевал. — На хIарачат буллай бура аьлимтурая ттущава кIул бан хьумур зухьгу бусан. Ми аьлимтал бур чаннацIуртти, миннал барачатрайнуру жува яхъана­хъисса».