Ва шин, личIи-личIисса жяматрал цалла ихтиярду дуруччаву мурадрай, голодовка баян буллалисса шин дия. Голодовка баян баву – жяматрал цалла ихтиярду ссуссукьу дуллай бушиврия дунияллун, хIукуматран баян буллалисса акция хIисаврайсса ца кьяйдар. Ца чаранни. Цалва чIу бавну ччиминнал ихтиярди, къарши буккаврил, протестрал журар.
Декабрь зурул 23-нний голодовка баян бувну бивкIунни ЦIуссалакрал райондалул агьлугу. Шушиннал шяравасса 34 инсан (миннавух 14 хъамитайпа). Миннал голодовка баян баврил сававгу дур Шушиннал шяравалличIасса 9 гектар аьрщарал «Алмаз» тIисса СПК-лухьхьун арендалий дуллуну душиву, му аьрщи агьалинайх дарчIуну ччай бушиву. Шяраваллил администрациялул къатраву голодовка баян бувми ссавурданува буккаврийгу аьй дакъар: ичIаллил матахI, кьай-кьуй кунма гьанагьи бувсса, шичча тиккун, тиччагу кIиккун бизан буллалисса аькьувалул ялувттуккун, хайр-мюнпат ласун бюхъайсса аьрщарацIа бувну, хъявринсса урцIухгу личIан бувкун, миннан яла цивппа рязийну бакъашиву баян бан аьркинни. Декабрь зурул 24-нний райондалул бакIчи МахIаммадхIажи Айдиев, Халкьуннал Мажлисрал депутат Зайнуллагь Мирзаев хьунабавкьунни голодовка баян бувцириннащал.
«Агьалинан цахьхьунна зана дурну ччисса 9 гектар аьрщарал «Алмаз» СПК-лухьхьун дуллуну диркIссар 2006 шиналла, му аьрщигу Шушиннал шяравасса инсаннайн лахъан дурну дия. Шяраваллил агьалинащал икьрал дурну диркIун дур яла му аьрщарая агьалинан бутIа бан, дачIин. На райондалул хъунаману увчIукун, му иширал хъирив агьра, амма аьрщи дачIин ккаккан бувминнал сияхI дакъая, — тIий ур МахIаммадхIажи Айдиев. – Шяраваллил хъунаманал СПК «Алмазращал» кьутIигу чирчуну, аьрщи арендалий дуллуну дия. Агьалинайх дачIаврил масъаламур лахъи лаглан бивкIуна. 2010 шинал на прокуратуралийн увкссияв Шушиннал шяраваллил администрациялул му даву закондалуцIун бавкьуну дурсса дурив -дакъарив кIул буван. Судрал кьаралданий дан багьлагьисса даву дия, Къумторкъалаллал судралгу му масъала 2 шинал лажиндарай лахъи лаган бувна».
ХIажи Айдиевлул бувсунни голодовка баян бувминнал тIалавшинна тIайласса душиву, Республикалул БакIчинайн ва Верховный судрайн бувккун, ми 9 гектар агьалинахьхьун зана дувансса хIарачат бантIишиву. Райондалул хъунаманал махъ буллунни ца зурул лажиндарай му масъала щаллу буван.
Голодовка баян бувминналгу райондалул бакIчинахь бувсунни му масъала сайки 8 шинай чулийн къабуккаврия агьалинан хъунмасса зарал хъанай бушиву, му аьрщарая хайр-мюнпат ласлан кIанттай, цанма суд-диваннайх буклан багьлай бушиву, цивппа му аьрщи зузи дуван, муния хайр ласлан чялиш бувккун бушиву. Миннал бувсунни зурул лажиндарай масъала чулийн къабуккарча, цIуницIа хъиннура хъуннасса голодовка баян бантIишиву. МахIаммадхIажи Айдиевлул му масъала ца зурул мутталий щаллу буван бакIрайн ласайхту, голодовка баян бувми шаппа-шаппай ппив хьунни.
П. Рамазанова
А. Аьбдуллаева
